Read Hmong Njua Teev Npe 9 Bible Online

Teev Npe 9 - Hmong Njua bible

Teev Npe 9

¹Tug TSWV has rua Mauxes tom taj suabpuam Xinais thaus lub ib hlis xyoo ob, tom qaab kws cov Yixalayees tsiv nraag tebchaws Iziv lug. Nwg has tas,

²“Lub hlis nuav nub kaum plaub, thaus nub poob qho, cov Yixalayees ca le tuaj pib ua Kevcai Hlaa Dlhau lawv le txuj kaab ke hab tej kevcai kws tub teem tseg lawm.”

⁴Yog le ntawd, Mauxes txhaj kuas cov pejxeem pib ua Kevcai Hlaa Dlhau,

⁵hab lub ib hlis nub xab kaum plaub thaus nub poob qho, puab txhaj le ua kevcai Hlaa Dlhau nyob rua tom taj suabpuam Xinais. Cov pejxeem ua txhua yaam lawv le tug TSWV tau saamfwm rua Mauxes lawm.

⁶Tabsis muaj qee leej txivneej tseem tsi tau ua kevcai ntxuav kuas huv, vim puab moog tuav tej tuabneeg tuag, nub ntawd puab txhaj tsi tau lug ua kevcai Hlaa Dlhau. Puab moog cuag Mauxes hab Aloos obtug

⁷hab has tas, “Peb yog tuabneeg tsi huv lawm, rua qhov peb tau moog tuav tej tuabneeg tuag, tabsis vim le caag txhaj txwv tsi pub peb nrug cov Yixalayees coj khoom moog fij rua tug TSWV?”

⁸Mauxes teb puab has tas, “Mej ua sab ntev tog moog txug thaus tug TSWV qha rua kuv tsaiv.”

⁹Tug TSWV qha rua Mauxes

¹⁰kuas has rua cov Yixalayees has tas, “Thaus mej ib tug twg lossis mej tej xeebntxwv moog tuav tej tuabneeg tuag ua rua tug ntawd tsi huv lossis mej ib tug twg tseem taabtom moog kev dleb lawm, mas nwg tseem ua tau Kevcai Hlaa Dlhau rua tug TSWV,

¹¹tabsis koj ca nwg ua Kevcai Hlaa Dlhau rua ib lub hlis tom qaab kws yog lub ob hlis nub kaum plaub thaus nub poob qho. Puab maam ua kevcai noj tug yaaj ntawd nrug cov ncuav tsi xyaw keeb hab tej zaub kws ab.

¹²Tsi xob tseg tej zaub mov ca txug taagkig sawv ntxuv hab tsi xob muab tug tsaj ntawd tej pobtxhaa ua luv le. Ncu ntsoov ua kevcai Hlaa Dlhau lawv le tej kevcai.

¹³Tabsis tug kws tub ua kevcai ntxuav huv hab nwg tsi tau moog kev dleb, txhobtxwm tsi tuaj ua Kevcai Hlaa Dlhau, yuav muab tug ntawd rhu tawm huv kuv tsaav tuabneeg moog, vim lub sijhawm ntawd nwg tsi tau coj khoom tuaj fij rua kuv lawv le kws tub npaaj tseg lawm. Nwg yuavtsum ris nwg lub txim.

¹⁴“Yog has tas, muaj tej tuabneeg txawv tebchaws nrug mej nyob, hab nwg xaav ua Kevcai Hlaa Dlhau rua tug TSWV, nwg yuavtsum ua lawv le tej kaab ke hab tej kevcai. Muab tuab txuj kevcai nuav rua txhua tug, tsi has cov txawm teb txawm chaw lossis cov tuabneeg txawv tebchaws.”

¹⁵Nub kws puab tsaa tau lub Tsevntaub kws yog qhov chaw nrug tug TSWV sis ntsib lawm, muaj ib tauv fuab lug laum nkaus lub tsevntaub ntawd. Mo ntuj tauv fuab ntawd cig laam lug le nplaim tawg.

¹⁶Pheej ua le ntawd moog le; nruab nub tauv fuab roog rawv lub tsevntaub sis ntsib, hab mo ntuj tauv fuab cig laam lug le nplaim tawg.

¹⁷Thaus twg tauv fuab ntawd tshem tawm moog nreg rua qhov twg lawm, cov Yixalayees txawm tshais chaw moog tsaa puab tej tsevntaub nyob rua qhov ntawd.

¹⁸Cov pejxeem txu puab tej tsevntaub lawv le tug TSWV saamfwm, hab puab rov tsaa puab tej tsevntaub lawv le tug TSWV saamfwm. Yog tauv fuab nyob sau lub Tsevntaub sis ntsib ntev npaum le caag puab nyob huv lub yeej ntawd ntev npaum le ntawd xwb.

¹⁹Txawm yog tauv fuab nyob ntev heev sau lub Tsevntaub los cov Yixalayees yeej noog tug TSWV lug hab puab tsi tshais chaw moog nyob qhov twg le.

²⁰Muaj tej zag tauv fuab tsuas nyob sau lub Tsevntaub sis ntsib ob peb nub xwb; txawm le caag los xij; puab tsuas nyob hab tshais chaw lawv le tug TSWV coj puab kev xwb.

²¹Muaj tej zag tauv fuab nyob sau lub Tsevntaub ib mos xwb, thaus sawv ntxuv puab tshais chaw thaus tauv fuab ntawd tshem kag lawm.

²²Tsi has tauv fuab nyob ob nub, ib hlis, ib xyoos lossis nyob ntev tshaaj ntawd, tauv fuab ntawd nyob ntev npaum le caag puab yeej nyob ntev npaum le ntawd tsi tsiv tawm le; tabsis thaus twg tauv fuab tshem tawm lawm, puab maam le tshais chaw thaus ntawd.

²³Tug TSWV saamfwm kuas puab lauj puab tej tsev hab kuas puab tsaa puab tej tsevntaub. Puab noog tug TSWV tej lug kws nwg has rua Mauxes.