Read Hmong Njua Mikhas 2 Bible Online

Mikhas 2 - Hmong Njua bible

Mikhas 2

¹Cov tuabneeg kws pw sau txaaj tuav tswvyim moog ua phem yuav raug kev txomnyem! Thaus kaaj ntug txoog puab tawm moog ua phem lawv le puab tub xaav tseg lawm.

²Thaus puab xaav tau luas tej teb, puab moog txeeb kag lug ua puab tug; thaus puab xaav tau luas tej tsev, puab moog txeeb kag lug rua puab yuav. Tsi muaj ib tug tuabneeg twg kws nwg tsev tuabneeg lossis nwg tej cuabtaam yuav nyob tso sab lug tsi pluj le.

³Yog le ntawd, tug TSWV txhaj has tas, “Kuv yuav tso kev puamtsuaj lug raug mej, hab mej yuav tsiv tsi dlim le. Thaus mej raug kev kub ntxhuv le ntawd, mej yuav tsi tau moog kev muaj plhus ntxhas lawm.

⁴Thaus txug nub ntawd tuabneeg yuav muab mej txujkev puamtsuaj lug pav ua yaam ntxwv qha rua suavdlawg, hab puab yuav hu nkauj qha mej txujkev tu sab rua suavdlawg noog le nuav: “ ‘Peb raug kev puamtsuaj taag lawm lauj! Tug TSWV tub muab peb lub tebchaws tshem moog lawm hab muab cob rua cov tuabneeg kws tuaj nteg peb ntawd txhais teg.’ ”

⁵Yog le ntawd, thaus txug nub kws tug TSWV rov tu lub tebchaws rua nwg tsaav tuabneeg nyob, mej yuav tsi muaj ib tug nrug luas muaj feem muaj tug le.

⁶Cov tuabneeg ywg kuv has tas, “Koj tsi xob tuaj qha peb, tsi xob qha tej ntawd lawm. Vaajtswv yeej tsi pub kuas peb poob ntsejmuag ib zag le.

⁷Koj xaav has tas cov Yixalayees raug foom tsi zoo lawm nua los? Tug TSWV ua tsi taug sab ntev lawm los? Nwg yog tug yuav ua tej ntawd ntaag los? Nwg tsi has lug mog lug muas rua cov tuabneeg kws ua ncaaj le ntaag los?”

⁸Tug TSWV teb has tas, “Mej txhobtxwm ua yeebncuab rua kuv tsaav tuabneeg. Cov tuabneeg kws rov huv tshaav rog lug xaav has tas puab yuav tau nyob kaaj sab lug huv puab tej tsev, tabsis mej moog tog kev fuab puab tej tsho luj nqaa moog lawm.”

⁹Mej muab tej quaspuj kws yog kuv tsaav tuabneeg ntab tawm huv puab tej tsev kws yog puab lub chaw tshua, hab mej tsi pub puab tej mivnyuas lug yuav kuv txuj koob koov moog ibtxhis.

¹⁰Mej ca le sawv tawm moog; ntawm nuav tsi muaj chaw rua mej nkaum lawm. Tub yog vim mej tej kev txhum, lub tebchaws txhaj raug kev puamtsuaj.

¹¹“Cov tuabneeg nuav nyam tug cevlug kws moog ncig dlaag rua nuav rua u has tas, ‘Kuv yog tug qha rua mej has tas cawv txiv maab hab cawv ntxws yuav nchuav laub lug, lug rua mej.’

¹²“Tabsis kuv yuav sau taagnrho mej cov Yixalayees kws seem lug nyob ua ke. Kuv yuav coj mej lug ua ke ib yaam le paab yaaj kws lug sis sau rua huv nkuaj. Yuav muaj tuabneeg lug nyob puv nkaus huv mej lub tebchaws dlua ib zag ntxiv ib yaam le paab yaaj kws nyob puv nkaus huv lub tshaav zaub.”

¹³Tug TSWV yuav qheb kev rua puab hab coj puab huv lub tebchaws kws puab raug nteg moog nyob rov qaab lug. Puab yuav tsoo tej roojvaag nroog tawg txua hab tawm moog nyob ywj sab. Tug TSWV kws yog puab tug Vaajntxwv yuav coj puab kev tawm moog.