Read Hmong Njua Mikhas 3 Bible Online

Mikhas 3 - Hmong Njua bible

Mikhas 3

¹Mej cov kws ua thawj tswjfwm cov Yixalayees, mej ca le ua tuab zoo noog! Tsimnyog mej yuavtsum paub txujkev ncaaj nceeg,

²tabsis mej ntxub txujkev ua zoo hab nyam txujkev ua phem. Mej muab kuv tsaav tuabneeg laws tawv caj hab luas puab tej nqaj tawm ntawm puab tej pobtxhaa.

³Mej noj kuv tsaav tuabneeg, mej muab puab laws tawv, tsoo puab tej pobtxhaa hab muab puab tsuav ib yaam le tsuav nqaj rua huv laujkaub.

⁴Muaj ib nub twg mej yuav quaj hu tug TSWV, tabsis nwg yuav tsi teb mej. Nwg yuav tsi noog mej tej lug thov vim tej kev phem kev qas kws mej tau ua taag lug.

⁵Kuv tsaav tuabneeg raug cov cevlug cuav coglug dlaag ntxag has tas cov kws them nqe rua puab yuav tau txais kev thaajyeeb, tabsis cov kws tsi them nqe rua puab yuav ntsib kev tsuv kev rog. Tug TSWV has rua cov cevlug ntawd has tas,

⁶“Cov cevlug, mej lub neej tub yuav xaus; lub nub tub yuav poob qho. Rua qhov mej coj kuv tsaav tuabneeg yuam kev, mej yuav tsi ua ywgtoog pum qhov tseeb hab mej yuav tsi paub qha tej kws yuav muaj lug yaav tom ntej le lawm!”

⁷Cov tuabneeg kws paub txug yaav tom ntej yuav poob ntsejmuag vim tej lug kws puab qha tsi tseeb. Puab yuav poob ntsejmuag rua qhov tug TSWV tsi teb puab tej lug lawm.

⁸Tabsis tug TSWV pub nwg tug ntsujplig hab lub fwjchim rua kuv; nwg pub kuv paub txujkev ncaaj nceeg hab pub kuv muaj lub sab tawv moog qha cov Yixalayees kuas puab paub puab tej kev txhum.

⁹Mej cov kws ua thawj tswjfwm cov Yixalayees, mej ca le ua tuab zoo noog kuv tej lug, mej ntxub txujkev ncaaj nceeg hab muab qhov zoo ntxeev ua qhov phem.

¹⁰Mej muab txujkev tsi ncaaj nceeg hab luas tej roj ntshaa lug pua lub nroog Yeluxalees kws yog Vaajtswv lub nroog.

¹¹Cov thawjcoj kws tswjfwm lub nroog nuav, puab txav txim vim puab xaav tau tej nyaj kws luas coj tuaj xab puab cov povthawj txhais txuj Kevcai vim tej nqe zug kws luas them rua puab. Cov cevlug qha tej kws yuav tshwm lug yaav tom ntej vim xaav tau nyaj xwb puab cov ntawd khaav has tas, tug TSWV nrug nraim puab nyob. Puab has tas, “Tug TSWV nrug nraim peb, yeej tsi muaj ib yaam xwm dlaabtsi yuav lug raug peb le.”

¹²Tub yog vim mej ntaag, lub nroog Xi-oos txhaj raug luas muab laij ib yaam le laij teb, lub nroog Yeluxalees yuav raug luas muab rhuav kuas puamtsuaj taag ua ib pawg, hab lub pov roob kws ua lub Tuamtsev rua yuav caj ua haav zoov.