Read Hmong Njua Mikhas 6 Bible Online

Mikhas 6 - Hmong Njua bible

Mikhas 6

¹Mej ca le noog tug TSWV rooj plaub kws nrug cov Yixalayees sis has. Tug TSWV, ca le sawv hab has Koj rooj plaub; thov ca tej toj roob hauv peg nrug ua timkhawv nov koj tej lug.

²Tej roob hab tej hauvpaug caag kws tuav lub nplajteb nyob moog ibtxhis, mej ca le ua tuab zoo noog tug TSWV rooj plaub! Tug TSWV tau kom ib rooj plaub nrug nwg tsaav tuabneeg. Nwg taabtom ua plaub rua cov Yixalayees.

³Tug TSWV has tas, “Kuv tsaav tuabneeg, kuv tau ua le caag rua mej? Kuv tau ua rua mej nyuaj sab los? Mej ca le teb kuv!

⁴Kuv tau coj mej tawm nraag tebchaws Iziv lug; kuv tau tso mej dlim ntawm txujkev ua luas qhev; kuv khaiv Mauxes, Aloos hab Milias ua cov coj mej.

⁵Kuv tsaav tuabneeg, ncu ntsoov tej kws cov Mau-am tug Vaajntxwv Npalaj tuav tswvyim ua phem rua mej, hab tej kws Npe-aus tug tub Npala-aas tau teb rua Npalaj ntawd? Ncu ntsoov tej xwmtxheej kws thaus mej taabtom tawm huv lub yeej ntawm Akaxias lug rua ntawm Nkilenkas. Ncu ntsoov tej nuav, mej txhaj yuav paub tej kws kuv tau paab mej dlim ua ntu zug lug.”

⁶Thaus kuv moog pehawm tug TSWV kws yog Vaajtswv tug kws kaav sau qaum ntuj, kuv yuav coj dlaabtsi moog rua nwg? Kuv yuav coj tej mivnyuas nyuj kws zoo tshaaj plawg moog tua hlawv ua khoom fij rua nwg los?

⁷Tug TSWV puas yuav txaus sab, yog has tas kuv coj ib txheeb tug yaaj lossis tej roj txiv ntoo kws txhawv le tug dlej tsi tu moog rua nwg? Puas yog kuv yuav tau muab kuv tug tub hlub moog tua ua khoom fij rua tug TSWV txhaj theej tau kuv lub txhoj?

⁸Yeej tsi tau hlo le, tug TSWV tub qha yaam zoo rua peb lawm. Tej kws nwg xaav kuas peb ua yog le nuav: Ua lub sab ncaaj, cog kev sis hlub kuas ruaj khov hab ua lub neej txu fwjchim nrug peb tug Vaajtswv sis raug zoo.

⁹Tug kws fwm tug TSWV txhaj yog tug muaj tswvyim. Tug TSWV has rua cov tuabneeg kws nyob huv lub nroog has tas, “Mej cov kws tuaj sis sau rua huv nroog, mej ca le ua tuab zoo noog!

¹⁰Huv cov tuabneeg ua phem tej tsev puv nkaus tej khoom kws puab moog dlaag tau lug. Puab muab raab teev tsi txwm luj ntxo luas tug noj, kuv ntxub tej ntawd kawg le.

¹¹Kuv yuav ua le caag txhaj zaam txim tau rua cov tuabneeg kws muab raab teev tsi txwm coj lug luj ntxo luas tug ntawd?

¹²Mej cov tuabneeg kws muaj txag npluanuj, mej nrhav nrhw fuab cov tuabneeg pluag tug lug rua mej yuav, hab mej txhua tug puavleej yog tuabneeg dlaag xwb.

¹³Yog le ntawd kuv tub pib ua kuas mej raug puamtsuaj, vim tej kws mej ua txhum ntawd lawm.

¹⁴Mej yuav tau noj tabsis tsi tsau plaab, mej tseem tshaib nqhes. Mej nqaa ntau yaam moog, tabsis mej yuav txuag tsi tau tej ntawd ca; txhua yaam kws mej khaws ca kuv yuav muab ua kuas puamtsuaj taag rua huv tshaav rog.

¹⁵Mej tseb noob nplej, tabsis mej yuav tsi muaj qoobloo sau. Mej tsuam txiv ntoo roj, tabsis mej yuav tsi muaj roj siv. Mej tsuam cawv txiv maab, tabsis mej yuav tsi muaj cawv haus.

¹⁶Tej nuav yuav tshwmsim tuaj, vim mej tau ua phem lawv le Vaajntxwv Aumelis hab nwg tug tub kws yog Vaajntxwv Ahaj ua. Mej xyum ua lawv le ob tug ua, yog le ntawd kuv yuav ua kuas mej raug kev puamtsuaj hab luas yuav thuam mej. Tej tuabneeg kws nyob txhua qhov yuav saib tsi taug mej.”