Read Hmong Njua Mikhas 7 Bible Online

Mikhas 7 - Hmong Njua bible

Mikhas 7

¹Kuv Taag kev ca sab lawm lauj! Kuv zoo ib yaam le tug tuabneeg tshaib plaab kws xawb tsi tau ib lub txiv nyob sau ntoo, hab tsi muaj txiv maab nyob ntawm tej maab dle lug noj le. Txhua rev txiv maab kws qaab hab thawj phaum txiv ncuav pas luas tub muab dle taag lawm.

²Tsi tshuav ib tug tuabneeg ncaaj nceeg nyob huv lub tebchaws hlo le; tsi muaj ib tug tuabneeg kws muab sab npuab Vaajtswv. Txhua tug npaaj rawv tog tua tuabneeg. Txhua tug nyaag nrhw yuav tua nwg tej kwvtij zej zog.

³Puab txhua tug puavleej txawj ua phem. Cov numtswv hab cov txav txim xaav tau luas tej nyaj xab. Tug kws ua zoo neej xaav tau ib yaam dlaabtsi nwg tsaa ncauj has xwb luas yeej tuaj sis txoos ua ke tuav tswvyim lawm ntaag.

⁴Txawm yog tug kws ua zoo hab ua ncaaj tshaaj plawg ntawm puab cov ntawd los tseem zoo le tsob xuavpaug xwb. Tub txug nub kws Vaajtswv yuav txav txim rua cov tuabneeg ntawd lawv le kws nwg tau has kuas cov cevlug kws yog cov tuabneeg faajxwm ceebtoom rua puab lawm. Nwgnuav puab ntxhuv sab heev.

⁵Tsi xob ntseeg koj tej kwvtij zej zog lossis tsi xob ca sab rua koj tej phoojywg. Txawm yog tej lug kws koj has rua koj tug quaspuj los koj yuavtsum tau ceevfaaj.

⁶Lub sijhawm nuav tej tub yuav thuam leej txiv has tas ruag. Tej ntxhais yuav tawmtsaam leej nam hab tej nyaab yuav nrug nam puj sis caav sis tshe; koj cov yeebncuab yog koj tsev tuabneeg ntaag.

⁷Tabsis kuv saib ntsoov tug TSWV; kuv tog rawv Vaajtswv tug kws yuav lug cawm kuas kuv dlim. Kuv tug Vaajtswv yuav noog kuv tej lug thov.

⁸Peb tej yeebncuab tsi muaj lug yuav nyos peb. Peb qaug lawm, tabsis peb yuav sawv tau rov lug dlua. Taamsim nuav peb nyob huv qhov chaw kws tsaus ntuj nti, tabsis tug TSWV yuav ua lub teeb ci rua peb pum kev.

⁹Peb tau ua txhum rua tug TSWV lawm, yog le ntawd peb yuav tau ua sab ntev tiv nwg txujkev chim moog ib nyuas ntu. Tabsis txug thaus kawg nwg yuav tuaj peb tog hab paab dlaws peb tej plaub ntug. Nwg yuav coj peb tawm moog rua ntawm qhov kaaj; peb yuav saib ntsoov nwg cawm peb dlim.

¹⁰Thaus ntawd peb cov yeebncuab yuav pum tej nuav, hab puab yuav poob ntsejmuag heev. Puab yog cov yeebncuab kws nyos peb has tas, “Tug TSWV kws yog mej tug Vaajtswv nyob qhov twg?” Peb yuav saib ntsoov puab swb hab peb yuav pum luas tsuj puab ib yaam le tuabneeg tsuj aav nkus tom tej kev.

¹¹Cov tuabneeg kws nyob huv lub nroog Yeluxalees, tub txug lub sijhawm kws mej rov khu tug ntsaa yeej kws thaiv lub nroog lawm. Thaus ntawd mej lub nroog tej nrim yuav dlaav fo moog ntxiv.

¹²Tej tuabneeg kws tsiv moog nyob rua txhua qhov lawm suavdlawg yuav tau rov lug. Saab nubtuaj, puab yuav lug peg tebchaws Axilias lug; saab qaabteb, puab yuav lug nraag tebchaws Iziv lug. Puab yuav lug ntawm tej tebchaws kws nyob ntawm ntug dlej Efalates lug, lug tim tej havtxwv kws nyob dleb hab sau tej roob kws nyob dleb lug.

¹³Tabsis lub nplajteb yuav ua suabpuam taag rua qhov tuabneeg nplajteb ua phem ua qas.

¹⁴Tug TSWV, koj ca le ua tug tswv yug yaaj saib koj tsaav tuabneeg; puab yog tsaav tuabneeg kws koj tau xaiv tseg lawm. Txawm yog puab nyob ua twmzeej rua tom tej roob mojsaab qhua los nyob puagncig puab tseem muaj tej tebchaws kws zoo qoobloo heev. Thov ca puab moog noj tej zaub kws ntau heev huv lub tebchaws Npasaas hab cheebtsaam Nkile-as ib yaam le puab tau noj yaav thaus u lawm.

¹⁵Tug TSWV, thov koj ua tej txujci tseemceeb rua peb pum ib yaam le koj tau ua thaus koj coj peb tawm nraag tebchaws Iziv lug.

¹⁶Thaus txhua tsaav tuabneeg pum tej nuav yuav ua rua puab sab ntsws puag hab zug ntaug taag. Puab yuav pus qhovncauj hab ntsaws qhovntsej vim puab ntshai heev.

¹⁷Puab yuav nkaag chaub laug huv aav ib yaam le naab; puab yuav ntshai tshee nyo tawm huv puab tej chaw nkaum tuaj. Puab yuav ntshai tshee nyo tig rov qaab lug cuag tug Tswv kws yog peb tug Vaajtswv.

¹⁸Tug TSWV, yeej tsi muaj ib tug Vaajtswv zoo npaum le koj, koj zaam txim rua koj tsaav tuabneeg kws seem rov lug. Koj tsi chim taag ibtxhis, tabsis koj txaus sab hlo hlub peb moog le.

¹⁹Koj yuav rov taabncuab peb dlua ib zag ntxiv. Koj yuav muab peb tej kev txhum tsuj ntag rua huv koj qaab xibtaws hab muab tej kev txhum ntawd moog pov rua huv qaab thu havtxwv.

²⁰Koj yuav ua ncaaj hab hlub koj tsaav tuabneeg kws yog Anplahaas hab Yakhauj cov xeebntxwv, lawv le koj tau coglug rua peb cov yawmkoob thaus u lawm.