Read Hmong Njua Nahus 3 Bible Online

Nahus 3 - Hmong Njua bible

Nahus 3

¹Kev puamtsuaj lug raug lub nroog kws muaj kev dlaag ntxag, kev tua tuabneeg, hab kev npluanuj kws yog moog txhaav hab fuab tau lug.

²Ca le noog tej suab nplawm neeg, tej suab tsheb, tej suab neeg dlha, hab tej suab tsheb neeg ndlog nrov.

³Cov tuabneeg kws caij neeg dlha tuaj nqaa ntaaj nav ci nplaag hab tej muv ntse zuag plag; tuabneeg tuag sis tsub sis nas ua tsheej pawg; muaj tuabneeg tuag suav tsi txheeb, tuabneeg tuaj dlawm tej tuabneeg tuag ntawd qaug.

⁴Nineves kws yog tug namndlav taabtom raug rau txim; tug quaspuj kws zoo nkauj, ua rua ntau leej tuag rua nwg lub tswvyim phem, nwg ntxag ntau tsaav tuabneeg lub sab qaug quas lais rua nwg.

⁵“Tug TSWV kws muaj Fwjchim Luj kawg nkaus has tas, Nineves, kuv yuav rau txim rua koj; kuv yuav muab koj hle labqaab ploog rua txhua tsaav tuabneeg saib, luas yuav pum koj qhov chaw txaajmuag.

⁶Kuv yuav saib koj tsi muaj nqes hab muab txujkev phem kev qas lug qhwv koj. Tej tuabneeg kws pum koj yuav luag koj plig.

⁷Txhua tug kws pum koj yuav fee hlo rua lwm qhov; Puab yuav has tas, ‘Nineves raug puamtsuaj taag lawm lauj! Puas yuav muaj leejtwg hlub tshua nwg hab? Puas yuav muaj leejtwg moog nplig tau nwg sab?’ ”

⁸Nineves, koj tseem zoo tshaajc Thenpes kws yog Iziv lub tuamceeb nroog hab los? Nwg muaj ib tug dlej luj thaiv nwg ib yaam le tug ntsaa yeej thaiv. Tug Dlej Niles yog tug kws thaiv nwg ntaag.

⁹Nineves kaav taagnrho tebchaws Sudaas hab tebchaws Iziv. Nwg lub fwjchim yeej tsi muaj qhov kawg le; Linpias yog ib lub tebchaws kws koom teg nrug nwg hab.

¹⁰Cov tuabneeg huv lub nroog Thenpes raug luas nteg coj moog lawm. Puab tej mivnyuas raug luas ntaus tuag rua txhua txujkev. Luas muab saw hlau khi puab tej thawjcoj hab muab faib rua cov tuabneeg kws tuaj nteg tau puab ntawd caab moog.

¹¹Nineves, koj yuav qaug ib yaam le tug tuabneeg qaug cawv. Koj tseem yuav nrhav kev tsiv kuas dlim ntawm koj cov yeebncuab!

¹²Koj tej chaw faajxwm yuav zoo ib yaam le tej ntoo txiv ncuav pas kws cov txiv sav lawm: Koj tuav tsob ntoo cu ces tej txiv poob lug nkaag koj qhovncauj xwb.

¹³Koj tej tubrog zoo ib yaam le tej quaspuj, koj lub tebchaws txhaj tiv tsi yeej koj tej yeebncuab. Suavtawg yuav kub koj tej nqaaj roojvaag huv tuabsi.

¹⁴Moog nqaa dlej lug npaaj ca, vim luas yuav tuaj vij koj. Hab txhij koj cov tubrog zuv tej chaw faajxwm kuas zoo! Ca le tsuj aav kuas nplaum lug puab ua thwvcib, hab muab tej thwvcib ntawd hlawv kuas tawv.

¹⁵Txawm yog koj yuav ua npaum le caag los xij, koj yuav raug hlawv kub nyab tuag lossis raug tua tuag rua huv tshaav rog. Koj yuav raug luas ntab tsiv moog taag ib yaam le tej qoobloo kws kooj txomfaav muab noj taag lawm. Koj fuamvaam coob ib yaam le kooj txomfaav ntaag.

¹⁶Koj tej tub laag tub luam muaj ntau tshaaj tej nubqub sau nruab ntug! Tabsis nwgnuav puab pluj taag ib yaam le tej kooj txomfaav kws nthuav tis yaa taag lawm.

¹⁷Koj cov numtswv zoo ib yaam tej kooj txomfaav kws lug nyob ntawm ntsaa laajkaab tej nub kws no no ntaag. Tabsis thaus lub nub tawm tuaj zab, puab yaa taag tsi muaj leejtwg paub sov puab yaa moog rua qhov twg lawm!

¹⁸Tug vaajntxwv kws kaav tebchaws Axilias, koj cov tswv xeev tuag taag, hab koj cov numtswv tsaug zug moog ibtxhis. Koj cov pejxeem tsiv ua saab ua sua moog rua sau tej roob; tsi muaj leejtwg coj puab rov qaab lug tsev le lawm.

¹⁹Tsi muaj tshuaj khu koj tej qhov txhaab, hab koj tej qhov txhaab los yuav tsi txawj zoo. Txhua tug kws nov txug koj tej kev puamtsuaj, puab yuav luag npuaj teg zoo sab heev. Puas muaj leejtwg tsiv dlim koj txujkev ua limham kws tsi paub kawg le?