Read Hmong Njua Hanpakus 1 Bible Online

Hanpakus 1 - Hmong Njua bible

Hanpakus 1

¹Ntawm nuav yog tug TSWV tej lug kws has rua Hanpakus kws yog tug cev Vaajtswv lug.

²Tug TSWV, kuv yuav thov koj ntev npaum le caag, koj maam le noog hab cawm kuas peb dlim ntawm txujkev ua limham?

³Vim le caag koj ca kuv pum tej kev txomnyem nyuaj sab nuav? Ua caag koj sawv tuabywv saib tej kev txhum ntawd xwb? Muaj kev puamtsuaj hab kev yuam cai nyob puagncig kuv, muaj kev sis ntaus sis tua hab kev sis caav sis tshe nyob txhua qhov.

⁴Txuj kevcai tsi tseemceeb hab tsi muaj qaabhau lawm, tsi muaj tuabneeg ua ncaaj ua nceeg. Cov tuabneeg sab phem quab yuam cov tuabneeg ncaaj nceeg, txujkev phem txhaj muab txujkev ncaaj nceeg npug taag lawm.

⁵Tug TSWV has rua nwg tsaav tuabneeg tas, “Mej ca le tsaa qhovmuag saib txhua tsaav tuabneeg kws nyob puagncig mej, hab tej kws mej pum yuav ua rua mej xaav tsi thoob. Kuv yuav ua tej yaam tshwm kuas thaus mej nov tej ntawd, mej yuav tsi ntseeg.

⁶Kuv yuav tsaa cov tuabneeg Npanpiloos kws muaj lub sab ceev, hab muaj lub sab nruj tsiv kws muaj fwjchim. Puab taabtom tawm tuaj moog kuas thoob lub nplajteb hab yuav txeeb luas lwm lub tebchaws kaav.

⁷Puab tso hemthawj kuas suavdlawg txhawj hab ntshai, hab puab khaavtheeb, puab tsi yuav leejtwg txuj cai, puab yuav puab txuj cai nkaus xwb.

⁸“Puab tej neeg dlha ceev dlua tsuv pomtxwv hab nyaum tshaaj tej maa kws tshaib plaab. Puab cov tubrog caij neeg dlha raag ntwg ceev heev ntawm tej tebchaws kws nyob dleb tuaj. Puab dlha ceev heev tuaj ib yaam le tug dlaav yaa rwg si lug muab qab.

⁹“Puab cov tubrog tuaj txeeb tebchaws kaav ua limham ntsuav, hab thaus puab tuaj txug, puab ua rua txhua tug ntshai tshee nyo. Cov tuabneeg kws puab nteg tau mas coob npaum le tej xuabzeb suav tsi txheeb.

¹⁰Puab saib tsi taug cov vaajntxwv, hab luag cov numtswv luj plig ua tsuj ua tsaug. Tsi muaj ib lub yeej twg kws yuav tiv thaiv tau puab, puab khawb aav lug meem kuas sab hab txeeb kuas tau lub nroog ntawd.

¹¹Puab txeeb tau lub nroog twg, puab dlhau plawg moog ib yaam le nthwv cua ntsawj ib vuag xwb. Cov tuabneeg nuav muab puab lub fwjchim saib hlub ib yaam le yog puab tug vaajtswv ntaag.”

¹²Tug TSWV, koj yeej yog Vaajtswv tug kws nyob thaus u lug lawm. Koj yog kuv tug Vaajtswv, tug dlawbhuv hab nyob moog ibtxhis. Tug TSWV yog kuv tug Vaajtswv hab yog tug tsomkwm kuv, koj tau xaiv cov tuabneeg Npanpiloos hab pub puab muaj fwjchim luj, kuas puab rau txim tau rua peb.

¹³Ua le caag koj tseem tseg cov tuabneeg ua phem ua qas ntawd ca? Koj ob lub qhovmuag dlawbhuv heev, saib tsi taug tej kev phem kev qas, hab koj yeej tsi kaam sawv taabmeeg cov tuabneeg txhum ntawd le. Tabsis yog vim le caag thaus cov tuabneeg phem tuaj muab cov tuabneeg ncaaj nceeg tua povtseg taag lawm, koj nyob ntsag tu tsi quavntsej le?

¹⁴Yog le caag koj saib tuabneeg zoo ib yaam le tej ntseg huv havtxwv lossis tej kaab tej ntsaum kws tsi muaj tug kaav hab coj puab kev le xwb?

¹⁵Cov Npanpiloos tuaj nteg tuabneeg hab muab nuv ntseg chob ib yaam le tej tuabneeg ntawd yog ntseg. Puab muab vaag khwb cov tuabneeg ntawd caab hab luag qw ua tsuj ua tsaug zoo sab kawg rua cov tuabneeg kws puab nteg tau ntawd.

¹⁶Puab pe puab tej vaag hab tua tsaj fij rua tej vaag ntawd, rua qhov puab tej vaag ntawd ua rua puab npluanuj heev.

¹⁷Puas yog puab yuav siv puab tej ntaaj tua kuas ntau lub tebchaws raug puamtsuaj moog tsi muaj kev hlub le?