Read Hmong Njua Hanpakus 3 Bible Online

Hanpakus 3 - Hmong Njua bible

Hanpakus 3

¹Ntawm nuav yog tug cevlug Hanpakus tej lug thov Vaajtswv.

²Tug TSWV, kuv tau nov txug tej kws koj tau ua taag lug, hab ua rua kuv ntshai kawg nkaus le. Nwgnuav thov koj rov qaab ua koj teg num tseemceeb kws thaus u koj tub ua lawm rua peb tam kws tseem ua neej nyob nuav pum dlua! Txawm yog thaus koj chim heev los thov koj hlub tshua txug peb hab.

³Vaajtswv yuav tuaj huv lub tebchaws Edoos tuaj dlua; Vaajtswv tug kws dlawbhuv taabtom rov sau tej hauv roob Palaas lug. Nwg lub fwjchim ci ntsaa ab plooj nkaus sau nruab ntug hab tuabneeg thoob nplajteb puavleej ua nwg tsaug.

⁴Thaus nwg lug, nwg tug tshwjchim ci ntsaa ab cuag tsaglig xub; muaj nplaim tawg ci laim lag ntawm nwg txhais teg, qhov ntawd yog qhov chaw kws nwg zais nwg lub fwjchim.

⁵Nwg tso tej kaab mob moog ua nwg ntej hab kuas kev tuag lawv nwg qaab.

⁶Thaus kws nwg nreg, lub nplajteb cu ua zug koog; thaus nwg laaj muag saib txhua tsaav tuabneeg ntshai tshee nyo. Tej roob kws ibtxwm nyob thaus u lug cu ua zug koog; tej ncov roob kws ibtxwm muaj nyob los saus pis zog pluj taag lawm; tej ncov roob ntawd yog tej kws thaus u nwg ibtxwm hlaa lug moog.

⁷Kuv pum cov tuabneeg Kusaas ntshai kawg nkaus le hab cov tuabneeg Midias mas ntshai ua ib ce tshee nyo.

⁸Tug TSWV, puas yog tej dlej ntawd ua rua koj chim? Puas yog dlej havtxwv ua rua koj npautawg? Koj nyob rawv sau tej fuab dlawb; tauv fuab dlub yog koj lub tsheb, koj tuaj paab koj tsaav tuabneeg kuas muaj yeej.

⁹Koj npaaj rawv yuav tua koj raab neevnti tuaj, hab npaaj rawv koj xibxub vug tua tuaj lawm xwb. Koj ua tsaglig xub tua lub nplajteb tawg rhe.

¹⁰Thaus tej roob pum koj, puab ntshai tshee ua zug koog; dlej nchuav laub lug sau nruab ntug lug. tej dlej kws nyob huv qaab tivtxwv aav nyooj lawg tuaj, hab npau tej nam twv sab kawg nkaus le.

¹¹Thaus koj tej xub vug yaa ua dluab ci nplaag ceev heev tuaj hab koj tej muv yaa ua dluab ci hob tuaj lawm, lub nub hab lub hli txawm nreg nkaus rua ntawm nwg qhov chaw.

¹²Koj rhais ruam hlaa lub nplajteb ua tug chim nyov tuaj; hab koj tsuj ntag txhua tsaav tuabneeg ua tug npautawg vog.

¹³Koj tuaj cawm koj tsaav tuabneeg hab cawm tug vaajntxwv kws koj xaiv tseg lawm. Koj muab cov tuabneeg ua phem tug thawj tua povtseg, hab muab cov tuabneeg kws tuaj nwg tog tua tu noob nrho.

¹⁴Koj tua tej xub vug tuaj ntsa nkaus nwg tug thawj tubrog; thaus nwg paab tubrog tuaj ib yaam le nthwv naag xub naag cua ntsawj peb tawg ua saab ua sua ib yaam le cov tuabneeg kws soj rawv yuav tsimtxom cov tuabneeg pluag.

¹⁵Koj cov neeg txauj dlej havtxwv hab havtxwv txawm ndlaas nphau pis nphwv tuaj.

¹⁶Thaus kuv nov tej xwm nuav, kuv ntshai tshee nyo; kuv dlaim tawv ncauj tshee mog nyoos vim kuv ntshai heev. Kuv ib ce tuag taag hab kuv ob txhais kutaw sis dlawm kuv txhaj qaug. Kuv yuav nyob ntsag tu tog txug thaus lub sijhawm kws Vaajtswv lug rau txim rua cov tuabneeg kws tawmtsaam peb tsaiv.

¹⁷Txawm yog tej ntoo txiv ncuav pas tsi tawg paaj, hab tej txiv maab tsi txi txiv, txawm yog tej ntoo roj txiv zeeg taag, hab tej laj teb qoobloo tsi tuaj; txawm yog tej yaaj tuag taag hab tej nkuaj nyug khoob lug ca xwb los

¹⁸kuv tseem muaj kev zoo sab, hab txaus sab, vim muaj tug TSWV kws yog Vaajtswv ua kuv tug Cawmseej.

¹⁹Tug TSWV kws kaav ib puas tsaav yaam pub rua kuv muaj zug. Nwg ua rua kuv ob txhais kutaw moog kev nplaum ib yaam le tug sai, hab nwg tsomkwm kuv kaaj sab lug sau tej laaj roob.