Read Hmong Njua Xefaniyas 3 Bible Online

Xefaniyas 3 - Hmong Njua bible

Xefaniyas 3

¹Yeluxalees raug kev puamtsuaj vim ua tsi ncaaj, ntxeev sab hab tsimtxom nwg cov tuabneeg.

²Nwg yeej tsi noog tug TSWV tej lug lossis tsi yuav tug TSWV tej lug ntuag. Nwg tsi ca sab rua tug TSWV lossis tsi thov tug TSWV paab.

³Nwg cov numtswv zoo ib yaam le cov tsuv ntxhuav kws nyooj lawg xwb; nwg cov txav txim zoo ib yaam le cov maa kws tshaib plaab heev, noj ntau hab tsi tseg ib nyuas pobtxhaa seem ca rua taagkig le.

⁴Cov cev Vaajtswv lug tsi muab sab rau ua puab tej num tabsis ntxag noj ntxag haus nkaus xwb; cov povthawj ua rua qhov chaw dlawbhuv tsi tseemceeb lawm hab hloov Vaajtswv txuj Kevcai lawv le puab lub sab nyam.

⁵Tabsis tug TSWV tseem nyob huv lub nroog; nwg ncaaj nceeg hab tsi ua txhum le. Nwg ua ncaaj nceeg rua nwg tsaav tuabneeg txhua taagkig tsi tu ncua le. Txawm le ntawd los cov tuabneeg tsi ncaaj nceeg tseem ua txhum qeeg tsi paub txaajmuag le.

⁶Tug TSWV has tas, kuv tub coj txhua tsaav tuabneeg moog taag huv tuabsi lawm; kuv tub muab puab tej nroog rhuav puamtsuaj taag, tseg puab tej ntsaa loog hab tej chaw tsomfaaj tawg ntsoog ntxawg ca lawm xwb. Tej nroog ua suabpuam taag, hab tej kev nphob xuav tsi muaj leejtwg taug le.

⁷Kuv xaav has tas kuv tsaav tuabneeg yuav fwm kuv hab yuav noog kuv tej lug ntuag, hab puab yuav ncu qaab ntsoov tej lug kws kuv qha rua puab. Tabsis tsi ntev xwb puab tseem ua phem tshaaj le kws puab ibtxwm ua taag lug lawm.

⁸Tug TSWV has tas, “Mej tog mivntsiv, tog txug nub kws kuv txav txim rua txhua tsaav tuabneeg tsaiv. Kuv yeej txav txim sab yuav sau txhua tsaav tuabneeg hab txhua lub tebchaws lug nyob ua ke hab yuav muab kuv txujkev chim laub rua puab. Thoob plawg lub nplajteb yuav raug kev puamtsuaj taag lug ntawm cov suavtawg kws yog kuv txujkev chim.

⁹“Ces kuv yuav muab txhua tsaav tuabneeg hloov hab puab yuav pehawm kuv tuab leeg xwb tsi pe lwm tug vaajtswv le lawm. Puab txhua tug yuav noog kuv lug.

¹⁰Txawm yog kuv tsaav tuabneeg kws tawg ua saab ua sua moog nyob dleb rua nraag tebchaws Sudaas lawm los puab yeej yuav coj khoom tuaj fij rua kuv.

¹¹Thaus txug lub sijhawm ntawd mej cov kws yog kuv tsaav tuabneeg yuav tsi txaajmuag rua tej kws mej tau ntxeev sab tawmtsaam kuv lawm. Kuv yuav muab txhua tug tuabneeg khaavtheeb hab muaj plhus tshem tawm kuas taag hab mej yuav tsi ntxeev sab rua kuv sau kuv lub Roob Dlawbhuv ib zag ntxiv le lawm.

¹²Kuv yuav ca cov tuabneeg txu fwjchim hab cov tuabneeg txomnyem nrug mej nyob, puab txhaj yuav tuaj thov kuv paab puab.

¹³Cov Yixalayees kws seem yuav tsi ua txhum rua leejtwg, tsi has lug dlaag lossis dlaag ntxag lwm tug. Puab yuav vaammeej hab ua neej nyob kaaj sab lug tsi ntshai leejtwg le.”

¹⁴Cov Yixalayees, ca le hu nkauj hab qw zoo sab! Lub nroog Yeluxalees, ca le zoo sab kuas kawg koj lub sab lub ntsws!

¹⁵Tug TSWV tub tseg tsi rau txim rua koj lawm; nwg tub muab koj cov yeebncuab tshem tawm taag huv tuabsi lawm; Tug TSWV kws yog cov Yixalayees tug Vaajtswv yeej nrug nraim koj nyob; nwgnuav tsi xob ntshai tej kev puamtsuaj ib yaam dlaabtsi hlo le lawm.

¹⁶Thaus txug lub sijhawm ntawd puab yuav has rua lub nroog Yeluxalees tas, “Lub Nroog Xi-oos, koj tsi xob ntshai! Tsi xob ca koj ob txhais teg tsaug leeg hlo le!

¹⁷Tug TSWV kws yog mej tug Vaajtswv yeej nrug nraim mej nyob; nwg lub fwjchim ua rua mej kovyeej lawm! tug TSWV yuav txaus sab kawg rua mej vim nwg txujkev hlub, nwg yuav pub mej muaj lub neej tshab. Nwg yuav hu nkauj hab zoo sab heev rua mej,

¹⁸ib yaam le cov tuabneeg kws zoo sab rua rooj noj rooj haus.” Tug TSWV has tas, “Kuv tub tshem txujkev puamtsuaj tawm ntawm mej, hab tub tshem mej txujkev txaajmuag tawm huv tuabsi lawm.

¹⁹Taabtom txug sijhawm lawm lauj! kuv yuav rau txim rua cov tuabneeg kws tsimtxom mej; kuv yuav cawm txhua tug kws cegtawv hab yuav coj cov tuabneeg kws raug nteg rov lug tsev; kuv yuav muab puab txujkev txaajmuag hloov ua kev tau ntsejmuag, hab txhua tsaav tuabneeg huv nplajteb yuav qhuas puab.

²⁰Taabtom txug sijhawm lawm lauj! kuv yuav coj mej cov kws tawg moog nyob ua saab ua sua rov lug tsev; kuv yuav ua kuas mej lub koob lub npe nrov nchaa moo lug moog thoob nplajteb; hab kuv yuav ua kuas mej rov muaj kev vaammeej dlua ib zag ntxiv.” Tug TSWV yog tug kws has tej lug nuav.