Read Hmong Njua Hakais 1 Bible Online

Hakais 1 - Hmong Njua bible

Hakais 1

¹Thaus Fuabtais Dali-us kaav tebchaws Pawxias tau ob xyoos lawm, lub rau hli ntuj nub xab ib tug TSWV lug has rua Hakais kws yog tug cev Vaajtswv lug. Tug TSWV cov lug yog has rua Se-atiyees tug tub Xelunpanpees kws ua tswv xeev kaav lub xeev Yudas, hab has rua tug Povthawj Hlub Yausuas kws yog Yehauxadas tug tub.

²Tug TSWV kws muaj Fwjchim Luj kawg nkaus has rua Hakais tas, “Cov tuabneeg suavdlawg has tas, lub sijhawm nuav tseem tsi tau yog lub caij kws yuav txhim khu lub Tuamtsev.”

³Yog le ntawd tug TSWV txhaj muab cov lug nuav rua Hakais kws yog tug cev Vaajtswv lug kuas moog has rua cov tuabneeg suavdlawg tas,

⁴“Kuv tsaav tuabneeg, vim le caag mej tub nyob tej tsev zoo zoo lawm, tabsis kuv lub Tuamtsev pob puag taag le?”

⁵Mej puas pum tej xwmtxheej kws taabtom yuav lug raug mej?

⁶Mej cog qoob ntau, tabsis mej sau tau tsawg. Mej muaj zaub mov noj, tabsis tsi tsau. Mej muaj cawv txiv maab haus, tabsis tsi qaug! Mej muaj rig tsho naav, tabsis tsi suv. Tej tuabneeg kws ua num tau nyaj los tsi txaus siv.

⁷Mej puas pum has tas, yog vim le caag txhaj muaj tej xwmtxheej nuav lug raug mej?

⁸Mej ca le moog peg tej roob hab txav ntoo lug khu lub Tuamtsev; kuv txhaj yuav txaus sab, hab tuabneeg txhaj tau chaw tuaj pehawm kuv kuas tsimnyog.

⁹“Mej ca sab has tas yuav sau tau qoobloo ntau, tabsis mej sau tau tsawg kawg le. Hab thaus mej coj tej qoobloo lug rua huv tsev, kuv yuav muab tshuab kuas yaa taag. Vim le caag kuv txhaj ua le ntawd? Rua qhov thaus kuv lub Tuamtsev pob puag taag, mej txhua tug nyag rau sab ntso ua nyag lub tsev nkaus xwb.

¹⁰Tub yog vim le ntawd lub ntuj txhaj tsi muaj naag lug, hab lub nplajteb tsi pub kuas mej tej qoobloo tuaj taug le.

¹¹Kuv tso ntuj qhua teb nkig lug rua lub tebchaws, sau tej roob, tej teb npleg, teb txiv maab, hab teb txiv ntoo roj, txhua yaam qoobloo kws tuaj huv aav, tuabneeg hab tsaj txhu hab txhua yaam kws mej cog ntawd huv tuabsi.”

¹²Xelunpanpees, Yausuas hab taagnrho cov tuabneeg kws raug luas nteg moog hab tau rov qaab tim tebchaws Npanpiloos lug, tau ua lawv le tug TSWV kws yog puab tug Vaajtswv tej lug. Puab ntshai hab fwm tug cevlug Hakais kws yog tug TSWV tug tubkhai kawg le.

¹³Hakais txhaj qha tug TSWV tej lug rua cov pejxeem le nuav has tas: “Kuv yuav nrug nraim mej nyob, ntawm nuav yog kuv tej lug cog tseg rua mej.”

¹⁴Tug TSWV tshoov Xelunpanpees kws yog tug tswv xeev kws kaav lub xeev Yudas, Yausuas kws yog tug Povthawj Hlub, hab taagnrho cov tuabneeg kws raug luas nteg moog, hab tau rov qaab lug sab, kuas puab txhua tug txhim khu lub Tuamtsev. Puab txhaj pib txhim khu tug TSWV kws yog puab tug Vaajtswv kws muaj Fwjchim Luj kawg nkaus lub Tuamtsev,

¹⁵thaus lub rau hli ntuj nub neeg nkaum plaub kws Dali-us ua fuabtais kaav lub tebchaws tau ob xyoos lawm.