Read Hmong Njua Hakais 2 Bible Online

Hakais 2 - Hmong Njua bible

Hakais 2

¹Lub xyaa hli ntuj nub neeg nkaum ib kws yog tuab lub xyoos ntawd, tug TSWV has rua Hakais kws yog tug cev Vaajtswv lug dlua ib zag ntxiv.

²Tug TSWV kuas Hakais moog has rua Xelunpanpees kws yog tug tswv xeev kws kaav lub xeev Yudas, has rua Yausuas kws yog tug Povthawj Hlub, hab has rua cov pejxeem suavdlawg tas,

³“Mej puas muaj leejtwg ncu tau has tas lub Tuamtsev thaus u zoo npaum le caag? Nwgnuav mej saib zoo le caag lawm? Mej saib lub Tuamtsev zoo le tsi tseemceeb le lawm.

⁴Tabsis nwgnuav mej txhua tug tsi xob qaug zug. Mej ca le rau sab ntso ua num, rua qhov kuv nrug nraim mej nyob.

⁵Thaus mej tsiv nraag tebchaws Iziv lug, kuv tau coglug rua mej has tas, kuv yuav nrug nraim mej nyob. Yog le ntawd kuv tseem nrug nraim mej nyob, mej tsi xob ntshai.

⁶“Tshuav tsi ntev kuv yuav cu lub ntuj hab lub nplajteb, thooj aav hab dlej havtxwv.

⁷Kuv yuav rhuav txhua tsaav tuabneeg, hab yuav coj puab tej nyaj tej kub lug tso rua ntawm nuav, kuas lub Tuamtsev txhaj muaj nyaj puv nkaus.

⁸Tej nyaj hab tej kub kws nyob huv nplajteb nuav puavleej yog kuv le huv tuabsi.

⁹Lub Tuamtsev tshab nuav yuav zoo tshaaj lub qub thaus u, kuv yuav pub kuas kuv tsaav tuabneeg muaj kev vaammeej hab nyob kaaj sab lug qhov ntawd.” Tug TSWV kws muaj Fwjchim Luj kawg nkaus yog tug has le ntawd.

¹⁰Thaus lub cuaj hlis ntuj nub neeg nkaum plaub kws Dali-us ua fuabtais kaav tebchaws tau ob xyoos lawm, tug TSWV kws muaj Fwjchim Luj kawg nkaus rov lug has rua Hakais kws yog tug cev Vaajtswv lug dlua ib zag ntxiv.

¹¹Tug TSWV has tas, “Koj ca le nug cov povthawj lawv le tej kev tswjfwm nuav:

¹²Yog has tas leejtwg muab ib thooj nqaj kws tub muab fij theej txhoj lawm, ntsaws rua huv nwg lub nqaws tsho ntev nqaa tawm moog, hab yog has tas nwg lub tsho ntawd chwv tej ncuav, tej zaub mov, tej cawv txiv maab, tej txiv ntoo roj, lossis txhua yaam khoom noj, puas yuav ua rua tej khoom ntawd dlawbhuv lawm?” Thaus kws tug cev Vaajtswv lug nug le ntawd taag lawm, cov povthawj teb has tas, “Yeej tsi huv le.”

¹³Ces Hakais nug has tas, “Yog muaj ib tug tuabneeg twg ua rua nwg tsi huv vim nwg moog kov tug tuabneeg tuag lawm, hab nwg tsua lug kov tej zaub mov nuav, puas yuav ua rua tej zaub mov ntawd tsi huv hab?” Cov povthawj teb has tas, “Yog tag, yeej ua rua tej zaub mov ntawd tsi huv lawm.”

¹⁴Hakais has tas, “Tug TSWV has tas, saav tuabneeg kws nyob huv lub tebchaws nuav hab txhua yaam kws cov tuabneeg nuav khwv tau lug zoo ib yaam le ntawd; hab txhua yaam kws puab muab fij rua sau lub thaaj yeej tsi huv lawm.”

¹⁵Tug TSWV has tas, “Mej puas pum tej xwmtxheej kws muaj lug raug mej, ua ntej kws mej pib txhim khu lub Tuamtsev?

¹⁶Mej yuav moog rua ntawm lub txhaab nplej, ca sab has tas, yuav yawm tau neeg nkaum kawm nplej, tabsis tsuas yawm tau kaum kawm xwb. Mej yuav moog rua ntawm qhov chaw tsuam txiv maab, dlaus kuas tau tsib caug thoob kua txiv maab, tabsis mej tsuas dlaus tau neeg nkaum thoob xwb.

¹⁷Kuv tso cua nplawm hab tso lawg lug ntaus txhua yaam kws mej cog kuas puamtsuaj taag. Txawm le ntawd los mej tseem tsi tau tso mej lub sab qub tseg le hab.

¹⁸Nub nua, yog nub neeg nkaum plaub lub cuaj hli ntuj, yog nub kws pua tau lub plaag Tuamtsev tav log lawm. Mej sim saib txij nuav moog yuav muaj dlaabtsi tshwmsim tuaj?

¹⁹Txawm yog tsi tshuav nplej, tsi tshuav txiv maab, tsi tshuav txiv ncuav pas, tsi tshuav txiv ntsab pobkws hab tsi tau txug caij txi txiv ntoo roj los txij nuav moog kuv yeej yuav foom koob koov rua mej.”

²⁰Nub neeg nkaum plaub lub hlis ntawd, tug TSWV rov has rua Hakais dlua zag ob,

²¹kuas nwg moog has rua Xelunpanpees kws yog tug tswv xeev kws kaav lub xeev Yudas has tas, “Kuv taabtom yuav cu lub ntuj hab lub nplajteb,

²²hab muab txhua lub zwmtxwv ntawm txhua lub tebchaws ntxeev hab txu puab tej fwjchim. Kuv yuav muab puab tej tsheb neeg hab cov tuabneeg kws tsaav tsheb neeg ntxeev; tej neeg yuav tuag taag hab puab cov tuabneeg kws caij neeg ib leeg yuav tig tua ib leeg kuas tuag taag.

²³Xelunpanpees kws yog kuv tug tubkhai, nub ntawd kuv yuav coj koj moog hab kuv yuav tsaa koj tuav kuv lub npe kaav tebchaws. Koj yog tug kws kuv xaiv tseg lawm.” Tug TSWV kws muaj Fwjchim Luj kawg nkaus yog tug has tej lug nuav.