Read Hmong Njua Xakaliyas 1 Bible Online

Xakaliyas 1 - Hmong Njua bible

Xakaliyas 1

¹Xyoo ob thaus lub yim hli ntuj kws Dali-us ua fuabtais kaav tebchaws Pawxias, tug TSWV tau has cov lug nuav rua Xakaliyas kws yog tug cev Vaajtswv lug kws yog Npelekiyas tug tub, hab yog Idaus tug xeebntxwv.

²Tug TSWV kws muaj Fwjchim Luj kawg nkaus has rua Xakaliyas kuas moog has rua cov tuabneeg tas, “Kuv kws yog tug TSWV chim heev rua mej cov yawmkoob,

³tabsis nwgnuav kuv has rua mej tas, ‘Mej ca le rov lug cuag kuv, hab kuv yuav rov lug cuag mej.

⁴Tsi xob ua le mej cov yawmkoob ua taag lug lawm. Yaav thaus u cov cevlug tau muab kuv tej lug coj moog pav qha puab, kuas puab tsi xob ua kev phem kev qas, ca le tso lub neej kws ua kev txhum tseg. Tabsis puab tsi noog lossis tsi quavntsej kuv tej lug le.

⁵Mej cov yawmkoob hab cov cev Vaajtswv lug ntawd txhaj tsi muaj sa nyob taag lawm.

⁶Kuv tej lug hab tej kevcai, kuv tub qha rua kuv cov tubkhai kws yog cov cevlug lawm, puab tseem tsi tau muab qha rua mej cov yawmkoob hab los? Yog le ntawd, puab txhaj leeg txim has tas, tug TSWV kws muaj Fwjchim Luj kawg nkaus txav txim rua peb lawv le tej kws peb tau ua, hab yeej tsimnyog peb raug lawv le tug TSWV tau npaaj sab lawm.’ ”

⁷Xyoo ob thaus lub kaum ib hlis ntuj, (yog lub hli Senpas) nub neeg nkaum plaub kws Dali-us ua fuabtais kaav tebchaws ntawd. Muaj ib mos kuv ua ywgtoog pum tug TSWV lug has ib cov lug rua kuv,

⁸Kuv pum tug TSWV ib tug timtswv caij rawv ib tug txiv neeg lab. Nwg txawm lug nreg rua ntawm ib koog ntoo miles kws nyob huv ib lub haav, hab nyob tom nwg qaab muaj dlua ib cov neeg lab, neeg txaij hab neeg dlawb.

⁹Kuv nug nwg has tas, “Tug tswv, cov neeg nuav yog pev txug dlaabtsi?” Nwg teb has tas, “Kuv yuav qha rua koj saib cov neeg nuav yog pev txug dlaabtsi.

¹⁰Tug TSWV tso cov neeg ntawd tuaj tshuaj lub nplajteb.”

¹¹Cov neeg ntawd txawm rov lug tshaab xu rua tug timtswv ceebtsheej has tas: “Peb tau moog ncig thoob plawg lub nplajteb, peb pum lub nplajteb nyob ntsag tu hab tsi muaj leejtwg paab le.”

¹²Ces tug timtswv ceebtsheej has tas, “Tug TSWV kws muaj Fwjchim Luj kawg nkaus, koj yeej chim rua lub nroog Yeluxalees hab tej nroog huv tebchaws Yudas lug tau xyaa caum xyoo nuav lawm. Tseem tshuav ntev le caag koj txhaj le yuav hlub hab taabncuab puab?”

¹³Tug TSWV teb ib cov lug nplig sab rua tug timtswv ceebtsheej ntawd,

¹⁴hab tug timtswv ceebtsheej has kuas kuv ca le qha lawv le tug TSWV kws muaj Fwjchim Luj kawg nkaus tej lug kws has tas, “Kuv yeej hlub tshua Yeluxalees kws yog kuv lub nroog dlawbhuv,

¹⁵hab kuv chim kawg nkaus rua txhua tsaav tuabneeg kws muaj kev zoo sab nyob ntsag tu hab muaj kev thaajyeeb lug ntawd. Thaus kuv thim kuv txujkev chim lug rua kuv tsaav tuabneeg ib nyuas ntu ntawd, txhua tsaav tuabneeg ua rua kuv tsaav tuabneeg raug txomnyem kawg le lawm.

¹⁶Yog le ntawd, kuv txhaj rov lug rua huv lub nroog Yeluxalees hab qha kuv txujkev hlub rua lub nroog ntawd. Kuv yuav rov txhim khu lub Tuamtsev dlua tshab, hab yuav rov txhim khu lub nroog kuas zoo.”

¹⁷Tug timtswv ceebtsheej tseem kuas kuv qha ntxiv has tas: “Tug TSWV kws muaj Fwjchim Luj kawg nkaus has tas, nwg tej nroog yuav rov vaammeej dlua, nwg yuav paab lub nroog Yeluxalees dlua ib zag ntxiv hab hu has tas yog nwg lub nroog.”

¹⁸Muaj dlua ib zaaj ywgtoog kws kuv pum plaub tug kub nyuj.

¹⁹Kuv txawm nug tug timtswv ceebtsheej kws nrug kuv thaam ntawd has tas, “Cov kub nyuj nuav pev txug dlaabtsi?” Nwg teb kuv has tas, “Cov kub nyuj nuav pev txug tej tebchaws kws muaj fwjchim huv lub nplajteb kws tau muab cov Yudas, cov Yixalayees hab cov tuabneeg huv lub nroog Yeluxalees lawv tsiv ri sua rua nuav rua u.”

²⁰Ces tug TSWV coj kuv moog saib plaub tug tuabneeg ua num kws ib leeg tuav rawv ib raab rauj.

²¹Kuv nug has tas, “Cov txivneej nuav taabtom tuaj ua dlaabtsi?” Nwg teb has tas, “Puab tuaj hem hab ntaus txhua tsaav tuabneeg kws tuaj muab lub tebchaws Yudas tsuj puamtsuaj taag, hab muab cov Yudas lawv tsiv moog nyob ua saab ua sua lawm.”