Read Hmong Njua Xakaliyas 11 Bible Online

Xakaliyas 11 - Hmong Njua bible

Xakaliyas 11

¹Lenpanoos, ca le qheb koj lub qhovrooj, suavtawg txhaj yuav kub koj tej ntoo cab!

²Cov ntoo thuv, ca le quaj ntsuag rua qhov tej ntoo cab tub qaug taag lawm; tej ntoo kws muaj meejmom tub raug rhuav puamtsuaj taag lawm! Tej ntoo qheb huv tebchaws Npasaas, ca le quaj ntsuag, tej roob ntoo kws tsaus nti tub raug luas muab ntuv qaug taag lawm!

³Cov numtswv tsaa suab hlo quaj tu sab kawg le; puab tej meejmom tub poob taag! Ca le noog tsuv ntxhuav tej suab nyooj; thaaj zoov kws yog puab qhov chaw nkaum nyob lawv tug dlej Yauladees raug puamtsuaj taag lawm!

⁴Tug TSWV kws yog kuv tug Vaajtswv has rua kuv tas, “Koj ca le ua yaam le koj yog ib tug yug yaaj kws zuv rawv ib paab yaaj kws taabtom raug luas coj moog tua.

⁵Cov tswv muab cov yaaj tua hab rov moog tsev tsi raug txim dlaabtsi. Puab muab cov nqaj coj moog muag hab has tas, ‘Ua tug TSWV tsaug! Peb npluanuj heev!’ Txawm yog puab yog cov tswv yaaj los puab tub tsi taabncuab cov yaaj.”

⁶(Tug TSWV has tas, “Kuv yuav tsi hlub ib tug tuabneeg twg nyob huv nplajteb nuav ntxiv lawm. Kuv yuav muab txhua tsaav tuabneeg cob rua puab cov numtswv teg. Cov numtswv nuav yuav rhuav lub nplajteb, hab kuv yuav tsi cawm lub nplajteb kuas dlim ntawm puab lub fwjchim le.”)

⁷Cov tuabneeg muag yaaj hab cov yuav yaaj ndlav kuv ua tug yug cov yaaj kws yuav coj moog tua. Kuv muab tau ob tug paas ntoo lug: muaj ib tug kuv tis npe hu ua “Nyam” hab muaj dlua ib tug kuv tis npe hu ua “Koom ua ke”. Hab kuv ua tug tu paab yaaj ntawd.

⁸Kuv txawm ua tsi taug sab ntev rua peb tug yug yaaj kws pheej ntxub kuv, kuv txhaj ua rua puab peb tug ntawd raug puamtsuaj taag huv tuabsi rua tuab lub hlis nkaus xwb.

⁹Ces kuv has rua cov yaaj tas, “Kuv yuav tsi ua mej tug yug yaaj ntxiv lawm. Ca cov tuabneeg kws yuav tuag, tuag moog. Ca cov tuabneeg kws yuav puamtsuaj, raug puamtsuaj moog. Ca cov tuabneeg kws seem ib leeg ua kuas ib leeg raug puamtsuaj huv tuabsi hab.”

¹⁰Ces kuv txawm muab tug paas ntoo kws hu ua “Nyam” lug, hab muab luv; kuas rhuav tug TSWV tej lug kws tau cog tseg rua ntau tsaav tuabneeg lawm.

¹¹Yog le ntawd, tug TSWV tej lug cog tseg txhaj raug muab rhuav nub ntawd lawm. Cov tuabneeg kws muag yaaj hab cov yuav yaaj puavleej tsaa qhovmuag saib kuv, hab puab paub has tas yog tug TSWV has rua kuv txug tej kws kuv ua ntawd ntaag.

¹²Kuv has rua puab tas, “Yog mej txaus sab, mej ca le them kuv tej nqe zug rua kuv. Tabsis yog mej tsi txaus sab, mej muab khaws ca los tau.” Ces puab txhaj muab tau peb caug dlaim nyaj lug them kuv.

¹³Tug TSWV has rua kuv tas, “Koj ca le coj cov nyaj ko moog tso rua huv qhov chaw ca nyaj huv lub Tuamtsev.” Yog le ntawd, kuv txhaj coj peb caug dlaim nyaj kws puab muab ua nqe zug rua kuv ntawd moog tso rua huv lub chaw ca nyaj huv lub Tuamtsev lawm.

¹⁴Ces kuv muab tug paas ntoo kws hu ua “Koom ua ke” luv hab ua rua cov Yudas hab cov Yixalayees tawg nyob tsi tau ua ke.

¹⁵Ces tug TSWV has rua kuv tas, “Koj ca le rov qaab ua ib yaam le koj yog ib tug yug yaaj, hab zag nuav koj ua ib yaam le ib tug yug yaaj kws tsi tsimtxaj hlo le.

¹⁶Kuv tau tsaa ib tug yug yaaj ua tug saib kuv paab yaaj, tabsis nwg tsi paab cov yaaj kws raug luas ntaus puamtsuaj, nwg tsi moog nrhav tug kws pluj lossis tsi khu tug kws raug mob lossis tsi pub zaub rua cov seem noj le. Tabsis nwg xaav noj tej yaaj kws rog hab muab yaaj tej rau taw tev huv tuabsi.

¹⁷Tug tub yug yaaj kws tsi tsimtxaj le ntawd raug puamtsuaj lawm lauj! Nwg muab nwg paab yaaj tso tseg lawm. Kev tsuv kev rog yuav rhuav nwg lub fwjchim kuas puamtsuaj. Nwg txhais npaab yuav qhuav hab nwg lub qhovmuag saab xis yuav dlig.”