Read Hmong Njua Xakaliyas 12 Bible Online

Xakaliyas 12 - Hmong Njua bible

Xakaliyas 12

¹Ntawm nuav yog tug TSWV tej lug kws has txug cov Yixalayees, tug TSWV yog tug kws nthuav lub ntuj, yog tug kws tsim lub nplajteb, hab yog tug kws rau sav rau paa rua tuabneeg nplajteb. Nwg has tas,

²“Kuv yuav ua kuas Yeluxalees zoo ib yaam le khob cawv; txhua tsaav tuabneeg kws nyob puagncig nwg yuav haus hab qaug pawg lug ib yaam le qaug cawv. Thaus luas tuaj vij lub nroog Yeluxalees, tej nroog kws nyob huv tebchaws Yudas yuav raug vij ib yaam nkaus.

³Tabsis thaus txug lub sijhawm ntawd, kuv yuav ua kuas Yeluxalees zoo le lub pobzeb kws nyaav heev, tsaav tuabneeg twg kws tuaj tsaws lub pobzeb ntawd yuav raug mob. Txhua tsaav tuabneeg kws nyob huv nplajteb nuav yuav sau nthwv tuaj tawmtsaam nwg.

⁴Lub sijhawm ntawd kuv yuav hem kuas puab tej neeg ntshai hab ua kuas cov tuabneeg caij neeg txhua tug vwm huv tuabsi. Kuv yuav tsomkwm cov Yudas, tabsis kuv yuav ua kuas puab cov yeebncuab tej neeg dligmuag taag.

⁵Ces xeem Yudas yuav rov has rua puab tas, ‘Tug TSWV kws yog Vaajtswv tug kws muaj Fwjchim Luj kawg nkaus txhawb nwg tsaav tuabneeg kws nyob huv lub nroog Yeluxalees kuas puab muaj zug luj zug nchaav!’

⁶“Lub sijhawm ntawd, kuv yuav ua kuas xeem Yudas zoo ib yaam le cov suavtawg kws kub ib thaaj haav zoov lossis kub ib thaaj teb kws nplej sav heev lawm, puab yuav muab txhua tsaav tuabneeg kws nyob puagncig puab rhuav kuas puamtsuaj taag. Cov tuabneeg kws nyob huv lub nroog Yeluxalees yuav nyob tso sab lug huv lub nroog.

⁷“Kuv yog tug TSWV, kuv yuav xub paab kuas cov tubrog Yudas muaj yeej, kuas lub meejmom kws Daviv cov xeebntxwv hab cov tuabneeg kws nyob huv Yeluxalees tau txais ntawd txhaj tsi luj tshaaj lub meejmom kws lwm paab Yudas tau txais.

⁸Lub sijhawm ntawd tug TSWV yuav tiv thaiv cov tuabneeg kws nyob huv Yeluxalees, txawm yog cov tuabneeg qaug zug kws nrug puab nyob huv los yuav muaj zug ib yaam le Daviv. Daviv cov xeebntxwv yuav coj puab kev ib yaam le tug TSWV tug timtswv, hab zoo ib yaam le Vaajtswv ntaag.

⁹Lub sijhawm ntawd kuv yuav rhuav tshem txhua tsaav tuabneeg kws pheej nrhav kev tuaj tawmtsaam lub nroog Yeluxalees.

¹⁰“Kuv yuav pub kuas Daviv cov xeebntxwv hab cov tuabneeg kws nyob huv lub nroog Yeluxalees muaj lub sab puv npo txujkev hlub hab muaj lub sab kub lug thov Vaajtswv. Puab yuav saib ntsoov tug kws puab muab nkaug tuag lawm, hab puab yuav quaj nwg ib yaam le tug kws muaj tuab tug mivnyuas kws tuag lawm. Puab yuav quaj nwg tu sab nrho ib yaam le cov tuabneeg kws quaj puab thawj tug tub hlub kws tuag lawm.

¹¹Thaus txug lub sijhawm ntawd, cov tuabneeg kws taabtom quaj ntsuag huv lub nroog Yeluxalees yuav coob ib yaam le cov tuabneeg kws taabtom quaj nyav Hadas-limoos kws nyob huv lub taj Menkidaus.

¹²Txhua tsev tuabneeg kws nyob huv lub tebchaws ntawd, nyag quaj ntsuag nyob huv nyag tsev: caajceg kws yog Daviv xeebntxwv, caajceg kws yog Nathaas xeebntxwv, caajceg kws yog Levis xeebntxwv, caajceg kws yog Sime-is xeebntxwv, hab taagnrho lwm tsev tuabneeg huv tuabsi. Txhua tsev tuabneeg nyag yuav quaj ntsuag nyob huv nyag tsev, hab txhua tsev tuabneeg cov txivneej nyag yuav moog quaj nyag nyob rua ib qho tsi nrug cov quaspuj.”