Read Hmong Njua Xakaliyas 14 Bible Online

Xakaliyas 14 - Hmong Njua bible

Xakaliyas 14

¹Nub kws tug TSWV yuav lug nyob ntawm lub rooj txav txim tub lug ze heev lawm. Lub nroog Yeluxalees yuav raug luas fuab, hab tej khoom kws luas fuab tau ntawd yuav muab faib rua mej qhovmuag saib ntsoov.

²Tug TSWV yuav coj txhua tsaav tuabneeg tuaj ua ke ua rog rua lub nroog Yeluxalees. Luas yuav txeeb tau lub nroog hab fuab tej vaaj tse, hab tej quaspuj yuav raug luas yuam. Cov tuabneeg ib nraab yuav raug luas nteg coj moog rua lwm tebchaws, tabsis cov kws seem yuav tsi raug coj tawm huv lub nroog moog.

³Ces tug TSWV yuav tawm moog tua txhua tsaav tuabneeg ntawd, ib yaam le nwg tau ntaus rog yaav taag lug lawm.

⁴Thaus txug lub sijhawm ntawd, nwg yuav sawv sau lub Roob Txiv Ntoo Roj kws nyob ntawm lub nroog Yeluxalees saab nubtuaj. Ces lub Roob Txiv Ntoo Roj yuav tawg ua ob saab, txij ndlua saab nubtuaj moog rua saab nubpoob, yuav ua ib lub kwj haa luj heev. Lub roob ntawd ib saab yuav txaav nce toj moog rua saab qaumteb, hab ib saab yuav txaav nqeg moog rua saab qaabteb.

⁵Mej yuav tau kev tsiv dlim huv lub haav kws dlaav heev ntawd moog rua saab roob nrau u. Mej yuav tsiv dlim ib yaam le mej cov yawmkoob tsiv thaus aav qeeg tam kws Vaajntxwv Uxiyas kaav tebchaws Yudas. Tug TSWV kws yog kuv tug Vaajtswv yuav lug, hab coj taagnrho cov timtswv ceebtsheej nrug nwg lug.

⁶Thaus txug lub sijhawm ntawd, yuav tsi muaj ntuj no hab dlej nkoog,

⁷lossis tsi muaj kev tsaus ntuj. Txawm yog mo ntuj los yuav hloov ua nruab nub pum kev kaaj nrig. Tsuas yog tug TSWV tuab leeg xwb txhaj paub has tas, thaus twg lub sijhawm nuav maam le lug txug.

⁸Thaus txug nub ntawd, yuav muaj ib tug dlej txhawv huv lub nroog Yeluxalees lug, ib ceg yuav ndlwg moog rua nraag Havtxwv Tuag hab ib ceg yuav ndlwg moog rua tom Havtxwv Meditelanees. Tug dlej ntawd yuav ndlwg thaws naj thaws xyoo, tsi has lub caij ntuj qhua lossis lub caij ntuj naag.

⁹Tug TSWV yuav lug ua Vaajntxwv kaav lub nplajteb, txhua tug yuav tuaj pehawm nwg tug kws yog Vaajtswv, hab nwg muaj tuab lub npe xwb.

¹⁰Taagnrho cheebtsaam ntawm Nkenpas saab qaumteb lug txug rua ntawm Limoos saab qaabteb, mas yuav muab meem kuas taj sis txig. Lub nroog Yeluxalees yuav yog lub chaw tsomfaaj kws nyob sab tshaaj tej tebchaws kws nyob puagncig nwg; lub nroog ntawd yuav pib kag ntawm lub Roojvaag Npeenyamees moog txug ndlua ntawm lub Roojvaag Ceg kaum kws yeej yog ib lub roojvaag thaus u lug lawm, hab txij ndlua ntawm lub chaw tsomfaaj Hananees moog rua ntawm vaajntxwv lub chaw tsuam txiv maab.

¹¹Cov tuabneeg yuav nyob kaaj sab lug huv qhov chaw ntawd, yuav tsi muaj kev puamtsuaj lug raug puab ib zag ntxiv le lawm.

¹²Tug TSWV yuav tso ib yaam kaab mob kws txaus ntshai heev lug rua txhua tsaav tuabneeg kws tuaj ua rog tawmtsaam lub nroog Yeluxalees. Puab tej nqaj yuav lwj thaus puab tseem caj sa; puab lub qhovmuag hab tug nplaig yuav lwj taag huv tuabsi.

¹³Lub sijhawm ntawd tug TSWV yuav ua kuas puab feeb tsi meej hab ntshai heev, puab ib leeg yuav nteg ib leeg hab ib leeg yuav tawmtsaam ib leeg.

¹⁴Cov Yudas yuav tiv thaiv lub nroog Yeluxalees. Puab yuav fuab txhua tsaav tuabneeg tej khoom muaj nqes: kub, nyaj, hab rig tsho tau ntau kawg le.

¹⁵Tej kaab mob phem kws txaus ntshai nuav yuav raug tej neeg, tej neeg zaag, tej ntxhuav, tej neeg luav hab raug txhua yaam tsaj kws nyob huv cov yeebncuab tej yeej.

¹⁶Ces cov tuabneeg kws seem ntawm txhua tsaav tuabneeg kws tuaj tua lub nroog Yeluxalees, yuavtsum naj xyoo tuaj pehawm Vaajntxwv tug kws yog tug TSWV tug muaj Fwjchim Luj kawg nkaus hab ua kevcai nyob Tsev Pheebsuab huv lub nroog Yeluxalees.

¹⁷Yog has tas ib tsaav tuabneeg twg tseem tsi kaam moog pehawm Vaajtswv tug kws yog tug TSWV kws muaj Fwjchim Luj kawg nkaus, ces yuav tsi muaj naag lug rua puab lub tebchaws.

¹⁸Yog cov Iziv tsi kaam tuaj ua kevcai nyob Tsev Pheebsuab, puab yuav raug yaam kaab mob phem kws tug TSWV tso lug rua txhua lub tebchaws kws tsi kaam moog pehawm nwg ntawd.

¹⁹Tej nuav yog txujkev rau txim kws yuav raug cov tuabneeg Iziv hab txhua tsaav tuabneeg kws tsi kaam moog ua kevcai nyob Tsev Pheebsuab.

²⁰Lub sijhawm ntawd txawm yog tej tswb neeg los yuav sau ntawv rua has tas, “Fij rua tug TSWV.” Tej laujkaub kws siv ua noj huv lub Tuamtsev yuav dlawbhuv ib yaam le tej taig kws txawb rua ntawm lub thaaj hauv ntej.

²¹Txhua lub laujkaub kws siv ua noj huv Yeluxalees hab huv tebchaws Yudas yuav muab tshwj tseg rua ib caag txhaj tau siv pehawm tug TSWV kws muaj Fwjchim Luj kawg nkaus. Cov tuabneeg kws tuaj fij khoom yuav siv tej laujkaub ntawd lug hau tej nqaj kws coj tuaj tua ua khoom fij. Thaus txug lub sijhawm ntawd, yuav tsi muaj kev ua laag ua luam nyob huv tug TSWV tug kws muaj Fwjchim Luj kawg nkaus lub Tuamtsev lawm.