Read Hmong Njua Xakaliyas 2 Bible Online

Xakaliyas 2 - Hmong Njua bible

Xakaliyas 2

¹Kuv ua dlua ib zaaj ywgtoog pum ib tug txivneej tuav rawv ib txuj hlua ntsuag ntawm nwg txhais teg.

²Kuv nug nwg has tas, “Koj yuav moog qhov twg?” Nwg teb has tas, “Kuv yuav moog ntsuag lub nroog Yeluxalees, saib ntev hab dlaav npaum le caag.”

³Ces kuv pum tug timtswv ceebtsheej kws pheej nrug kuv thaam ntawd txaav zog moog rua tom hauv ntej hab muaj dlua ib tug timtswv ceebtsheej lug nrug nwg thaam.

⁴Thawj tug timtswv ceebtsheej has rua lwm tug timtswv ceebtsheej has tas, “Koj ca le dlha moog has rua tug tub hluas kws tuav txuj hlua ntsuag ntawd tas, yuav ua tsi tau ntsaa yeej thaiv lub nroog Yeluxalees, rua qhov muaj tuabneeg hab tsaj txhu nyob coob heev rua huv lub nroog.

⁵Tug TSWV coglug has tas, nwg yuav ua tug ntsaa yeej nplaim tawg thaiv hab tsomkwm puagncig lub nroog, hab nwg tug tshwjchim yuav ci ntsaa ab huv lub nroog ntawd.”

⁶Tug TSWV has rua nwg tsaav tuabneeg tas, “Kuv muab mej ntab tsiv moog nyob rua txhua qhov chaw. Tabsis nwgnuav, mej cov kws raug luas nteg moog ca le tsiv tawm huv lub tebchaws Npanpiloos rov lug nyob huv lub nroog Yeluxalees.

⁸Yog leejtwg ntaus mej, ces yog nwg ntaus kuv lub ntsabmuag ntaag.” Yog le ntawd, tug TSWV kws muaj Fwjchim Luj kawg nkaus khaiv kuas kuv coj nwg cov lug moog qha rua txhua tsaav tuabneeg kws tau tuaj fuab nwg tsaav tuabneeg has tas:

⁹“Tug TSWV yuav tawmtsaam mej, hab cov tuabneeg kws tub ua mej qhev ib zag lawm yuav tuaj fuab mej.” Thaus tej nuav tshwm tuaj, txhua tug yuav paub has tas tug TSWV kws muaj Fwjchim Luj kawg nkaus khaiv kuv tuaj ntaag.

¹⁰Tug TSWV has tas, “Cov tuabneeg huv Yeluxalees, mej ca le hu nkauj zoo sab! Kuv taabtom lug nrug mej nyob lawm!”

¹¹Thaus lub sijhawm ntawd yuav muaj ntau tsaav tuabneeg lug cuag tug TSWV hab ua nwg tsaav tuabneeg. Nwg yuav nrug mej nyob hab mej yuav paub has tas tub yog nwg khaiv kuv tuaj cuag mej.

¹²Cov Yudas yuav tau rov lug ua tug TSWV tsaav tuabneeg nyob huv nwg lub tebchaws kws dlawbhuv dlua ib zag ntxiv, hab lub nroog Yeluxalees yuav yog lub nroog kws nwg hlub tshaaj plawg tej nroog huv tuabsi.

¹³Mej txhua tug nyob tuabywv taabmeeg tug TSWV, rua qhov nwg taabtom nqeg ntawm nwg lub chaw dlawbhuv lug.