Read Hmong Njua Xakaliyas 3 Bible Online

Xakaliyas 3 - Hmong Njua bible

Xakaliyas 3

¹Kuv ua dlua ib zaaj ywgtoog, tug TSWV ua rua kuv pum tug Povthawj Hlub Yausuas taabtom sawv ntawm tug TSWV tug timtswv hauv ntej. Hab Ntxwgnyoog sawv ntawm Yausuas saab xis, npaaj rawv tog yuav nkaug Yausuas.

²Tug TSWV tug timtswv has rua Ntxwgnyoog has tas, “Ntxwgnyoog, thov kuas tug TSWV rau txim rua koj! Thov kuas tug TSWV kws hlub lub nroog Yeluxalees rau txim rua koj. Tug tuabneeg nuav zoo ib yaam le tug paas ntoo kws tub muab rhu tawm huv qhovcub lug lawm.”

³Yausuas naav ib cev rig tsho lu aav heev sawv qhov ntawd.

⁴Tug timtswv ceebtsheej has rua cov timtswv kws sawv ntawm nwg hauv ntej tas, “Ca le muab cev rig tsho lu aav heev kws tug txivneej ntawd naav hle povtseg.”. Hab nwg has rua Yausuas tas, “Kuv tub muab koj tej kev txhum tshem taag lawm, kuv yuav muab dlua ib cev rig tsho tshab rua koj naav.”

⁵Nwg has kuas cov timtswv ceebtsheej kws nrug nwg tuaj ntawd muab ib pluaj ntaub kws huv heev lug khi Yausuas taubhau. Puab ua lawv le nwg has, hab puab muab ib cev rig tsho tshab lug rua Yausuas naav thaus kws tug TSWV tug timtswv tseem nyob ntawd.

⁶Ces tug timtswv ceebtsheej qha rua Yausuas has tas

⁷tug TSWV kws muaj Fwjchim Luj kawg nkaus has tas: “Yog koj coj lawv le kuv tej kevcai hab leeg ua tej num kws kuv muab cob rua koj, ces koj yuav tau ua tug saib kuv lub Tuamtsev hab tej chaav tsev kws nyob rua huv, hab kuv yuav noog koj tej lug thov ib yaam le kuv noog cov timtswv kws nyob ntawm kuv xubndlag tej lug thov.

⁸Yausuas kws yog tug Povthawj Hlub, koj ca le noog kuv has; hab mej cov povthawj kws yog nwg tsoom phoojywg ca le noog kuv has, mej suavdlawg yog lub cim zoo rua yaav tom ntej: kuv yuav coj kuv tug tubkhai kws hu ua Tug Ceg lug rua mej pum!

⁹Kuv muab ib lub pobzeb kws muaj xyaa nreej lug tso rua ntawm Yausuas xubndlag. Kuv yuav txaug ib cov lug rua ntawm lub pobzeb, hab tuab nub xwb kuv yuav tshem lub tebchaws nuav tej kev txhum moog kuas taag huv tuabsi.

¹⁰Thaus txug nub ntawd, nyag yuav caw nyag tej phoojywg nruab ze tuaj nyob huv mej tej vaaj txiv maab hab txiv ncuav pas muaj kev zoo sab, kev thaajyeeb hab kev kaaj sab lug.”