Read Hmong Njua Xakaliyas 5 Bible Online

Xakaliyas 5 - Hmong Njua bible

Xakaliyas 5

¹Kuv rov tsaa qhovmuag saib, hab zag nuav kuv pum ib thooj ntawv yaa sau nruab ntug.

²Tug timtswv ceebtsheej nug kuv has tas, “Koj pum dlaabtsi?” Kuv teb nwg has tas, “Kuv pum ib thooj ntawv yaa sau nruab ntug; ntev neeg nkaum tshim hab dlaav kaum tshim.”

³Ces nwg rov has rua kuv tas, “Thooj ntawv ntawd yog sau tej lug foom phem kws yuav coj tawm moog kuas thoob lub tebchaws. Nyob rua ntawm thooj ntawv ntawd muaj ib saab sau has tas, txhua tug tubsaab yuav raug muab tshem tawm huv lub tebchaws nuav moog; hab nyob rua ib saab sau has tas, txhua tug kws coglug dlaag yuav raug tshem tawm moog ib yaam nkaus.

⁴Tug TSWV kws muaj Fwjchim Luj kawg nkaus has tas, nwg yuav tso tej lug foom phem tawm moog, hab yuav moog nkaag rua huv txhua tug tubsaab hab txhua tug kws coglug dlaag tej tsev. Tej lug ntawd yuav nyob huv puab tej tsev hab ua kuas puab puamtsuaj taag.”

⁵Tug timtswv ceebtsheej rov lug tshwm rua kuv pum hab has rua kuv tas, “Koj saib! Muaj dlua ib yaam tshwm tuaj lawm hab!”

⁶Kuv nug has tas, “Qhov ntawd yog dlaabtsi?” Nwg teb has tas, “Yog ib lub tawb kws pev txug tej kev txhum kws lub tebchaws nuav ua.”

⁷Lub hau khwb lub tawb ntawd yog muab tooj dlawb ua. Thaus kuv tsaa qhovmuag saib, lub hau txawm qheb hlo hab muaj ib tug quaspuj nyob quastsawg huv lub tawb ntawd!

⁸Tug timtswv ceebtsheej has tas, “Tug quaspuj ntawd pev txug kev phem kev qas.” Ces tug timtswv ceebtsheej txawm muab tug quaspuj ntawd nas rov rua huv lub tawb hab muab lub hau khwb kag rua lawm.

⁹Kuv tsaa hlo qhovmuag saib hab pum ob tug quaspuj yaa ncaaj nraim lug rua ntawm kuv, ob phaab tis ntxuaj muaj zug ib yaam le tug noog dlej. Ob tug ca le tsawv nkaus lub tawb hab yaa plawg lawm.

¹⁰Kuv nug tug timtswv ceebtsheej has tas, “Obtug nqaa lub tawb moog rua qhov twg lawm?”

¹¹Nwg teb has tas, “Obtug nqaa moog rua tim tebchaws Npanpiloos lawm, obtug yuav ua ib lub tuamtsev rua lub tawb ntawd. Thaus twg ua tau lub tuamtsev lawm, obtug yuav muab lub tawb ntawd tso rua huv, rua tej tuabneeg tuaj pehawm.”