Read Hmong Njua Xakaliyas 6 Bible Online

Xakaliyas 6 - Hmong Njua bible

Xakaliyas 6

¹Kuv ua dlua ib zaaj ywgtoog. Zag nuav kuv pum plaub lub tsheb neeg taabtom tawm huv ob lub roob tooj dlaag kis nruab nraab tuaj.

²Thawj lub tsheb yog cov neeg lab hai, lub tsheb ob yog cov neeg dlub hai,

³lub tsheb peb yog cov neeg dlawb hai, hab lub tsheb plaub yog cov neeg txaij hai.

⁴Ces kuv nug tug timtswv ceebtsheej has tas, “Tug Tswv, cov neeg ntawd pev txug dlaabtsi?”

⁵Nwg teb kuv has tas, “Plaub paab neeg nuav pev txug plaub nthwv cua; puab taabtom tawm ntawm tug TSWV kws kaav lub nplajteb nuav lub xubndlag tuaj.”

⁶Lub tsheb kws cov neeg dlub hai yog moog rua saab qaumteb hab moog rua Npanpiloos lawm, cov neeg dlawb moog rua saab nubpoob, hab cov neeg txaij moog rua nraag lub tebchaws kws nyob saab qaabteb.

⁷Thaus kws cov neeg txaij tawm tuaj, puab tog tsi taug yuav rawm moog tshuaj saib lub nplajteb. Tug timtswv ceebtsheej txhaj has tas, “Mej ca le moog tshuaj saib lub nplajteb!” Ces puab txawm moog lawm.

⁸Tug timtswv ceebtsheej qw nrov nrov rua kuv has tas, “Cov neeg kws moog rua saab qaumteb kws yog moog rua tim Npanpiloos lawm, ua rua tug TSWV txujkev chim txag lawm.”

⁹Tug TSWV muab cov lug nuav cob rua kuv.

¹⁰Nwg has tas, “Koj nqaa tej nyaj tej kub kws Heledais, Taunpiyas hab Yedayas muab moog tso rua huv Xefaniyas tug tub Yauxiyas lub tsev. Puab yog cov kws raug nteg moog hab nyavnyuas rov tim tebchaws Npanpiloos lug.

¹¹Ca le muab tej nyaj tej kub kws puab muab ntawd nchuav ua ib lub mom yeebkoob, hab muab rua Yausuas kws yog Yehauxadas tug tub ntoo.

¹²Koj qha rua nwg has tas tug TSWV kws muaj Fwjchim Luj kawg nkaus has le nuav, ‘Tug txivneej kws hu ua Tug Ceg, lub neej yuav vaammeej nyob ntawm qhov chaw kws nwg nyob hab rov txhim khu tug TSWV lub Tuamtsev.

¹³Nwg yog tug kws yuav ua tug TSWV lub Tuamtsev hab txais lub meejmom ua tug vaajntxwv, hab nwg yuav kaav nwg tsaav tuabneeg. Muaj ib tug povthawj yuav sawv ntawm nwg lub zwmtxwv, obtug yuav ua num sis humxeeb hab nyob kaaj sab lug.’

¹⁴Muab lub mom yeebkoob ntawd khaws ca rua huv tug TSWV lub Tuamtsev ua lub cim ncu txug Heledais, Taunpiyas, Yedayas hab Yauxiyas.”

¹⁵Cov tuabneeg kws nyob dleb yuav tuaj paab txhim khu tug TSWV lub Tuamtsev. Thaus txhim khu lub Tuamtsev lawm, mej yuav paub has tas tug TSWV kws muaj Fwjchim Luj kawg nkaus khaiv kuv tuaj cuag mej. Tej nuav yeej yuav tshwmsim yog has tas mej noog tug TSWV kws yog mej tug Vaajtswv tej lug.