Read Hmong Njua Xakaliyas 7 Bible Online

Xakaliyas 7 - Hmong Njua bible

Xakaliyas 7

¹Xyoo plaub thaus lub cuaj hlis ntuj (kws yog lub hlis Kislev) nub xab plaub kws Dali-us ua vaajntxwv kaav tebchaws, tug TSWV has ib cov lug rua kuv.

²Cov tuabneeg huv Npethees tso Salexes, Lenkemelej, hab puab cov tuabneeg tuaj rua huv tug TSWV kws muaj Fwjchim Luj kawg nkaus lub Tuamtsev, puab tuaj thov kuas tug TSWV foom koob moov rua puab,

³puab nug cov povthawj hab cov cevlug has tas: “Puas tsimnyog kws peb quaj ntsuag vim lub Tuamtsev raug puamtsuaj taag, hab ua kevcai yoo mov rua thaus lub tsib hlis ntuj lawv le peb ibtxwm ua lug ntau xyoo lawm?”

⁴Ntawm nuav moog yog cov lug kws tug TSWV has rua kuv.

⁵Nwg has tas, “Koj ca le qha rua cov pejxeem kws nyob huv lub tebchaws nuav hab cov povthawj has tas, qhov kws puab ua kevcai yoo mov hab quaj ntsuag thaus lub tsib hlis hab lub xyaa hli ntuj tau xyaa caum xyoo lug nuav tsi yog ua fwm kuv.

⁶Thaus puab noj puab haus ntawd, tsuas yog ua kuas puab txaus sab nkaus xwb.”

⁷Ntawm nuav yog tej lug kws tug TSWV has rua cov cevlug txheej thaus u kws lub nroog Yeluxalees tseem vaammeej hab muaj tuabneeg nyob puv nkaus huv, hab thaus ntawd cov tuabneeg tsi yog nyob huv tej zog kws nyob ibncig lub nroog ntawd xwb, tabsis tseem nyob moog rua saab qaabteb hab thoob plawg ntawm tej taw roob kws nyob saab nubpoob huv tuabsi.

⁸Tug TSWV has cov lug nuav rua Xakaliyas tas:

⁹“Kuv tub qha cov lug nuav rua kuv tsaav tuabneeg thaus u lug lawm has tas: ‘Mej yeej yuav pum txujkev ncaaj nceeg nyob huv mej kev coj noj coj ua, hab mej yuavtsum ua sab dlawb sab zoo hab ib leeg hlub ib leeg.

¹⁰Mej tsi xob tsimtxom cov puj ntsuag, tej mivnyuas ntsuag hab cov tuabneeg txawv tebchaws kws nrug mej nyob lossis tug kws raug kev txomnyem. Hab tsi xob nyaag nrhw ua phem rua ib leeg tug twg le.’

¹¹“Tabsis kuv tsaav tuabneeg tawv ncauj heev, tsi noog kuv lug le. Puab ntsaws puab tej qhovntsej

¹²hab puab lub sab tawv ib yaam le pobzeb. Vim puab tsi noog kuv tej lug qhuab qha kws kuv khaiv cov cevlug thaus u moog qha puab, kuv txhaj le chim heev.

¹³Rua qhov puab tsi noog kuv has; thaus puab thov kuv txhaj tsi teb puab.

¹⁴Kuv muab puab ntab tawm moog nyob rua lwm tebchaws ib yaam le cua dlaaj cua dlub ntsawj. Hab muab lub tebchaws kws zoo heev nuav tso tseg nyob qhuav nkuag ca tsi muaj leejtwg nyob lawm.”