Read Hmong Njua Xakaliyas 8 Bible Online

Xakaliyas 8 - Hmong Njua bible

Xakaliyas 8

¹Tug TSWV kws muaj Fwjchim Luj kawg nkaus has cov lug nuav rua Xakaliyas tas:

²Kuv npaaj sab ntev lug lawm, yuav paab lub nroog Yeluxalees, vim kuv hlub cov tuabneeg huv lub nroog ntawd heev, yog txujkev hlub kws ua rua kuv chim kawg nkaus rua nwg cov yeebncuab.

³Kuv yuav rov lug nyob huv Yeluxalees kws yog kuv lub nroog dlawbhuv. Yuav hu Yeluxalees ua lub nroog kws muaj kev ncaaj nceeg, hab yuav muab tug TSWV kws muaj Fwjchim Luj kawg nkaus lub roob hu ua roob dlawbhuv.

⁴Cov tuabneeg laug, tsi has quaspuj txivneej, cov laug heev kws nreg paas moog kev lawm xwb, yuav rov tau nyob quastsawg ntawm tej chaw ua si huv lub nroog.

⁵Hab tej tub tej ntxhais yuav rov ua si nplawg nta ntawm tej kev dlua ib zag ntxiv.

⁶“Tug TSWV has tas, tej zag zaaj nuav yuav nyuaj heev rua cov tuabneeg kws nyob tam nuav, tabsis yeej tsi nyuaj rua kuv hlo le.

⁷Kuv yuav cawm kuv tsaav tuabneeg kuas dlim ntawm tej tebchaws kws puab raug nteg moog ua luas qhev,

⁸hab yuav coj puab tim saab nubtuaj hab saab nubpoob rov lug nyob rua huv lub nroog Yeluxalees. Puab yuav ua kuv tsaav tuabneeg hab kuv yuav ua puab tug Vaajtswv, kuv yuav kaav puab ntawm lub sab dlawb paug hab txujkev ncaaj nceeg.

⁹“Mej ca le kub sab lug! Nwgnuav mej tub nov tej lug kws cov cev Vaajtswv lug tau has thaus lub sijhawm kws luas pib pua lub plaag tsev kws yog rov txhim khu kuv lub Tuamtsev dlua tshab lawm.

¹⁰Ua ntej lub sijhawm ntawd, yeej tsi muaj leejtwg ndlav taug tuabneeg lossis tej tsaj lug ua num, hab yeej tsi muaj leejtwg dlim ntawm nwg cov yeebncuab le. Kuv ua rua cov tuabneeg ntawd kuas ib leeg rov tawmtsaam ib leeg.

¹¹Tabsis nwgnuav kuv yuav tsi ua rua tsaav tuabneeg nuav cov kws seem nyob ib yaam le kuv ua yaav taag lug lawm.

¹²Puab yuav cog puab tej qoobloo hab nyob thaajyeeb lug; puab tej txiv maab yuav txi txiv ncw, aav yuav zoo qoob heev hab yuav muaj naag ntau. Kuv yuav muab taagnrho tej koob moov nuav rua kuv tsaav tuabneeg kws seem ntawd.

¹³Cov Yudas hab cov Yixalayees! Yaav taag lug cov tuabneeg txawv tebchaws ib leeg foom phem rua ib leeg has tas, ‘Thov kuas tej kev puamtsuaj kws lug raug cov Yudas hab cov Yixalayees poob lug raug koj ib yaam nkaus!’ Tabsis kuv yuav cawm mej, ces cov tuabneeg txawv tebchaws ib leeg yuav rov has rua ib leeg tas, ‘Thov kuas koj tau txais tej koob koov kws cov Yudas hab cov Yixalayees tau txais lawm!’ Yog le ntawd, mej ca le ua sab luj hab tsi xob ntshai.”

¹⁴Tug TSWV kws muaj Fwjchim Luj kawg nkaus has tas, “Thaus kws mej cov yawmkoob tau ua rua kuv chim, kuv tub npaaj sab tso kev puamtsuaj lug rua puab hab kuv yeej tsi hloov sab le, hab kuv ua lawv le kuv tau npaaj tseg lawm.

¹⁵Tabsis nwgnuav kuv npaaj sab yuav foom koob koov rua cov tuabneeg huv lub nroog Yeluxalees hab huv tebchaws Yudas. Yog le ntawd, mej tsi xob ntshai.

¹⁶Ntawm nuav yog tej kws mej yuav tau ua: Ib leeg yuavtsum has lug tseeb rua ib leeg, txav txim ncaaj nceeg huv tsev tu plaub, qhov kws ua sab dlawb sab zoo coj kev thaajyeeb lug rua suavdlawg.

¹⁷Tsi xob tuav tswvyim ua phem rua lwm tug. Tsi xob coglug ua timkhawv tsi tseeb. Kuv ntxub txujkev dlaag, kev ua tsi ncaaj hab ua nruj ua tsiv.”

¹⁸Tug TSWV kws muaj Fwjchim Luj kawg nkaus has tej lug nuav rua Xakaliyas tas:

¹⁹“Ua kevcai yoo mov thaus lub plaub hlis, tsib hlis, xyaa hli hab lub kaum hli ntuj, yog cov kevcai zoo sab hab lomzem rua cov tuabneeg Yudas ntaag. Mej yuavtsum nyam qhov tseeb hab txujkev thaajyeeb.”

²⁰Tug TSWV kws muaj Fwjchim Luj kawg nkaus has tas, “Thaus txug lub sijhawm ntawd, yuav muaj tuabneeg coob heev nyob huv ntau lub nroog tuaj rua huv lub nroog Yeluxalees.

²¹Cov tuabneeg kws tuaj huv ib lub nroog tuaj, yuav has rua cov tuabneeg kws tuaj dlua lwm lub nroog tuaj has tas, ‘Peb taabtom tuaj pehawm tug TSWV kws muaj Fwjchim Luj kawg nkaus hab thov nwg foom koob koov rua peb. Mej ca le nrug peb moog los mas!’

²²Muaj tuabneeg coob heev hab ntau tsaav tuabneeg kws muaj fwjchim yuav tuaj pehawm tug TSWV kws muaj Fwjchim Luj kawg nkaus huv lub nroog Yeluxalees hab thov nwg foom koob koov rua puab.

²³Thaus txug lub sijhawm ntawd, kaum tug tuabneeg txawv tebchaws yuav tuaj cuag ib tug tuabneeg Yudais hab has tas, ‘Peb xaav nrug mej tau koob koov, rua qhov peb nov has tas Vaajtswv nrug nraim mej nyob.’ ”