Read Hmong Njua Xakaliyas 9 Bible Online

Xakaliyas 9 - Hmong Njua bible

Xakaliyas 9

¹Ntawm nuav yog tug TSWV cov lug: Nwg tau txav txim rua lub tebchaws Hadakes hab lub nroog Damaxes. Tsi yog txav txim rua txhua xeem Yixalayees xwb, tabsis txav txim rua cov Xilias lub tuamceeb nroog kws yog tug TSWV tug;

²lub nroog Hamas kws nyob rua ntawm tebchaws Hadakes tug nrimteb, hab tej nroog kws nyob peg Tiles hab Xidoos, hab taagnrho puab tej kev txawj ntse huv tuabsi.

³Lub nroog Tiles tau ua tej chaw faajxwm kws khov heev thaiv nwg hab sau nyaj kub lug teeb ua tej pawg ca, ua rua luas saib zoo le tej pawg lamsim xwb.

⁴Tabsis tug TSWV yuav muab txhua yaam kws nwg muaj tshem moog povtseg. Tug TSWV yuav muab nwg tej kev npluanuj pov rua huv havtxwv, hab lub nroog yuav raug hlawv kuas kub nyab taag moog ua tshauv.

⁵Lub nroog Asekeloos yuav pum tej xwm nuav hab yuav ntshai heev. Lub nroog Nkaxas yuav pum tej xwm nuav hab yuav mob sab kawg nkaus. Lub nroog Ekiloos los ib yaam nkaus, nwg yuav taag kev ca sab hab ntshai tshee nyo. Lub nroog Nkaxas yuav tsi muaj vaajntxwv, hab yuav muab lub nroog Asekeloos tso ca ua suabpuam.

⁶Ntau tsaav tuabneeg yuav tuaj nyob sis xyaw ntxawg huv lub nroog Asedaus. Tug TSWV has tas, “Kuv yuav muab cov tuabneeg Filitees txu fwjchim kuas puab tsi xob khaavtheeb lawm.

⁷Puab yuav tseg tsi noj nqaj xyaw ntshaav lossis tej khoom noj kws txwv tsi pub noj lawm. Taagnrho cov tuabneeg kws seem yuav tau lug ua kuv tsaav tuabneeg hab zoo ib yaam le xeem Yudas. Ekiloos yuav tau lug ua ib feem ntawm kuv tsaav tuabneeg, ib yaam le cov Yenpus tub tau lug ua lawm.

⁸Kuv yuav tsomkwm kuv lub tebchaws hab tsi pub kuas muaj tubrog tuaj tau rua huv. Kuv yuav tsi pub kuas kuv tsaav tuabneeg raug cov tuabneeg Tiles tsimtxom ntxiv lawm. Rua qhov kuv yeej pum ntsoov kuv tsaav tuabneeg raug kev txomnyem luj kawg le.”

⁹Cov tuabneeg huv Xi-oos, mej ca le zoo sab, ca le zoo sab! Cov tuabneeg huv Yeluxalees, mej ca le qw zoo sab hlo! Saib lauj, mej tug vaajntxwv taabtom lug cuag mej lawm! Nwg yog tug ncaaj nceeg hab coj kev muaj yeej lug, tabsis nwg txu fwjchim hab caij ib tug neeg luav lug.

¹⁰Tug TSWV has tas, “Kuv yuav muab tej tsheb neeg ua rog tshem tawm ntawm cov Yixalayees, hab coj tej neeg tawm huv lub nroog Yeluxalees moog; hab tej neevnti kws tua rog yuav raug rhuav kuas puamtsuaj taag. Mej tug vaajntxwv yuav ua kuas txhua tsaav tuabneeg muaj kev thaajyeeb; Nwg yuav kaav ib lub havtxwv rua ib lub havtxwv, txij ndlua ntawm tug dlej Efalates moog txug qaab ntuj kawg.”

¹¹Tug TSWV has tas, “Rua qhov kuv tau nrug mej coglug kws yog muab ntshaav ua khoom fij ua lub cim nas rua, kuv yuav tso mej tsaav tuabneeg kuas dlim ntawm qhov chaw tsi muaj dlej kws luas coj mej moog nyob rov lug.

¹²Cov tuabneeg kws raug nteg moog, nwgnuav mej rov muaj kev ca sab lawm, mej ca le rov lug; rov lug nyob huv mej lub tebchaws tso sab lug. Nwgnuav kuv qha rua mej has tas, kuv yuav them ob npaug rov rua mej, hab foom koob moov rua tej kws mej raug kev txomnyem lug lawm.

¹³Kuv yuav siv Yudas ib yaam le tug tubrog raab neevnti, hab siv cov Yixalayees ib yaam le cov xub vug. Kuv yuav siv cov tuabneeg huv Xi-oos ib yaam le raab ntaaj moog tua cov tuabneeg Kilis.”

¹⁴Tug TSWV yuav tshwm lug rua sau nwg tsaav tuabneeg; nwg yuav tua nwg tej xub vug ib yaam le tsaglig xub laim. Tug TSWV kws kaav ib puas tsaav yaam yuav tshuab raaj tshuab xyu; nwg yuav nrug naag xub naag cua tuaj nraag saab qaabteb tuaj.

¹⁵Tug TSWV kws muaj Fwjchim Luj kawg nkaus yuav tiv thaiv nwg tsaav tuabneeg, hab puab yuav rhuav kuas puab cov yeebncuab puamtsuaj taag. Puab yuav qw ntshu nrooj huv tshaav rog ib yaam le tej tuabneeg qaug cawv, hab puab yuav ua rua puab cov yeebncuab nqaj ndluag ntshaav nrug; tej ntshaav ntawd yuav ndlwg ib yaam le tej ntshaav ua khoom fij kws muab laub rua sau lub thaaj.

¹⁶Thaus txug lub sijhawm ntawd, tug TSWV yuav cawm nwg tsaav tuabneeg, ib yaam le tug tswv yug yaaj cawm nwg paab yaaj dlim ntawm txujkev puamtsuaj. Puab yuav ci ntsaa ab rua lub tebchaws ib yaam le lub mom kub.

¹⁷Ua caag lub tebchaws yuav zoo hab zoo nkauj ua luaj! Nplej hab cawv yuav ua rua cov hluas hlub mog nyoos hab muaj zug heev.