Read Hmong Njua Malakis 2 Bible Online

Malakis 2 - Hmong Njua bible

Malakis 2

¹Tug TSWV kws muaj Fwjchim Luj kawg nkaus has rua cov povthawj tas, “Tej lug nuav yog kuv has rua mej:

²Mej yuavtsum ua mej teg num kuas kuv tau ntsejmuag. Yog mej tsi noog kuv has, kuv yuav foom phem rua mej. Kuv yuav foom phem rua tej khoom kws luas coj tuaj pub rua mej. Qhov tseeb, kuv tub foom phem rua tej ntawd lawm, vim mej tsi ua lawv le kuv tej lug.

³Kuv yuav rau txim rua mej cov mivnyuas hab yuav muab tej tsaj kws mej coj tuaj tua fij rua kuv ntawd cov quav pleev mej ntsejmuag, hab kuv yuav coj mej moog pov rua ntawm qhov chaw kws pov tej quav tsaj.

⁴Thaus ntawd mej yuav paub has tas kuv tub has rua mej lawm, kuas kuv tej lug cog tseg rua cov povthawj kws yog cov Levis cov xeebntxwv yuav nyob moog ibtxhis.

⁵“Kuv nrug puab coglug, kuv coglug has tas kuv yuav pub kuas puab muaj sa ntev hab nyob kaaj sab lug, hab kuv pub tej nuav rua puab kuas puab fwm kuv. Thaus ntawd puab puavleej fwm hab ntshai kuv kawg le.

⁶Puab yeej qha tej zaaj tseeb xwb, puab tsi laam qha tej zaaj kws tsi yog le. Puab ua neej lawv le kuv lub sab nyam; tsi yog puab coj ncaaj xwb, tabsis puab tseem paab tau coob leej tso txujkev ua phem tseg hab.

⁷Cov povthawj yog cov kws qha kuas suavdlawg paub Vaajtswv tseeb. Tsimnyog tej tuabneeg moog cuag cov povthawj kuas puab qha suavdlawg paub ua lub neej hum kuv sab, rua qhov cov povthawj yog cov kws cev tug TSWV kws muaj Fwjchim Luj kawg nkaus tej lug.

⁸“Tabsis nwgnuav mej cov kws yog cov povthawj tau tso txujkev tseeb tseg lawm. Tej lug kws mej qha tub ua rua coob leej moog ua txhum lawm. Mej rhuav tej lug kws kuv cog tseg rua mej.

⁹Yog le ntawd, kuv yuav ca kuas cov Yixalayees saib tsi taug mej, rua qhov mej tsi ua lawv le kuv tej lug qha, thaus mej qha kuv tsaav tuabneeg, mej tsi qha suavdlawg ib yaam.”

¹⁰Puas yog peb suavdlawg koom tuab leeg txiv? Puas yog tuab tug Vaajtswv tsim peb suavdlawg xwb? Vim le caag peb rhuav tej lug cog tseg kws peb ib leeg coglug rua ib leeg? Hab vim le caag peb txhaj thuam tej lug kws Vaajtswv tau cog tseg rua peb cov yawmkoob lawm?

¹¹Cov Yudas tsi ua lawv le tej lug kws puab cog tseg rua Vaajtswv lawm, puab ua tej kev phem kev qas nyob huv lub nroog Yeluxalees hab thoob plawg huv lub tebchaws. Puab tau ua rua lub Tuamtsev kws Vaajtswv hlub kawg nkaus tsi huv lawm. Cov txivneej tau moog yuav tej ntxhais kws pe lwm tsaav tuabneeg tej vaajtswv lug ua quaspuj.

¹²Thov tug TSWV muab cov tuabneeg kws ua le ntawd tshem tawm huv cov Yixalayees moog kuas taag, hab tsi xob pub puab nrug peb tsaav tuabneeg koom coj tej khoom tuaj fij rua tug TSWV kws muaj Fwjchim Luj kawg nkaus ntxiv le lawm.

¹³Muaj dlua ib yaam kws mej ua, mej tuaj quaj ua kua muag lug ntub tug TSWV lub thaaj taag, vim nwg tsi yuav tej khoom kws mej coj tuaj fij rua nwg.

¹⁴Mej tseem muaj plhus nug has tas, vim le caag nwg txhaj tsi yuav tej khoom fij ntawd? Nwg tsi yuav rua qhov nwg paub has tas koj tsi ua lawv le tej lug cog tseg rua tug quaspuj kws koj yuav thaus koj tseem hluas. Nwg yog koj tug txwj nkawm, tabsis koj rhuav tej lug kws koj cog tseg rua nwg lawm. Txawm yog koj tau coglug rua Vaajtswv has tas, koj yuav muab lub sab npuab nwg los koj tsi ua lawv le koj has.

¹⁵Puas yog Vaajtswv tub muab koj lug koom ua ib lub cev hab ib lub sab nrug nwg lawm? Vim le caag Vaajtswv txhaj ua le nuav? Tub yog nwg xaav kuas meb muaj tub muaj ki kws yog Vaajtswv tsaav tuabneeg tag. Yog le ntawd, mej tsi xob rhuav tej lug kws mej cog tseg rua mej tug quaspuj lawm.

¹⁶Tug TSWV kws yog cov Yixalayees tug Vaajtswv has tas, “Kuv ntxub txujkev sis nrauj heev. Kuv ntxub thaus kws muaj ib tug twg ua nruj ua tsiv rua nwg tug quaspuj. Mej yuavtsum ncu ntsoov tsi xob rhuav mej tej lug cog tseg kws has tas mej yuav muab sab npuab mej tug quaspuj.”

¹⁷Mej ua rua tug TSWV dlhuav mej tej lug kawg le. Tabsis mej tseem nug has tas, “Peb ua rua tug TSWV dlhuav le caag?” Mej ua rua nwg dlhuav thaus kws mej has tas, “Tug TSWV kws muaj Fwjchim Luj kawg nkaus xaav has tas txhua tug kws ua txhum puavleej yog tuabneeg zoo; hab has tas, nwg yeej nyam puab.” Lossis mej nug has tas, “Vaajtswv tug kws ncaaj nceeg nyob qhov twg?”