Read Hmong Njua Mathais 1 Bible Online

Mathais 1 - Hmong Njua bible

Mathais 1

¹Zaaj nuav yog has txug Yexus Khetos cov yawmkoob tej npe. Yexus yog Daviv Tub hab Daviv yog Anplahaas xeebntxwv.

²Txij thaus Anplahaas lug txug thaus Vaajntxwv Daviv, Yexus cov yawmkoob muaj le nuav: Anplahaas yog Ixaj txiv, Ixaj yog Yakhauj txiv, Yakhauj yog Yudas hab nwg cov kwvtij txiv,

³Yudas yog Peles hab Zelas txiv (obtug nam yog Tamaj), Pelej yog Heloos txiv, Heloos yog Laas txiv, Laas yog Anpinadas txiv, Anpinadas yog Nasoos txiv.

⁴Nasoos yog Xalemoos txiv,

⁵Xalemoos yog Npau-am txiv, (Npau-am nam yog Lahaj), Npau-am yog Aunpes txiv, (Aunpes nam yog Luv), Aunpes yog Yexais txiv,

⁶Yexais yog Vaajntxwv Daviv txiv. Txij thaus Daviv lug txug rua thaus cov Yixalayees raug nteg moog rua tebchaws Npanpiloos, Yexus cov yawmkoob muaj le nuav: Daviv yog Xalumoos txiv, (Xalumoos nam yog Uliyas tug quaspuj),

⁷Xalumoos yog Lehaunpau-aas txiv, Lehaunpau-aas yog Anpiyas txiv, Anpiyas yog Axas txiv,

⁸Axas yog Yehausafas txiv, Yehausafas yog Yehaulaas txiv, Yehaulaas yog Uxiyas txiv,

⁹Uxiyas yog Yauthaas txiv, Yauthaas yog Ahas txiv, Ahas yog Hexekiyas txiv, Hexekiyas yog Manaxes txiv, Manaxes yog Amoos txiv,

¹⁰Amoos yog Yauxiyas txiv,

¹¹Yauxiyas yog Yehauyakhees hab nwg cov kwvtij txiv.

¹²Txij thaus cov Yixalayees raug nteg moog rua tebchaws Npanpiloos lug txug rua thaus yug Yexus, Yexus cov yawmkoob muaj le nuav: Yehauyakhees yog Se-atiyees txiv, Se-atiyees yog Xelunpanpees txiv,

¹³Xelunpanpees yog Anpi-us txiv, Anpi-us yog Eli-akees txiv, Eli-akees yog Axaus txiv,

¹⁴Axaus yog Xadaus txiv, Xadaus yog Akhis txiv, Akhis yog Eli-us txiv,

¹⁵Eli-us yog Ele-axas txiv, Ele-axas yog Mathaas txiv, Mathaas yog Yakhauj txiv,

¹⁶Yakhauj yog Yauxej txiv. Malis kws yog Yexus nam yog Yauxej tug quaspuj. Yexus yog tug kws suavdlawg hu ua tug Cawmseej.

¹⁷Yog le ntawd, txij thaus Anplahaas lug txug Daviv, muaj kaum plaub tam, txij thaus Daviv lug txug thaus cov Yixalayees raug nteg moog rua tebchaws Npanpiloos muaj kaum plaub tam, hab txij thaus cov Yixalayees raug nteg moog rua tebchaws Npanpiloos lug txug thaus yug tug Mexiyas muaj kaum plaub tam.

¹⁸Zaaj kws yuav has nuav yog has txug zaaj kws Yexus lug yug rua huv lub nplajteb nuav. Yauxej tub xub qhab Malis kws yog Yexus nam ca lawm. Tabsis thaus obtug tseem tsi tau sis yuav, Malis paub has tas Vaaj Ntsujplig tug Dlawbhuv ua rua nwg xeeb tub lawm.

¹⁹Yauxej tug kws qhab Malis yog ib tug tuabneeg ncaaj nceeg, nwg tsi xaav ca Malis poob ntsejmuag, nwg txawm xaav has tas, nwg yuav tso Malis tuabywv tseg.

²⁰Thaus Yauxej tseem xaav txug zaaj ntawd, Yauxej txawm ua npau suav pum tug Tswv ib tug timtswv lug has rua nwg tas, “Yauxej kws yog Daviv tug xeebntxwv, koj tsi xob nyuaj sab. Koj ca le moog yuav Malis lug ua koj quaspuj. Rua qhov tub yog Vaaj Ntsujplig tug Dlawbhuv ua rua Malis xeeb tub.

²¹Malis yuav yug ib tug mivtub, koj yuavtsum tis tug mivtub ntawd npe hu ua Yexus, rua qhov nwg yog tug kws yuav lug cawm nwg tsaav tuabneeg kuas puab dlim puab lub txim.”

²²Tej nuav muaj lawv le tej lug kws tug Tswv tau qha rua tug cev Vaajtswv lug lawm has tas,

²³“Ib tug nkaujxwb yuav xeeb tub hab yuav yug ib tug mivtub hab suavdlawg yuav hu nwg lub npe has tas Emanu-ees” (Lub npe nuav txhais has tas, “Vaajtswv nrug peb nyob”).

²⁴Thaus Yauxej tsim dlheev lug, nwg txawm moog coj Malis lug ua nwg quaspuj lawv le tug Tswv tug timtswv tau has rua nwg lawm.

²⁵Tabsis Yauxej yeej tsi nrug Malis pw moog txug thaus kws Malis yug tug mivtub ntawd. Thaus yug tau lawm, Yauxej tis tug mivtub ntawd npe hu ua Yexus.