Read Hmong Njua Mathais 10 Bible Online

Mathais 10 - Hmong Njua bible

Mathais 10

¹Yexus hu nwg kaum ob tug thwjtim lug rua ntawm nwg. Nwg muab fwjchim rua puab ntab tau dlaab tawm hab khu tau txhua yaam mob huv tuabsi.

²Kaum ob tug timthawj ntawd npe hu le nuav: Ximoos (tug kws hu ua Petus) hab nwg tug kwv Aadales; Yakaunpaus hab nwg tug kwv Yauhaas, obtug yog Xenpedais tub;

³Filis hab Npataulaumais; Thaumas hab Mathais kws yog tug sau se; Yakaunpaus kws yog Alafais tug tub, hab Thade-us;

⁴Ximoos, tug kws xaav kuas nwg tsaav tuabneeg muaj kev ywjpheej, hab Yudas Ixakali-us, tug kws ntxeev sab rua Yexus.

⁵Yexus khaiv kaum ob tug thwjtim moog hab nwg qha rua puab has tas: “Mej tsi xob moog rua huv lwm Tsaav Tuabneeg, hab tsi xob moog huv cov Xamalis tej nroog.

⁶Tabsis mej ca le moog nrhav cov tuabneeg Yixalayees, rua qhov puab zoo le paab yaaj kws pluj lawm.

⁷Mej ca le moog qha has tas ‘Ntuj Ceebtsheej tub lug ze lawm!’

⁸Mej ca le moog khu tej tuabneeg kws muaj mob, tsaa cov tuabneeg kws tuag lawm sawv rov qaab lug, khu cov tuabneeg mob ruas hab ntab dlaab tawm. Kuv pub lub fwjchim dlawb dlawb rua mej, yog le ntawd, mej yuavtsum pub dlawb rua lwm tug, tsi xob yuav nqe.

⁹Mej tsi xob nqaa kub, nyaj lossis txaj toog lab rua huv mej tej naab tshos moog;

¹⁰Mej moog, mej tsi xob khuam naab thoobpuab, tsi xob npaaj tsho moog hloov, tsi xob nqaa khau lossis paas nreg moog. Rua qhov tug kws ua num yeej tsimnyog luas pub rua nwg noj nwg naav.

¹¹“Thaus mej moog txug huv ib lub nroog twg lossis huv ib lub zog twg, mej ca le moog rua huv tug kws txaus sab hu mej moog su huv nwg tsev, hab nyob huv nwg tsev moog txug thaus mej tawm huv lub nroog ntawd moog.

¹²Thaus mej moog huv leejtwg tsev, mej yuavtsum xub has lug noj qaab nyob zoo rua puab.

¹³Yog tsev tuabneeg ntawd hu mej moog huv puab tsev, puab yuav tau koob moov, tabsis yog puab tsi hu mej moog huv puab tsev, puab yuav tsi tau koob moov le.

¹⁴Yog tsev tuabneeg twg lossis lub nroog twg tsi hu mej hab tsi noog tej lug kws mej qha, ces thaus mej tawm moog, mej ca le nchus tej moov aav kws lu mej kutaw povtseg.

¹⁵Kuv qha tseeb rua mej has tas Nub kws Vaajtswv Txav Txim, nwg yuav rau txim rua lub nroog ntawd nyaav dlua le nwg rau txim rua lub nroog Xaudoos hab lub nroog Kaumaulas!

¹⁶“Mej ca le noog kuv has! Kuv khaiv mej moog ib yaam le paab yaaj kws yuav moog rua huv paab maa. Mej yuavtsum ntse ib yaam le tug naab hab muaj lub sab mog sab muas ib yaam le tug nquab.

¹⁷Mej yuavtsum ceevfaaj, rua qhov yuav muaj tuabneeg nteg mej coj moog rua huv tsev tu plaub, hab luas yuav muab mej nplawm huv tej tsev saablaaj.

¹⁸Luas yuav coj mej moog sawv taabmeeg tej numtswv hab cov vaajntxwv, puab yuav taug mej zaaj, vim mej ua kuv teg num, mej txhaj yuav muaj sijhawm qha Txujmoo Zoo rua puab hab rua lwm Tsaav Tuabneeg.

¹⁹Thaus puab coj mej moog taug mej zaaj, mej tsi xob txhawj has tas, mej yuav has le caag. Thaus txug lub sijhawm ntawd, Vaajtswv yuav qha kuas mej paub has.

²⁰Tej lug kws mej yuav has, tsi yog mej lug, tabsis yog mej leej Txiv tug Ntsujplig qha rua mej.

²¹“Tij yuav muab kwv, kwv yuav muab tij coj moog cob rua luas tua. Txiv yuav ua ib yaam le ntawd rua tej mivnyuas, hab mivnyuas yuav tawmtsaam nam txiv, hab coj moog rua luas tua.

²²Txhua tug yuav ntxub mej, vim mej yog cov kws ntseeg kuv, tabsis tug kws ua sab ntev moog txug thaus kawg, tug ntawd yuav dlim.

²³Yog lub nroog twg tsimtxom mej, mej ca le tsiv moog rua lwm lub nroog. Kuv qha tseeb rua mej has tas, thaus mej tseem tsi tau moog qha thoob tej nroog huv lub tebchaws Yixalayees, Tuabneeg leej Tub tub lug lawm.

²⁴“Tsi muaj ib tug tub kawm ntawv kws yuav paub tshaaj nwg tug xwbfwb, hab tsi muaj ib tug tubqhe kws yuav muaj fwjchim dlua nwg tug tswv.

²⁵Yog ib tug tub kawm ntawv paub le nwg tug xwbfwb lawm, hab tug tubqhe muaj fwjchim npaum le nwg tug tswv, kuj zoo lawm. Yog tug tswv tsev tub tau lub npe hu ua Npexenpus lawm, ces nwg tsev tuabneeg hajyam yuav tau lub npe phem dlua le ntawd hab!

²⁶“Yog le ntawd, mej tsi xob ntshai tuabneeg, rua qhov tej kws tuabneeg muab npog ca lawm, yuav muaj tug muab nthuav lug rua suavdlawg saib, hab tej kws tsi muaj leejtwg paub, yuav muaj tug muab qha rua suavdlawg.

²⁷Tej kws kuv qha rua mej thaus tsaus ntuj, nruab nub mej yuavtsum qha rua suavdlawg, hab tej kws kuv has tuabywv rua mej, mej yuavtsum moog qha rua suavdlawg nov.

²⁸Mej tsi xob ntshai tug kws tua tau mej lub cev, tabsis tua tsi tau mej tug ntsujplig. Mej yuavtsum ntshai Vaajtswv tug kws muab tau mej lub cev hab mej tug ntsujplig pov rua huv ntuj tawg.

²⁹Ob tug noog tsev, luas muag ob xus xwb puas yog? Tabsis yog mej leej Txiv tsi pum zoo ca ib tug poob rua huv aav, yeej tsi poob le.

³⁰Hab txawm yog mej tej plaubhau los Vaajtswv tub suav txhua txuj huv tuabsi lawm.

³¹Yog le ntawd, mej tsi xob ntshai; mej muaj nqes heev dlua ntau tug noog tsev!

³²“Tug kws leeg taabmeeg suavdlawg has tas, nwg yog kuv le, ces kuv yuav leeg yuav tug ntawd taabmeeg kuv Txiv tug kws nyob sau ntuj ceebtsheej ib yaam le ntawd.

³³Tabsis tug kws tsi leeg yuav kuv taabmeeg suavdlawg, kuv yuav tsi leeg tug ntawd taabmeeg kuv Txiv tug kws nyob sau ntuj ceebtsheej.

³⁴“Mej tsi xob xaav has tas, yog kuv coj kev thaajyeeb lug rua nplajteb. Tsi yog le ntawd, kuv tsi coj kev thaajyeeb lug, tabsis kuv coj ntaaj lug.

³⁵Kuv lug yog lug ua kuas tub tawmtsaam txiv, ntxhais tawmtsaam nam, hab nyaab tawmtsaam puj;

³⁶Yug cov yeebncuab kws phem tshaaj yog yug tsev tuabneeg.

³⁷“Tug kws hlub nwg nam nwg txiv heev dlua hlub kuv, tug ntawd tsi tsimnyog ua kuv tug thwjtim; tug kws hlub nwg tej tub tej ntxhais heev dlua hlub kuv, tug ntawd tsi tsimnyog ua kuv tug thwjtim.

³⁸Tug kws tsi kwv nwg tug ntoo khaublig nrug kuv moog, tug ntawd tsi tsimnyog ua kuv tug thwjtim.

³⁹Tug kws khauvxwm nwg txujsa, tug ntawd yuav tsi tau txujsa, tabsis tug kws tsi khauvxwm nwg txujsa vim nwg ntseeg kuv, tug ntawd yuav tau txujsa.

⁴⁰“Tug kws tog txais mej, tub yog nwg tog txais kuv; hab tug kws tog txais kuv, tub yog tug ntawd tog txais tug kws khaiv kuv lug.

⁴¹Tug kws tog txais Vaajtswv ib tug tubkhai, vim nwg paub has tas tug ntawd yog tug kws qha Vaajtswv txujlug, ces nwg yuav tau nqe zug ib yaam le tug tubkhai ntawd. Tug kws tog txais ib tug tuabneeg ncaaj nceeg, rua qhov nwg paub has tas tug ntawd yog tuabneeg ncaaj nceeg, ces nwg yuav tau nqe zug ib yaam le tug ntawd.

⁴²Kuv qha tseeb rua mej has tas, tug kws muab ib khob dlej txag rua kuv cov thwjtim tug kws yau dlua ndlais haus, vim nwg paub has tas tug ntawd yog kuv tug thwjtim, ces nwg yuav tau nqe zug.”