Read Hmong Njua Mathais 11 Bible Online

Mathais 11 - Hmong Njua bible

Mathais 11

¹Thaus Yexus qha nwg kaum ob tug thwjtim taag lawm, nwg txawm tawm qhov ntawd moog qha hab qhuab qha rua huv tej nroog kws nyob ze ntawd.

²Thaus Yauhaas tug kws muab tuabneeg ua kevcai raus dlej tseem raug kaw rua huv tsev lojcuj nov txug tej kws Yexus naj nub ua, nwg txawm khaiv nwg cov thwjtim qee leej moog cuag Yexus.

³Puab tuaj nug Yexus has tas, “Thov koj qha rua peb saib koj puas yog tug kws Yauhaas has tas yuav lug lossis peb tseem yuav tog dlua lwm tug?”

⁴Yexus teb has tas, “Mej ca le rov moog qha tej kws mej nov hab tej kws mej pum lawm rua Yauhaas has tas,

⁵cov tuabneeg dligmuag rov pum kev, cov tuabneeg tuag ceg moog taug kev, cov tuabneeg mob ruas zoo, cov tuabneeg laag ntseg nov lug, cov tuabneeg tuag lawm sawv rov lug hab tub muaj tuabneeg moog qha Txujmoo Zoo rua cov tuabneeg txomnyem lawm.

⁶Tug kws ntseeg kuv, tug ntawd tau koob moov.”

⁷Thaus Yauhaas cov thwjtim rov moog lawm, Yexus txawm has rua cov tuabneeg coob coob ntawd tas, “Thaus mej moog cuag Yauhaas tom roob mojsaab qhua, mej moog saib dlaabtsi? Mej moog saib tug lojkov kws cua tshuab rawv moog rawv lug los?

⁸Mej moog saib dlaabtsi? Mej moog saib tug kws naav tej tsoog tsho zoo zoo los? Tsuas yog cov tuabneeg kws nyob huv vaajntxwv lub loog txhaj tau naav zoo xwb!

⁹Mej qha rua kuv saib, mej moog saib dlaabtsi? Moog saib ib tug cev Vaajtswv lug los? Yog lawm, tabsis tug kws mej pum ntawd muaj fwjchim luj dlua ib tug cev Vaajtswv lug.

¹⁰Tug Yauhaas nuav yog tug kws Vaajtswv Txujlug tub xub qha tseg lawm. Vaajtswv has tas, ‘Kuv yuav khaiv kuv tug tubkhai ua koj ntej moog khu kev tog koj.’

¹¹Kuv qha tseeb rua mej has tas, txhua tug kws yug lug ntawm quaspuj, tsi muaj ib tug muaj fwjchim npaum le Yauhaas tug kws muab tuabneeg ua kevcai raus dlej. Tabsis tug kws yau tshaaj nyob sau Ntuj Ceebtsheej, tug ntawd tseem muaj fwjchim luj dlua Yauhaas hab.

¹²Txij thaus Yauhaas tug kws muab tuabneeg ua kevcai raus dlej qhuab qha lug txug naj nub nua, muaj cov tuabneeg kws tawmtsaam qhov kws tuabneeg moog Ntuj Ceebtsheej. Hab muaj cov tuabneeg kws siv zug txeeb kuas tau moog Ntuj Ceebtsheej.

¹³Cov cev Vaajtswv lug hab Mauxes txuj Kevcai yeej qha txug Ntuj Ceebtsheej lug txug rua Yauhaas; hab

¹⁴yog mej ntseeg tej lug kws puab qha ntawd, mej yeej yuav ntseeg has tas Yauhaas yog Eliyas tug kws puab has tas, nwg yuav lug.

¹⁵Yog le ntawd, leejtwg muaj qhovntsej ca le noog!

¹⁶“Kuv yuav muab cov tuabneeg tam nuav pev rua dlaabtsi? Puab zoo ib yaam le tej mivnyuas yau kws ua si tom tshaav puam. Paab nuav has rua paab tod tas,

¹⁷‘Peb tub tshuab raaj lawm, tabsis mej tsi seev cev! Peb quaj nyav, tabsis mej tsi mob sab!’

¹⁸Yauhaas lug, nwg ua kevcai yoo mov hab nwg tsi haus cawv txiv maab, suavdlawg txhaj has tas, ‘Nwg raug dlaab lawm!’

¹⁹Tuabneeg leej Tub lug, nwg noj hab haus, suavdlawg txhaj has tas, ‘Mej saib, tug tuabneeg nuav noj luj haus luj, nwg nrug cov tuabneeg kws sau se hab cov tuabneeg txhum ua phoojywg!’ Tug kws pum Vaajtswv teg num, tug ntawd yuav paub tseeb has tas Vaajtswv yog tug muaj tswvyim.”

²⁰Yexus txawm tshev cov tuabneeg kws nyob huv tej nroog kws Yexus tau moog ua txujci tseemceeb ntau zag lawm, rua qhov puab tsi kaam tso puab tej kev txhum tseg.

²¹“Lub nroog Khaulaxis, koj yuav raug kev puamtsuaj! Lub nroog Npexaidas, koj yuav raug kev puamtsuaj! Tej txujci tseemceeb kws tub ua rua meb pum lawm, yog ua tej ntawd rua huv lub nroog Tiles hab lub nroog Xidoos, ces cov tuabneeg kws nyob huv ob lub nroog ntawd tub xub muab naab tsaaj lug npua hab tsuab tshauv nphoo rua ib ce ntxuv lug lawm! Puab yuav ua le ntawd kuas suavdlawg paub has tas, puab tub tso puab tej kev txhum tseg lawm.

²²Kuv qha rua meb has tas, nub kws Vaajtswv txav txim, nwg yuav rau txim rua meb nyaav dlua rau txim rua lub nroog Tiles hab lub nroog Xidoos.

²³Lub nroog Kapena-us, koj yuav tsaav koj lub fwjchim moog kuas txij ntuj los? Yuav muab koj pov moog rua huv ntuj tawg! Yog has tas tej txujci tseemceeb kws ua rua koj pum lawm, ua rua huv lub nroog Xaudoos, lub nroog ntawd yeej yuav nyob lug txug naj nub nua.

²⁴Kuv qha rua koj has tas, nub kws Vaajtswv txav txim, nwg yuav rau txim rua koj nyaav dlua le nwg rau txim rua lub nroog Xaudoos!”

²⁵Thaus ntawd Yexus has tas, “Txiv, koj yog tug Tswv kws kaav lub ntuj hab lub nplajteb nuav! Kuv ua koj tsaug, rua qhov koj tub muab tej nuav zais ca tsi qha rua cov tuabneeg muaj tswvyim hab txawj ntse paub, tabsis koj qha tej ntawd rua cov tuabneeg kws tsi txawj tsi ntse paub xwb.

²⁶Txiv, koj yeej pum zoo ca ua le ntawd.

²⁷“Kuv Txiv tub muab ib puas tsaav yaam tso rua kuv lawm. Tsi muaj leejtwg paub leej Tub, tsuas yog leej Txiv txhaj paub xwb, hab tsi muaj leejtwg paub leej Txiv, tsuas yog leej Tub hab cov kws leej Tub pum zoo qha rua txhaj paub xwb.

²⁸“Mej cov kws saab saab vim ris nraa nyaav, mej ca le lug cuag kuv, kuv yuav ca mej su.

²⁹Kuv yog tug kws muaj sab dlawb sab zoo, yog le ntawd, mej ca le lug kwv kuv tug quabtwg hab kawm tej kws kuv qha, mej txhaj yuav tau su.

³⁰Tug quabtwg kws kuv muab rua mej kwv yoojyim kwv, hab lub nraa kws kuv muab rua mej ris, lub ntawd tsi nyaav.”