Read Hmong Njua Mathais 13 Bible Online

Mathais 13 - Hmong Njua bible

Mathais 13

¹Tuab nub ntawd Yexus txawm tawm huv tsev moog nyob quastsawg nraag ntug havtxwv.

²Muaj tuabneeg coob coob tuaj nyob puagncig Yexus, nwg txhaj nce moog rua huv lub nkoj, ces cov tuabneeg coob coob sawv ntawm ntug dlej.

³Yexus ua lug pevtxwv qha ntau zaaj rua puab noog has tas, “Muaj ib tug txivneej nqaa noob nplej moog tseb.

⁴Thaus nwg tseb cov noob nplej rua huv dlaim teb, muaj qee lub poob rua huv plawv kev, ces noog txawm lug khaws noj lawm.

⁵Muaj qee lub poob rua ntawm qhov aav kws huv muaj pobzeb tiv lawm. Cov noob ntawd tuaj sai sai, vim aav tsi tub.

⁶Thaus tshaav ntuj kub, cov kaug ntsws hab qhuav lawm; vim tug caag ntsa aav tsi tub.

⁷Muaj qee lub poob rua huv qaab tsob xuavpaug, ces tsob xuavpaug hlub tuaj laum tsob nplej ntawd tuag taag lawm.

⁸Muaj qee lub poob rua ntawm qhov aav zoo, cov ntawd txhawv taug. Qee naab txi tau ib puas lub, qee naab txi tau rau caum lub, hab qee naab txi tau peb caug lub.”

⁹Yexus xaus lug has tas, “Yog leejtwg muaj qhovntsej ca le noog!”

¹⁰Cov thwjtim lug nug Yexus has tas, “Ua le caag koj pheej ua lug pevtxwv qha puab xwb?”

¹¹Yexus teb has tas, “Zaaj kws tuabneeg tsi tau paub has txug Ntuj Ceebtsheej, kuv tub qha rua mej lawm, tabsis tsi tau qha rua cov tuabneeg ntawd paub.

¹²Rua qhov tug kws tub muaj lawm, yeej yuav muab ntxiv kuas nwg muaj nplua mag, tabsis tug kws tsi muaj, txawm yog nwg tsuas muaj mivntsiv xwb los Vaajtswv yuav muab rhu moog huv tuabsi.

¹³Yog le ntawd kuv txhaj ua lug pevtxwv qha xwb, rua qhov yog puab saib los puab tsi pum, puab noog tabsis puab tsi nov hab tsi totaub.

¹⁴Ua le ntawd txhaj muaj tav lawv le Yaxayas kws yog tug cev Vaajtswv lug tau has tseg tas: ‘Mej yuav noog taag noog thab, tabsis mej yuav tsi totaub; mej yuav saib taag saib thab, tabsis mej yuav tsi pum,

¹⁵rua qhov cov tuabneeg nuav lub sab ruag, puab tsi xaav noog, puab ntsaws qhovntsej, puab tsi xaav saib, puab qe muag. Yog tsi ua le ntawd, nyob tsaam puab qhovmuag yuav pum puab qhovntsej yuav nov, puab yuav totaub, ces puab yuav tig rov lug cuag kuv, hab kuv yuav khu puab tej mob zoo.’

¹⁶“Tabsis mej yog cov kws muaj moo, mej qhovmuag txhaj pum hab mej qhovntsej txhaj nov.

¹⁷Kuv qha tseeb rua mej has tas, cov cev Vaajtswv lug hab cov tuabneeg ncaaj nceeg tog ntev loo, xaav pum tej kws mej pum, tabsis puab tsi tau pum, puab xaav nov tej kws mej nov, tabsis puab tsi tau nov.

¹⁸“Mej ca le noog, kuv yuav txhais zaaj lug pevtxwv kws has txug tug tseb nplej lub ntsab rua mej.

¹⁹Cov tuabneeg kws nov zaaj lug kws has txug Ntuj Ceebtsheej tabsis tsi totaub, zoo ib yaam le lub noob nplej kws poob rua huv plawv kev. Dlaab Ntxwgnyoog txawm lug txeeb tej lug ntawd huv puab lub sab lawm.

²⁰Cov noob nplej kws poob rua ntawm qhov aav kws huv muaj pobzeb tiv lawm, pev txug Vaajtswv txujlug kws thaus tuabneeg nov dlheev, puab txaus sab hlo txais yuav taamsim ntawd.

²¹Tabsis txujlug ntawd cog tsi ruaj rua huv puab lub sab, txujlug ntawd nyob tsi ntev. Thaus puab raug kev txomnyem lossis kev tsimtxom, ces puab txawm muab tso tseg taamsim ntawd.

²²Cov noob nplej kws poob rua huv qaab tsob xuavpaug, pev txug Vaajtswv Txujlug kws tuabneeg nov; tabsis puab tej kev nyuaj sab, kev ntshaw nyaj hlub tuaj laum Vaajtswv txujlug lawm, puab txujkev ntseeg txhaj tsi luj hlub.

²³Hab cov noob nplej kws poob rua ntawm qhov aav zoo, pev txug Vaajtswv Txujlug kws tuabneeg nov, hab totaub: cov tuabneeg ntawd ibtxha txi tau ib puas lub, ibtxha txi tau rau caum lub, hab ibtxha txi tau peb caug lub.”

²⁴Yexus qha dlua ib zaaj lug pevtxwv rua puab noog has tas: “Ntuj Ceebtsheej pev ib yaam le ib tug txivneej kws coj noob nplej moog tseb rua huv nwg dlaim teb.

²⁵Muaj ib mos thaus suavdlawg pw tsaug zug taag lawm, tug ntawd tug yeebncuab txawm coj cov noob txhauv tuaj tseb xyaw rua cov nplej, ces nwg txawm tsiv lawm.

²⁶Thaus cov nplej luj hlub hab pib txhawv lawm, ua cav pum muaj txhauv tuaj xyaw hab.

²⁷Tug tswv cov tubkhai lug has rua nwg tas, ‘Tug tswv, puas yog koj tsuas tseb cov noob nplej zoo rua huv koj dlaim teb xwb? Ua le caag nwgnuav tsua muaj txhauv tuaj xyaw hab?’

²⁸Nwg teb puab has tas, ‘Tej ntawd yog yeebncuab ua xwb.’ Cov tubkhai nug nwg has tas, ‘Koj puas xaav kuas peb moog muab cov txhauv ntawd dlob povtseg?’

²⁹Nwg teb has tas, ‘Tsi xob moog dlob, nyob tsaam thaus mej dlob cov txhauv, mej yuav dlob tau cov nplej hab.

³⁰Ca cov nplej hab cov txhauv nyob ua ke moog txug lub caij hlais tsaiv, kuv maam has kuas cov hlais xub hlais cov txhauv paav ua tej teg hab muab moog pov hlawv, hab sau cov nplej lug rua huv kuv lub txhaab.’ ”

³¹Yexus has dlua ib zaaj lug pevtxwv rua puab noog has tas: “Ntuj Ceebtsheej pev ib yaam le lub noob zaub. Muaj ib tug txivneej coj ib lub noob zaub moog cog rua huv nwg dlaim teb.

³²Lub noob zaub ntawd miv dlua lwm yaam noob huv tuabsi. Thaus lub noob ntawd tuaj lawm, nwg luj hlub ua ib tsob kws luj dlua tej zaub huv tuabsi. Nwg luj ua ib tsob ntoo hab noog lug ua zeg rua sau nwg tej ceg.”

³³Yexus has dlua ib zaaj lug pevtxwv rua puab noog has tas: “Ntuj Ceebtsheej pev ib yaam le cov keeb kws ib tug quaspuj muab xyaw rua peb sab moov nplej, hab ua rua cov moov nplej su taag huv tuabsi.”

³⁴Tej zaaj kws Yexus qha rua suavdlawg, nwg ua lug pevtxwv qha xwb tsi muaj ib zaaj kws nwg tsi ua lug pevtxwv qha le.

³⁵Nwg ua le ntawd kuas muaj tav lawv le Yaxayas kws yog tug cev Vaajtswv lug tau qha tseg has tas: “Thaus kuv has rua puab, kuv yuav ua lug pevtxwv has xwb. Kuv yuav qha tej kws tsi muaj tuabneeg paub, txij thaus tsim lub nplajteb lug rua puab noog.”

³⁶Yexus txawm tso cov tuabneeg coob coob ntawd tseg hab nwg moog rua huv tsev. Nwg cov thwjtim lug has rua nwg tas, “Thov koj txhais zaaj lug pevtxwv kws koj has txug cov txhauv huv dlaim teb ntawd rua peb noog saib yog le caag.”

³⁷Yexus qha has tas, “Tug kws tseb cov noob nplej zoo yog Tuabneeg leej Tub;

³⁸dlaim teb yog lub nplajteb nuav; cov noob nplej kws zoo yog cov tuabneeg kws yog Vaajtswv cov; cov txhauv yog cov tuabneeg kws yog dlaab Ntxwgnyoog cov.

³⁹Hab tug yeebncuab kws tuaj tseb cov noob txhauv ntawd yog dlaab Ntxwgnyoog. Lub caij hlais yog lub sijhawm kws nplajteb kawg, cov hlais yog cov timtswv ceebtsheej.

⁴⁰Lub sijhawm nplajteb kawg yuav zoo ib yaam le thaus puab sau cov txhauv moog povtseg.

⁴¹Tuabneeg leej Tub yuav khaiv nwg cov timtswv moog sau cov tuabneeg kws ua rua lwm tug ua txhum hab cov tuabneeg ua phem ua qas huv tuabsi tawm huv nwg lub tebchaws

⁴²hab coj cov tuabneeg ntawd moog pov rua huv lub cubtawg kws cig hlub hlub, puab yuav quaj tum nav qawv qhov ntawd.

⁴³Thaus ntawd Vaajtswv cov tuabneeg yuav ci ntsaa ab ib yaam le lub nub nyob huv puab leej Txiv lub Tebchaws. Yog leejtwg muaj qhovntsej, ca le noog!

⁴⁴“Ntuj Ceebtsheej pev ib yaam le hub nyaj kws luas muab faus ca rua huv ib dlaim teb. Muaj ib tug moog pum ces nwg txawm muab aav npoog rua, nwg zoo sab kawg le. Nwg rov moog muab nwg lub cuabtaam muag huv tuabsi, hab muab cov nyaj moog yuav dlaim teb ntawd.

⁴⁵“Hab Ntuj Ceebtsheej pev ib yaam le ib tug tub luam moog nrhav yuav cov hlaws kws muaj nqes,

⁴⁶hab thaus nwg moog nrhav pum ib cov hlaws kws muaj nqes dlua tej huv tuabsi lawm, nwg txawm rov lug muab nwg lub cuabtaam muag hab muab cov nyaj moog yuav cov hlaws ntawd.

⁴⁷“Hab Ntuj Ceebtsheej pev ib yaam le lub vaag cuab ntseg kws luas muab cuab rua huv havtxwv maag tau txhua yaam ntseg.

⁴⁸Thaus lub vaag maag tau ntseg ntau heev lawm, cov tuabneeg cuab ntseg txawm nqug lub vaag lug rua tim ntug. Puab nyob quastsawg xaiv cov ntseg zoo ntim rua huv tawb, hab muab cov kws tsi muaj nqes povtseg.

⁴⁹Thaus lub sijhawm nplajteb kawg yuav zoo le ntawd ntaag. Cov timtswv yuav lug muab cov tuabneeg ua phem cais tawm ntawm cov tuabneeg ua zoo moog,

⁵⁰hab coj moog pov rua huv lub cubtawg kws cig hlub hlub, puab yuav quaj tum nav qawv qhov ntawd.”

⁵¹Yexus nug cov thwjtim has tas, “Mej puas totaub tej nuav?” Puab teb has tas, “Peb totaub lawm.”

⁵²Ces Yexus txawm has rua puab tas, “Yog le ntawd, txhua tug xwbfwb kws qha Vaajtswv txuj Kevcai kws tub kawm paub txug Ntuj Ceebtsheej lawm, puab zoo ib yaam le tug tswv tsev kws muab nwg tej qhov txhua chaw qub hab tshab rhu tawm huv nwg lub txhaab lug siv.”

⁵³Thaus Yexus qha tej zaaj lug pevtxwv nuav taag lawm, nwg txawm tawm qhov ntawd

⁵⁴hab rov moog rua huv nwg lub nroog. Nwg moog qhuab qha huv lub tsev saablaaj, hab cov tuabneeg kws nov nwg qha xaav tsi thoob le. Puab sis thaam has tas, “Nwg tau tej tswvyim nuav qhov twg lug? Hab ua caag nwg ua tau tej txujci nuav?

⁵⁵Nwg puas yog tug kws ntoo tug tub? Nwg nam puas yog Malis? Hab nwg cov kwv puas yog Yakaunpaus, Yauxej, Ximoos hab Yudas?

⁵⁶Puas yog nwg cov muam puavleej nyob huv lub nroog nuav? Nwg tau tej tswvyim nuav qhov twg lug?”

⁵⁷Puab txawm tsi fwm Yexus. Yexus has rua puab tas, “Tej tuabneeg ob caag puavleej fwm tug cev Vaajtswv lug, tsuas yog cov tuabneeg kws nyob huv nwg lub zog hab nwg tsev tuabneeg txhaj tsi fwm nwg xwb.”

⁵⁸Yexus tsi tau ua tej txujci tseemceeb ntau pistsawg qhov ntawd, rua qhov puab tsi ntseeg.