Read Hmong Njua Mathais 14 Bible Online

Mathais 14 - Hmong Njua bible

Mathais 14

¹Lub sijhawm ntawd, Helauj tug kws kaav lub xeev Kalilais nov txug Yexus lub moo.

²Nwg txawm qha rua nwg cov numtswv has tas, “Tug nuav yeej yog Yauhaas tug kws muab tuabneeg ua kevcai raus dlej sawv huv qhov tuag rov lug lawm, nwg txhaj ua tau tej txujci tseemceeb nuav.”

³Rua qhov Helauj tau khaiv tuabneeg moog nteg Yauhaas khi hab coj nwg moog kaw rua huv tsev lojcuj. Helauj ua le ntawd tub yog Helauj yuav Helaudias kws yog nwg tug kwv Filis tug quaspuj.

⁴Rua qhov Yauhaas tug kws muab tuabneeg ua kevcai raus dlej has rua Helauj has tas, “Qhov kws koj yuav Helaudias ua koj quaspuj txhum kevcai lawm!”

⁵Helauj xaav tua Yauhaas, tabsis nwg ntshai cov Yudais, rua qhov suavdlawg paub tseeb has tas Yauhaas yog ib tug cev Vaajtswv lug.

⁶Nub kws luas ncu txug Helauj nub yug, Helaudias tug ntxhais lug seev cev rua suavdlawg saib, Helauj txaus sab heev,

⁷Helauj coglug rua tug ntxhais has tas, “Yog koj thov yaam twg, kuv yuav muab yaam ntawd rua koj!”

⁸Tug ntxhais txawm moog thov Helauj lawv le nwg nam qha rua nwg lawm has tas, “Koj ca le muab Yauhaas tug kws muab tuabneeg ua kevcai raus dlej lub taubhau txav tso rua huv lub phaaj nqaa lug rua ntawm nuav!”

⁹Vaajntxwv nyuaj sab kawg le, tabsis vim nwg tau coglug taabmeeg suavdlawg lawm, nwg txhaj ua lawv le tug ntxhais thov.

¹⁰Ces nwg txawm khaiv tuabneeg moog txav Yauhaas cejdlaab huv tsev lojcuj.

¹¹Puab muab Yauhaas lub taubhau tso rua huv lub phaaj nqaa lug rua tug ntxhais, ces tug ntxhais nqaa moog rua nwg nam.

¹²Yauhaas cov thwjtim txawm tuaj muab Yauhaas lub cev coj moog log lawm; hab puab moog qha tej nuav rua Yexus paub.

¹³Thaus Yexus nov has tas Yauhaas tuag lawm, Yexus tuab leeg txawm caij nkoj tawm qhov ntawd moog rua ib qhov chaw kws tsi muaj tuabneeg. Thaus suavdlawg nov has tas Yexus moog rua qhov ntawd lawm, puab txawm tawm huv puab tej nroog taug ntug dlej caum Yexus qaab.

¹⁴Thaus Yexus tawm huv nkoj lug, nwg pum muaj tuabneeg coob coob, nwg hlub puab hab nwg khu puab cov tuabneeg muaj mob txhua tug zoo huv tuabsi.

¹⁵Thaus yuav tsaus ntuj, Yexus cov thwjtim lug has rua Yexus has tas, “Qhov nuav nyob dleb nroog hab tub lig lig lawm, thov koj kuas suavdlawg moog nrhav yuav mov tom tej zog noj.”

¹⁶Yexus teb has tas, “Tsi xob kuas puab moog, mej ca le muab mov rua puab noj!”

¹⁷Cov thwjtim teb has tas, “Peb tsuas muaj tsib lub ncuav hab ob tug ntseg xwb.”

¹⁸Yexus has tas, “Ca le muab lug rua kuv.”

¹⁹Yexus kuas suavdlawg nyob quastsawg ntawm tej nyom; Yexus muab tsib lub ncuav hab ob tug ntseg lug, ces nwg tsaa qhovmuag saib rua sau ntuj, hab ua Vaajtswv tsaug hab muab cov ncuav ndlais cev rua cov thwjtim hab cov thwjtim coj moog faib rua suavdlawg noj.

²⁰Txhua tug puavleej tau noj tsau huv tuabsi. Cov thwjtim moog sau cov ncuav seem kws suavdlawg noj tsi taag tau kaum ob tawb puv nkaus.

²¹Cov tuabneeg kws noj mov nub ntawd, cov txivneej muaj kwvlaam le tsib txheeb leej, tsi suav cov quaspuj hab mivnyuas.

²²Tom qaab ntawd Yexus kuas cov thwjtim nce moog rua huv nkoj hab caij hlaa havtxwv ua ntej moog rua saab tim u, ces Yexus txawm kuas suavdlawg rov moog tsev.

²³Tom qaab kws Yexus kuas puab moog tsev taag lawm, nwg tuab leeg nce moog thov Vaajtswv peg roob. Thaus tsaus ntuj lawm nwg tseem nyob nwg peg roob.

²⁴Lub sijhawm ntawd cov thwjtim tub caij lub nkoj moog txug ib nraab dlej lawm. Cua ntsawj tom hauv ntej tuaj ua rua dlej ndlaas tej nam twv tuaj ntaus lub nkoj.

²⁵Thaus plaub teev yuav kaaj ntug, Yexus lug kutaw sau nplaim dlej lug cuag cov thwjtim.

²⁶Thaus puab pum Yexus lug kutaw sau nplaim dlej, puab ntshai kawg le hab qw has tas, “Yog dlaab!”

²⁷Taamsim ntawd Yexus has rua puab tas, “Mej tsi xob poob sab! Yog kuv ntaag, tsi xob ntshai!”

²⁸Petus has tas, “Tug Tswv, yog has tas yog koj tag, thov koj has kuas kuv moog tau sau nplaim dlej tuaj cuag koj.”

²⁹Yexus teb has tas, “Ca le tuaj!” Petus txawm tawm huv lub nkoj moog kutaw sau nplaim dlej moog cuag Yexus.

³⁰Tabsis thaus Petus pum cua ntsawj hlub hlub nwg ntshai kawg le, ces nwg txawm tog zog rua huv dlej. Nwg hu nrov nrov has tas, “Tug Tswv, thov koj paab kuv!”

³¹Taamsim ntawd Yexus txawm cev loo teg moog tuav nkaus Petus hab has tas, “Ua le caag koj kev ntseeg yuav tsawg ua luaj le! Ua le caag koj tsi ca sab?”

³²Thaus obtug nce moog rua huv lub nkoj, ces cua txawm tu lawm.

³³Cov thwjtim kws nyob huv lub nkoj txawm txhus caug ndlua hawm Yexus hab has tas, “Koj yog Vaajtswv tug Tub tag.”

³⁴Yexus hab nwg cov thwjtim caij nkoj hlaa havtxwv moog txug tim Nkenexales.

³⁵Cov tuabneeg kws nyob cheebtsaam ntawd paub has tas yog Yexus. Puab txawm khaiv tuabneeg moog qha rua cov tuabneeg kws nyob puagncig cheebtsaam ntawd. Ces puab txawm coj tej tuabneeg muaj mob tuaj cuag Yexus.

³⁶Puab thov Yexus has tas, ca puab kov Yexus lub tw tsho xwb; hab puab txhua tug kws tau kov puavleej zoo huv tuabsi.