Read Hmong Njua Mathais 15 Bible Online

Mathais 15 - Hmong Njua bible

Mathais 15

¹Tom qaab ntawd muaj cov Falixais hab cov xwbfwb kws qha Vaajtswv txuj Kevcai tuaj nraag lub nroog Yeluxalees tuaj cuag Yexus hab nug has tas,

²“Ua le caag koj cov thwjtim tsi ua lawv le tej kevcai kws peb cov yawmkoob ibtxwm qha rua peb? Koj cov thwjtim tsi xub ntxuav teg lawv le kevcai tsaiv maam le noj mov!”

³Yexus teb has tas, “Ua le caag mej ua lawv le tej kevcai, tabsis mej tsi ua lawv le Vaajtswv Txujlug qha?

⁴Vaajtswv has tas, ‘Koj yuavtsum fwm koj nam koj txiv,’ hab has tas, ‘Yog leejtwg tshev nwg nam nwg txiv, yuavtsum muab tug ntawd tua povtseg.’

⁵Tabsis mej qha has tas yog leejtwg muaj ib yaam dlaabtsi kws yuav paab tau nwg nam nwg txiv, tabsis nwg has tas, ‘Kuv tub muab rua Vaajtswv lawm,’

⁶tsi taag tug ntawd yuav fwm nwg nam nwg txiv lawm. Qhov kws mej ua le mej tej kevcai nuav, yog mej ua saib tsi taug Vaajtswv txujlug.

⁷Cov tuabneeg ntsejmuag ncaaj sab nkhaus! Qhov kws Yaxayas tug kws cev Vaajtswv lug tau has txug mej yeej muaj tseeb tag:

⁸Vaajtswv has tas, ‘Cov tuabneeg nuav lub qhovncauj fwm kuv tabsis puab lub sab tsi npuab kuv.

⁹Qhov kws puab pehawm kuv tsi muaj nqes le, rua qhov puab muab tuabneeg tej kevcai lug qha ib yaam le tej kevcai ntawd yog kuv tej kevcai!’ ”

¹⁰Yexus hu cov tuabneeg coob coob ntawd lug cuag nwg, hab nwg has rua puab has tas, “Mej ua tuab zoo noog kuv has, mej txhaj totaub!

¹¹Tsi yog yaam kws moog rua huv tuabneeg lub qhovncauj, ua rua tuabneeg ua txhum, tabsis yog tej kws tawm huv tuabneeg lub qhovncauj lug, txhaj ua rua tuabneeg ua txhum xwb.”

¹²Thaus ntawd cov thwjtim lug has rua Yexus has tas, “Koj tsi paub has tas tej lug kws koj has ntawd ua rua cov Falixais chim kawg le los?”

¹³Yexus teb has tas, “Txhua tsob ntoo kws tsi yog kuv Txiv tug kws nyob sau ntuj cog, yuav muab rhu huv tuabsi povtseg.”

¹⁴“Puamchawj puab! Puab yog cov thawjcoj kws coj cov dligmuag; yog ib tug dligmuag coj ib tug dligmuag kev, ces obtug yeej yuav poob qhov xwb.”

¹⁵Petus has tas, “Thov koj txhais zaaj lug pevtxwv nuav rua peb.”

¹⁶Yexus teb cov thwjtim has tas, “Mej tseem tsi totaub le hab los?

¹⁷Mej tsi paub has tas, yaam kws moog ntawm tuabneeg lub qhovncauj, yaam ntawd moog rua huv tuabneeg lub plaab, hab tawm dlhau lawm xwb.

¹⁸Tabsis tej lug kws tuabneeg lub qhovncauj has, yog tawm huv tuabneeg lub sab lug, tej lug ntawd ua rua tuabneeg ua txhum.

¹⁹Rua qhov yaam kws tawm huv tuabneeg lub sab lug, ua rua tuabneeg tua tuabneeg, ntxag luas quaspuj luas quasyawg, ua kev nkauj kev nraug, ua tubsaab, has lug dlaag, hab rhuav lwm tug ntsejmuag.

²⁰Tej nuav yog tej kws ua rua tuabneeg ua txhum, tabsis qhov kws tsi ntxuav teg maam le noj mov, yeej tsi ua rua tuabneeg ua txhum.”

²¹Yexus tawm qhov ntawd moog rua peg cheebtsaam kws ze lub nroog Tiles hab lub nroog Xidoos.

²²Muaj ib tug quaspuj kws yog tuabneeg Kana-aas nyob huv cheebtsaam ntawd tuaj cuag Yexus hab thov has tas, “Daviv tug Tub, thov koj hlub kuv! Kuv tug ntxhais raug dlaab, ua rua nwg txomnyem kawg le.”

²³Tabsis Yexus tsi teb tug quaspuj ntawd ib lus le. Yexus cov thwjtim lug cuag Yexus hab has tas, “Koj kuas nwg tsiv moog! Rua qhov nwg pheej lawv peb qaab hab quaj thov le ntawd!”

²⁴Yexus teb has tas, “Vaajtswv tsuas khaiv kuv lug nrhav cov Yixalayees kws yog paab yaaj kws pluj lawm xwb.”

²⁵Thaus tug quaspuj nov le ntawd, nwg txawm lug txhus caug ndlua ntawm Yexus kutaw hab thov has tas, “Tug Tswv, thov koj paab kuv.”

²⁶Yexus teb has tas, “Tsi tsimnyog muab mivnyuas tej mov pov rua tej dlev noj.”

²⁷Tug quaspuj ntawd teb has tas, “Yog los mas tug Tswv, tabsis txawm yog tej dlev los tseem tau noj tej mov kws poob sau nwg tug tswv lub rooj lug hab.”

²⁸Yexus teb tug quaspuj ntawd has tas, “Koj yog ib tug quaspuj kws muaj kev ntseeg heev! Koj yeej yuav tau lawv le koj thov.” Ces lub sijhawm ntawd nwg tug ntxhais txawm zoo lawm.

²⁹Yexus tawm qhov ntawd rov lug, hab taug ntug Havtxwv Kalilais moog rua peg roob hab nyob quastsawg.

³⁰Muaj tuabneeg coob coob tuaj cuag nwg, puab coj tej tuabneeg kws qhuav teg qhuav taw, dligmuag, cegtawv, has tsi tau lug, hab cov tuabneeg kws muaj mob ntau leej tuaj tso rua ntawm Yexus kutaw; hab Yexus khu puab txhua tug zoo huv tuabsi.

³¹Thaus cov tuabneeg suavdlawg pum cov tuabneeg kws has tsi tau lug, has tau lug, tej tuabneeg cegtawv zoo, tej tuabneeg qhuav teg qhuav taw moog taug kev, hab tej tuabneeg dligmuag pum kev lawm, ces suavdlawg xaav tsi thoob hab ua cov Yixalayees tug Vaajtswv tsaug.

³²Yexus hu cov thwjtim lug cuag nwg hab has rua puab has tas, “Kuv taabncuab cov tuabneeg nuav, vim puab tuaj nrug kuv nyob tau peb nub, hab nwgnuav puab tsi muaj dlaabtsi noj lawm. Kuv tsi xaav ca puab yoo tshaib le ntawd moog tsev, nyob tsaam puab tsaus muag qaug tom tej kev.”

³³Cov thwjtim nug Yexus has tas, “Ntawm nuav yog roob mojsaab qhua xwb, peb yuav moog nrhav mov qhov twg lug kuas txaus cov tuabneeg nuav noj?”

³⁴Yexus nug cov thwjtim has tas, “Mej muaj pistsawg lub ncuav?” Puab teb has tas, “Peb muaj xyaa lub ncuav hab ob peb tug ntseg miv miv xwb.”

³⁵Yexus has kuas suavdlawg nyob quastsawg huv aav.

³⁶Ces nwg txawm muab xyaa lub ncuav hab cov ntseg ntawd lug ua Vaajtswv tsaug, hab muab ndlais cev rua cov thwjtim; cov thwjtim coj moog faib rua suavdlawg noj.

³⁷Txhua tug puavleej tau noj tsau huv tuabsi. Cov thwjtim moog sau cov ncuav seem kws suavdlawg noj tsi taag tau xyaa tawb puv nkaus.

³⁸Cov tuabneeg kws noj mov, cov txivneej muaj plaub txheeb leej, tsi suav cov quaspuj hab mivnyuas.

³⁹Thaus Yexus kuas suavdlawg rov moog tsev taag lawm, Yexus txawm nce nkoj moog rua tim cheebtsaam Mankadaas lawm.