Read Hmong Njua Mathais 16 Bible Online

Mathais 16 - Hmong Njua bible

Mathais 16

¹Cov Falixais hab cov Xadukais qee leej tuaj cuag Yexus xaav sim nwg, puab kuas nwg ua ib yaam txujci tseemceeb sau ntuj lug rua puab saib.

²Tabsis Yexus teb puab has tas, “Thaus nub yuav poob qho, mej pum qaab ntug lab lab, mej has tas, ‘Pigkig yuav tshaav ntuj.’

³Thaus kaaj ntug mej pum hauv ntuj lab ploog hab tsaus nti, mej paub has tas, yuav lug naag. Mej saib fuab saib cua mej paub has tas, yuav tshaav ntuj lossis yuav lug naag, tabsis tej txujci kws naj nub nua muaj lawm, mej tsua tsi paub.

⁴Yexus txawm has rua puab tas, cov tuabneeg tam nuav ua phem ua qas hab puab tsi ntseeg Vaajtswv! Mej xaav kuas kuv ua ib yaam txujci tseemceeb rua mej saib. Kuv yuav tsi ua! Tsuas yog mej yuav pum Yaunas zaaj xwb.” Ces Yexus txawm tso puab tseg hab moog rua lwm qhov lawm.

⁵Thaus puab caij nkoj hlaa havtxwv moog rua saab tim u, cov thwjtim tsi ncu qaab ntim mov moog.

⁶Yexus has rua puab tas, “Mej yuavtsum ceevfaaj cov Falixais hab cov Xadukais cov keeb.”

⁷Ces cov thwjtim sis thaam has tas, “Ntshai yog peb tsi ntim mov tuaj, nwg txhaj has le ntawd.”

⁸Yexus tub paub tej kws puab thaam lawm, nwg txawm has tas, “Vim le caag mej pheej sis thaam txug qhov kws mej tsi ntim mov tuaj? Ua le caag mej kev ntseeg yuav tsawg ua luaj!

⁹Mej tseem tsi tau totaub los? Mej tsi ncu qaab zag kws kuv muab tsib lub ncuav ndlais faib rua tsib txheeb leej noj los? Mej sau tej kws seem tau pistsawg tawb?

¹⁰Hab zag kws kuv muab xyaa lub ncuav ndlais faib rua plaub txheeb leej noj, mej sau tej kws seem tau pistsawg tawb?

¹¹Ua le caag mej tsi totaub zaaj kws kuv has rua mej? Kuv tub tsi tau has txug mov los sav. Tabsis kuv has kuas mej ceevfaaj cov Falixais hab cov Xadukais cov keeb.”

¹²Thaus ntawd cov thwjtim txhaj totaub has tas, Yexus tsi tau has kuas puab ceevfaaj tej keeb kws muab xyaw ncuav, tabsis nwg has kuas puab ceevfaaj cov Falixais hab cov Xadukais tej lug qha.

¹³Yexus moog rua peg cheebtsaam kws nyob ze lub nroog Xixaleyas Filipis, nwg nug nwg cov thwjtim has tas, “Suavdlawg has tas Tuabneeg Leej Tub yog leejtwg?”

¹⁴Puab teb has tas, “Qee leej has tas, nwg yog Yauhaas tug kws muab tuabneeg ua kevcai raus dlej, qee leej has tas nwg yog Eliyas, qee leej has tas nwg yog Yelemis lossis yog ib tug cev Vaajtswv lug.”

¹⁵Yexus nug puab has tas, “Mej ne, mej tsua has tas kuv yog leejtwg?”

¹⁶Ximoos Petus teb has tas, “Koj yog tug Mexiyas kws yog Vaajtswv tug kws muaj sa nyob tug Tub.”

¹⁷Yexus teb has tas, “Yauhaas tug tub Ximoos, koj moov zoo kawg! Tej lug nuav tsi yog tuabneeg qha rua koj, tabsis yog kuv Txiv tug kws nyob sau ntuj ceebtsheej qha rua koj.

¹⁸Kuv has rua koj tas, koj yog Petus hab kuv yuav tsaa kuv pawg ntseeg rua sau lub pobzeb nuav, txawm yog kev tuag los yuav kov tsi yeej pawg ntseeg ntawd.

¹⁹Kuv yuav muab tug yumsij kws qheb Ntuj Ceebtsheej rua koj; yaam kws koj txwv huv nplajteb nuav, Vaajtswv yuav txwv yaam ntawd sau ntuj ceebtsheej. Yaam kws koj tso cai huv nplajteb nuav, Vaajtswv yuav tso cai yaam ntawd sau ntuj Ceebtsheej.”

²⁰Yexus txwv nwg cov thwjtim tsi pub puab qha rua leejtwg paub has tas, nwg yog tug Mexiyas.

²¹Txij thaus ntawd lug Yexus txawm pib qha rua nwg cov thwjtim has tas, “Kuv yuavtsum moog nraag lub nroog Yeluxalees, cov txwjlaug, cov thawj ntawm cov povthawj, hab cov xwbfwb kws qha Vaajtswv txuj Kevcai yuav tsimtxom kuv hab muab kuv tua, tabsis peb nub kuv yuav sawv huv qhov tuag rov qaab lug.”

²²Petus txawm coj Yexus moog rua ib caag hab cheem has tas, “Tug Tswv, thov Vaajtswv txwv kuas tsi xob muaj le ntawd. Koj yeej yuav tsi raug tej nuav le!”

²³Yexus tig hlo lug has rua Petus has tas, “Dlaab Ntxwgnyoog, koj ca le tsiv ntawm kuv moog! Koj tsi xob taav kuv kev. Tej kws koj xaav ko yog tuabneeg le xwb, tsi yog Vaajtswv le.”

²⁴Yexus has rua cov thwjtim has tas, “Yog leejtwg xaav nrug kuv moog, tug ntawd yuavtsum tswj nwg lub sab, hab kwv nwg tug ntoo khaublig nrug kuv moog.

²⁵Rua qhov tug kws khauvxwm nwg txujsa, tug ntawd yuav tsi tau txujsa, tabsis tug kws tsi khauvxwm nwg txujsa, vim nwg ntseeg kuv, tug ntawd yuav tau txujsa.

²⁶“Yog leejtwg tau ib puas tsaav yaam huv nplajteb nuav lug ua nwg tug, tabsis nwg txujsa tu lawm, tej ntawd yuav muaj nqes dlaabtsi rua nwg? Yeej tsi muaj ib yaam dlaabtsi kws nwg yuav coj moog txhwv tau nwg txujsa rov qaab lug.

²⁷Thaus Tuabneeg Leej Tub lug, nwg yuav muaj Leej Txiv tug tshwjchim ci ntsaa ab, hab nwg cov timtswv yuav nrug nwg lug, hab nwg yuav muab nqe zug rua txhua tug lawv le teg num kws puab tau ua lawm.

²⁸Kuv qha tseeb rua mej has tas, cov tuabneeg kws nyob ntawm nuav muaj qee leej yuav tsi tau tuag ua ntej puab pum Tuabneeg Leej Tub lug ua Vaajntxwv.”