Read Hmong Njua Mathais 18 Bible Online

Mathais 18 - Hmong Njua bible

Mathais 18

¹Thaus lub sijhawm ntawd cov thwjtim lug cuag Yexus hab nug has tas, “Leejtwg yog tug luj dlua ndlais nyob sau Ntuj Ceebtsheej?”

²Yexus hu ib tug mivnyuas yau lug sawv ntawm puab xubndlag

³hab has tas, “Kuv qha tseeb rua mej has tas, yog mej tsi hloov mej lub sab kuas zoo le ib tug mivnyuas yau nuav lub, ces mej yuav tsi tau moog sau Ntuj Ceebtsheej.

⁴Tug kws txu fwjchim le tug mivnyuas yau nuav, tug ntawd yuav yog tug kws luj dlua dlais nyob sau Ntuj Ceebtsheej.

⁵Tug kws leeg yuav tug mivnyuas yau nuav ntawm kuv lub npe, kuj yog tug ntawd leeg yuav kuv.”

⁶“Yog leejtwg ua rua cov mivnyuas kws ntseeg kuv nuav ib tug ua txhum, ca le muab hlua khi ib txhib zeb kws luj dlai rua tug ntawd cejdlaab, hab coj nwg moog pov rua huv havtxwv yuav zoo dlua.

⁷Lub nplajteb nuav yuav raug puamtsuaj, rua qhov muaj tej kws ua rua tuabneeg ua txhum! Yeej yuav muaj tej ntawd lug, tabsis tug kws ua kuas muaj tej ntawd yuav raug kev puamtsuaj!

⁸“Yog koj txhais teg lossis koj txhais kutaw ua rua koj ua txhum, koj ca le muab txhais ntawd txav povtseg! Yog koj tu ib saab teg lossis ib saab kutaw, koj tau txujsa, zoo dlua le koj muaj ob txhais teg lossis ob txhais kutaw, hab muab koj pov rua huv lub cubtawg kws cig tsi paub tuag moog ibtxhis le.

⁹Hab yog koj ib saab qhovmuag ua rua koj ua txhum, koj ca le muab saab ntawd kaus povtseg! Koj muaj ib saab qhovmuag xwb, koj tau txujsa, zoo dlua le koj muaj ob saab qhovmuag, hab muab koj pov rua huv ntuj tawg.

¹⁰“Mej yuavtsum ceevfaaj, tsi xob saib tsi taug cov mivnyuas nuav ib tug: Kuv qha rua mej has tas, cov timtswv ceebtsheej kws nyob ntawm kuv Txiv tug kws nyob sau ntuj Ceebtsheej lub xubndlag naj nub tsomkwm cov mivnyuas nuav.

¹¹[Qhov kws Tuabneeg Leej Tub lug, yog lug nrhav cov kws yuam kev lawm.]

¹²“Mej xaav le caag? Muaj ib tug txivneej muaj ib puas tug yaaj, yog ib tug pluj lawm, nwg yeej yuav tso cuaj caum cuaj tug rua peg ntaav toj, hab moog nrhav tug kws pluj lawm.

¹³Kuv qha rua mej has tas, thaus nwg nrhav tau lawm, nwg zoo sab rua tug yaaj kws pluj lawm heev dlua le nwg zoo sab rua cuaj caum cuaj tug kws tsi pluj.

¹⁴Ib yaam nkaus le ntawd, mej leej Txiv tug kws nyob sau ntuj ceebtsheej yeej tsi xaav kuas cov mivnyuas nuav ib tug puamtsuaj le.

¹⁵“Yog koj ib tug kwvtij ua txhum rua koj, koj ca le moog qha nwg qhov txhum rua nwg thaus meb ob leeg xwb. Yog nwg noog koj lug, koj yuav tau nwg rov lug ua koj kwvtij le qub.

¹⁶Tabsis yog nwg tsi noog koj lug, koj ca le coj ib lossis ob tug nrug koj moog, txhaj lawv le Vaajtswv txujlug kws tau qha tseg has tas, ‘thaus koj moog qha ib tug qhov txhum rua nwg, koj yuavtsum coj ob peb leeg nrug koj moog ua timkhawv.’

¹⁷Tabsis yog nwg tsi noog puab lug, mej ca le moog pav txhua yaam qha rua cov ntseeg. Yog nwg tsi noog cov ntseeg lug hab, ces mej ca le suav has tas nwg yog lwm Tsaav Tuabneeg lossis yog ib tug tuabneeg sau se.

¹⁸“Kuv qha tseeb rua mej has tas, yaam kws mej txwv huv nplajteb nuav, Vaajtswv yuav txwv yaam ntawd sau ntuj ceebtsheej, yaam kws mej tso cai huv nplajteb nuav, Vaajtswv yuav tso cai yaam ntawd sau ntuj ceebtsheej.

¹⁹“Kuv qha rua mej has tas, yog mej cov kws nyob huv nplajteb nuav muaj ob leeg ua ib lub sab thov yaam twg, kuv Txiv tug kws nyob sau ntuj ceebtsheej yuav pub yaam ntawd rua obtug.

²⁰Rua qhov yog muaj ob lossis peb leeg tuaj nyob ua ke qhov twg tuav kuv lub npe thov, kuv yuav nrug puab nyob qhov ntawd.”

²¹Petus lug nug Yexus has tas, “Tug Tswv, yog kuv ib tug kwvtij pheej ua txhum rua kuv, kuv yuav zaam txim rua nwg pistsawg zag? Zaam xyaa zag los”?

²²Yexus teb has tas, “Tsi yog xyaa zag xwb, tabsis yog xyaa zag xyaa caum;

²³Ntuj Ceebtsheej pev ib yaam le ib tug vaajntxwv moog txheeb nwg tej ntawv saib nwg cov tubkhai puas muaj leejtwg tshuav nwg nqe.

²⁴Thaus nwg nyavnyuas pib txheeb, txawm muaj tuabneeg coj ib tug tubkhai kws tshuav vaajntxwv nqe ib plhom nyaj lug cuag vaajntxwv.

²⁵Tug tubkhai ntawd tsi muaj nyaj them, ces vaajntxwv txhaj has kuas ca le muab nwg, nwg quaspuj mivnyuas hab txhua yaam kws nwg muaj coj moog muag huv tuabsi, kuas tau nyaj lug them nwg tej nqe.

²⁶Tug tubkhai ntawd txawm txhus caug ndlua ntawm vaajntxwv kutaw hab thov has tas, ‘Thov koj ua sab ntev rua kuv, kuv maam le moog nrhav lug them rua koj huv tuabsi!’

²⁷Vaajntxwv hlub tug tubkhai ntawd, ces vaajntxwv txawm zaam tej nqe huv tuabsi rua nwg hab tso nwg moog lawm.

²⁸“Thaus tug tubkhai ntawd tawm moog, nwg moog ntsib ib tug kws yog puab tuab paab tubkhai. Tug ntawd tshuav nwg nqe ib puas lub nyaj xwb. Nwg txawm ntsab nkaus tug ntawd nyem rojpaas hab has tas, ‘Koj ca le them cov nqe kws koj tshuav kuv lug rua kuv taamsim nuav!’

²⁹Tug ntawd txhus caug ndlua thov nwg has tas, ‘Thov koj ua sab ntev rua kuv, kuv maam le nrhav lug them rua koj!’

³⁰Tabsis tug tubkhai ntawd tsi yib le, nwg txawm coj tug ntawd moog kaw rua huv tsev lojcuj moog txug nub kws tug ntawd them nqes taag.

³¹Thaus nwg tuab paab tubkhai pum nwg ua le ntawd, puab chim heev, puab txhaj moog qha zaaj ntawd rua vaajntxwv.

³²Vaajntxwv txawm hu tug tubkhai ntawd tuaj cuag nwg hab has tas, ‘Tug tubkhai kws sab phem! Kuv tub zaam tej nuj nqes kws koj tshuav kuv huv tuabsi rua koj lawm, vim koj thov kuv.

³³Tsimnyog koj yuavtsum hlub tug tubkhai kws yog koj ib paab, ib yaam le kuv tub hlub koj lawm.’

³⁴Vaajntxwv chim heev, nwg txawm kuas luas muab tug tubkhai ntawd coj moog kaw rua huv tsev lojcuj moog txug nub kws tug ntawd them nqes taag.”

³⁵Yexus xaus lug has tas, “Yog mej ib leeg tsi zaam txim rua ib leeg, kuv Txiv tug kws nyob sau ntuj ceebtsheej yuav ua ib yaam nkaus le ntawd rua mej hab.”