Read Hmong Njua Mathais 19 Bible Online

Mathais 19 - Hmong Njua bible

Mathais 19

¹Thaus Yexus qha tej ntawd taag lawm, nwg txawm tawm huv lub xeev Kalilais moog rua nraag lub xeev Yudas saab Dlej Yauladees tim u.

²Muaj tuabneeg coob coob nrug nwg moog, hab nyob qhov ntawd nwg khu puab txhua tug zoo mob huv tuabsi.

³Muaj cov Falixais qee leej tuaj cuag Yexus, puab xaub saib Yexus puas yuav has txhum. Puab nug Yexus has tas, “Peb txuj kevcai puas pub ib tug quasyawg twg muab nwg tug quaspuj nrauj, tsi has nwg ua txhum luj lossis ua txhum yau?”

⁴Yexus teb has tas, “Mej tsi tau nyeem Vaajtswv txujlug kws has tas, ‘Thaus chivkeeb Vaajtswv tau tsim txivneej hab quaspuj?’

⁵Hab has tas, ‘Tub yog vim le nuav tug txivneej txhaj tso nwg nam nwg txiv tseg hab moog nrug nwg tug quaspuj nyob, obtug yuav koom ua ib lub cev.’

⁶Obtug tsi yog ob leeg lawm, tabsis yog ib leeg xwb. Vaajtswv tub muab obtug lug txis ua txwj ua nkawm lawm, yog le ntawd tuabneeg tsi xob muab obtug cais.”

⁷Cov Falixais rov nug Yexus has tas, “Vim le caag Mauxes tsua tso cai rua tug quasyawg ua ntawv nrauj rua nwg tug quaspuj, ces nrauj tau?”

⁸Yexus teb has tas, “Qhov kws Mauxes tso cai rua mej nrauj quaspuj, tub yog vim mej tawv ncauj tsi muaj leejtwg has tau. Tabsis thaus chivkeeb yeej tsi muaj le ntawd.

⁹Kuv qha rua mej has tas, yog leejtwg tug quaspuj tsi tau moog ntxag hluas nraug, nwg ca le muab nrauj lawm, yog nwg moog yuav dlua quaspuj tshab, ces yog nwg ntxag luas quaspuj.”

¹⁰Cov thwjtim has rua Yexus has tas, “Yog yuav quaspuj yuav quasyawg zoo le ntawd, ces tsi xob yuav kuj zoo dlua?”

¹¹Yexus teb has tas, “Tsi yog txhua tug yuav ua tau le txujlug nuav qha, tabsis tsuas yog tug kws Vaajtswv pub rua txhaj ua tau xwb.

¹²Muaj qee leej tsi yuav quaspuj, rua qhov puab yeej zoo le ntawd thaus nruab thab lug: Muaj qee leej tsi yuav, rua qhov luas ua rua puab zoo le ntawd. Hab muaj qee leej tsi yuav, rua qhov puab xaav ua Vaajtswv teg num. Yog leejtwg coj tau lawv le txujlug nuav qha, ca le khaws coj.”

¹³Muaj tuabneeg coj tej mivnyuas yau tuaj cuag Yexus hab thov kuas nwg cev teg plhw cov mivnyuas hab foom koob moov rua puab, tabsis cov thwjtim tshev cov tuabneeg ntawd.

¹⁴Yexus has tas, “Ca le coj cov mivnyuas lug cuag kuv, tsi xob txwv puab, rua qhov Ntuj Ceebtsheej yog cov tuabneeg kws muaj lub sab mog sab muas ib yaam le cov mivnyuas yau nuav tug.”

¹⁵Thaus Yexus cev teg plhw cov mivnyuas ntawd taubhau taag, ces Yexus txawm tawm qhov chaw ntawd moog lawm.

¹⁶Muaj ib zag ib tug txivneej tuaj cuag Yexus hab nug has tas, “Xwbfwb, yaam twg yog yaam zoo kws kuv yuavtsum ua, kuv txhaj tau txujsa ntev dlhawv moog ibtxhis?”

¹⁷Yexus teb has tas, “Vim le caag koj nug kuv has txug yaam twg yog yaam zoo? Tsuas muaj tuab tug txhaj yog tug zoo xwb. Yog koj xaav tau txujsa, koj yuavtsum coj lawv le Vaajtswv txuj Kevcai.”

¹⁸Nwg rov nug Yexus has tas, “Yog nqai twg?” Yexus teb has tas, “Tsi xob tua tuabneeg; tsi xob ntxag luas quaspuj luas quasyawg; tsi xob ua tubsaab; tsi xob ua timkhawv tsi tseeb.

¹⁹fwm koj nam koj txiv; hab hlub kwvtij zej zog ib yaam le koj hlub koj lub cev.”

²⁰Tug hluas ntawd teb has tas, “Tej ko kuv tub coj txhua nqai huv tuabsi lawm. Tseem tshuav yaam twg kws kuv tsi tau ua hab?”

²¹Yexus has rua nwg tas, “Yog koj xaav ua tug kws zoo kawg nkaus, koj ca le moog muab koj tej qhov txhua chaw muag huv tuabsi hab muab cov nyaj ntawd faib rua cov tuabneeg pluag, koj txhaj yuav yog tug kws npluanuj nyob sau ntuj ceebtsheej; tom qaab ntawd koj ca le tuaj nrug kuv moog.”

²²Thaus tug hluas ntawd nov Yexus has le nuav, nwg nyuaj sab kawg hab tawm lawm, rua qhov nwg npluanuj heev.

²³Yexus has rua nwg cov thwjtim has tas, “Kuv qha tseeb rua mej has tas, ib tug tuabneeg npluanuj yuav moog Ntuj Ceebtsheej mas nyuaj kawg le.

²⁴Kuv has ntxiv rua mej has tas, ib tug ntxhuav nkaag lub qhov koob tseem yoojyim dlua ib tug tuabneeg npluanuj moog Vaajtswv lub Tebchaws.”

²⁵Thaus cov thwjtim nov le ntawd, puab xaav tsi thoob le. Puab nug has tas, “Yog le ntawd, leejtwg txhaj yuav dlim tau?”

²⁶Yexus tsaa qhovmuag saib puab hab teb has tas, “Tuabneeg ua tsi tau, tabsis Vaajtswv ua tau ib puas tsaav yaam huv tuabsi.”

²⁷Ces Petus has rua Yexus has tas, “Peb tub tso txhua yaam tseg hab nrug koj txug taav nuav, peb yuav tau dlaabtsi?”

²⁸Yexus has rua puab tas, “Kuv qha tseeb rua mej has tas, thaus Tuabneeg Leej Tub nyob sau lub zwmtxwv kws ci ntsaa ab huv lub nplajteb tshab, mas mej kaum ob leeg kws nrug kuv nuav yuav tau nyob sau kaum ob lub zwmtxwv, hab txav txim rua kaum ob xeem Yixalayees.

²⁹Hab txhua tug kws tso vaaj tse, tso kwvtij, tso nkauj muam, tso nam txiv, tso mivnyuas, hab tso laj teb, vim nwg ntseeg kuv, tug ntawd yuav tau ib puas npaug, hab nwg yuav tau txujsa ntev dlhawv moog ibtxhis.

³⁰Tabsis muaj ntau tug kws nwgnuav ua cov thawj yuav tau moog nyob tom tw, hab cov kws nwgnuav nyob tom tw yuav tau lug ua cov thawj.”