Read Hmong Njua Mathais 20 Bible Online

Mathais 20 - Hmong Njua bible

Mathais 20

¹“Ntuj Ceebtsheej pev ib yaam le ib tug tswv vaaj kws sawv ntxuv moog nrhav tub zug tuaj tu nwg lub vaaj txiv maab.

²Nwg has hum nrug cov tub zug ib nub twg ib lub nyaj, ces nwg txawm kuas cov tub zug moog tu nwg lub vaaj.

³Thaus cuaj teev, nwg rov moog tom kab, nwg pum ib cov tuabneeg ncig nkuj nkuag tsi muaj num ua.

⁴Nwg txawm has rua puab tas, ‘Mej ca le moog tu kuv lub vaaj txiv maab, kuv yuav muab nqe zug kuas tsimnyog rua mej.’

⁵Puab txawm moog lawm. Thaus kaum ob teev hab thaus peb teev, nwg kuj moog ua ib yaam le thawj ob zag kws nwg tau ua lug lawm hab.

⁶Thaus yuav laug txug tsib teev, nwg rov moog rua tom kab, nwg pum ib cov tuabneeg sawv ncig nkuj nkuag ntawd. Ces nwg has rua puab tas, ‘Vim le caag mej tuaj nyob ib nub dlawb dlawb ntawm nuav tsi ua dlaabtsi le?’ Puab teb has tas,

⁷‘Tub tsi muaj leejtwg ndlav peb.’ Nwg txhaj has rua puab tas, ‘Mej ca le moog tu kuv lub vaaj txiv maab hab.’

⁸“Thaus tsaus ntuj lawm, tug tswv vaaj kuas tug kws saib cov tub zug moog hu cov tub zug lug hab them nqe zug rua puab. Nwg has tas, ‘Koj xub muab rua cov kws tuaj tom qaab tsaiv, koj maam le muab rua cov kws xub tuaj.’

⁹Cov kws tuaj ua num thaus tsib teev, puab ib leeg tau ib lub nyaj.

¹⁰Cov kws xub tuaj xaav has tas, puab yuav tau ntau dlua cov kws tuaj tom qaab; tabsis puab ib leeg tsuas tau ib lub nyaj hab xwb.

¹¹Thaus muab nyaj rua puab taag lawm, puab txawm ywg rua tug tswv vaaj has tas,

¹²‘Cov tuabneeg kws tuaj ua num thaus yuav tsaus ntuj, puab nyavnyuas ua tau ib txoog teev xwb, peb tiv tshaav ua num ib nub tsaus ntuj los koj muab rua peb npaum le koj muab rua puab hab xwb!’

¹³Tug tswv vaaj teb rua puab cov ntawd ib tug has tas, ‘Phoojywg, tsi yog kuv ua tsi ncaaj rua koj, koj tub yeej zoo sab ua ib nub ib lub nyaj lawm los sav.

¹⁴Koj ca le nqaa koj lub nyaj hab moog tsev. Kuv zoo sab muab rua tug kws tuaj tom qaab npaum le kws kuv muab rua koj.

¹⁵Kuv tsi muaj cai muab kuv tej nyaj siv lawv le kuv pum zoo los? Koj pum kuv muaj sab dlawb, koj txawm khib los?’ ”

¹⁶Yexus xaus lug has tas, “Cov kws nwgnuav nyob tom tw yuav tau moog ua cov thawj, hab cov kws nwgnuav ua cov thawj, yuav tau lug nyob tom tw.”

¹⁷Thaus Yexus moog nraag lub nroog Yeluxalees, nwg coj nwg kaum ob tug thwjtim nrug nwg moog. Thaus puab taug kev moog, nwg has tuabywv rua puab tas,

¹⁸“Mej ua tuab zoo noog, peb yuav moog rua nraag lub nroog Yeluxalees. Nyob nraag, yuav muaj tuabneeg nteg Tuabneeg Leej Tub coj moog cob rua cov thawj ntawm cov povthawj hab cov xwbfwb kws qha Vaajtswv txuj Kevcai. Puab yuav txav txim coj nwg moog tua povtseg,

¹⁹hab muab nwg rua lwm Tsaav Tuabneeg, puab yuav thuam nwg hab ua saib tsi taug nwg, muab nwg nplawm, hab muab nwg ntsa rua sau ntoo khaublig, hab peb nub nwg yuav sawv rov qaab lug.”

²⁰Xenpedais tug quaspuj coj nwg ob tug tub tuaj cuag Yexus, nwg txhus caug ndlua ntawm Yexus kutaw hab thov ib yaam ntawm Yexus.

²¹Yexus nug nwg has tas, “Koj xaav tau dlaabtsi?” Nwg teb has tas, “Thov koj coglug rua kuv has tas, thaus koj lug ua Vaajntxwv lawm, koj yuav pub kuv ob tug tub, ib tug nyob ntawm koj saab xis hab ib tug nyob ntawm koj saab txhumphem.”

²²Yexus teb has tas, “Yaam kws meb thov ntawd, meb tsi totaub. Lub khob kws kuv yuav haus, meb puas haus taug?” Obtug teb has tas, “Wb haus taug.”

²³Yexus has rua obtug tas, “Meb yeej yuav haus taug lub khob kws kuv haus. Tabsis qhov kws meb ib leeg yuav nyob ntawm kuv saab xis, hab ib leeg yuav nyob ntawm kuv saab txhumphem, kuv tsi muaj cuabkaav muab rua meb. Ob lub chaw ntawd, kuv Txiv npaaj rua leejtwg, tug ntawd txhaj tau xwb.”

²⁴Thaus cov thwjtim kaum leej nov le ntawd, puab chim rua obtug.

²⁵Yexus hu cov thwjtim lug ua ke hab has rua puab tas, “Mej tub paub lawm has tas cov numtswv kws kaav tebchaws muaj fwjchim luj dlua cov pejxeem. Hab puab yuam kuas cov pejxeem ua lawv le puab has.

²⁶Tabsis mej cov tsi xob ua le ntawd. Yog mej cov leejtwg xaav ua tug hlub, tug ntawd yuavtsum ua mej tug tubkhai;

²⁷hab yog mej cov leejtwg xaav ua tug thawj, tug ntawd yuavtsum ua mej tug qhev.

²⁸Ib yaam le Tuabneeg Leej Tub, nwg lug nwg tsi tau kuas leejtwg tu nwg, tabsis nwg lug tu suavdlawg hab muab nwg txujsa lug txhwv ntau leej.”

²⁹Thaus Yexus hab nwg cov thwjtim taabtom tawm huv lub nroog Yelikaus moog, muaj tuabneeg coob coob lawv nwg qaab moog.

³⁰Muaj ob tug txivneej dligmuag nyob quastsawg ntawm ntug kev nov has tas Yexus taug kev tuaj, ces obtug txawm hu nrov nrov has tas, “Daviv tug Tub! Thov koj taabncuab wb hab!”

³¹Cov tuabneeg coob coob ntawd cheem obtug has tas, “Meb tsi xob has lug.” Tabsis obtug hajyam hu nrov nrov has tas, “Daviv tug Tub! Thov koj taabncuab wb hab!”

³²Yexus txawm nreg hab hu obtug lug cuag nwg, nwg nug obtug has tas, “Meb xaav kuas kuv paab meb dlaabtsi?”

³³Obtug teb has tas, “Tug Tswv, thov koj khu wb ob lub qhovmuag kuas pum kev!”

³⁴Yexus taabncuab obtug, nwg txawm cev teg moog kov obtug ob lub qhovmuag; ces taamsim ntawd obtug txawm pum kev, hab obtug nrug Yexus moog.