Read Hmong Njua Mathais 21 Bible Online

Mathais 21 - Hmong Njua bible

Mathais 21

¹Thaus Yexus hab nwg cov thwjtim moog yuav txug huv lub nroog Yeluxalees, puab moog txug lub zog Npefakhes kws nyob ntawm roob txiv ntoo roj. Yexus txawm khaiv ob tug thwjtim ua ntej moog

²hab qha obtug has tas, “Meb ca le ncaaj nraim moog rua huv lub zog kws nyob tom meb hauv ntej. Thaus meb moog txug meb yuav pum ob nam tub neeg luav khi ca qhov ntawd. Meb ca le dlaws hab caab lug rua kuv.

³Yog muaj leejtwg nug meb, meb ca le teb has tas, ‘Tug Tswv xaav siv’; ces tug ntawd yuav ca meb caab lug taamsim ntawd.”

⁴Muaj le nuav kuas tav lawv le tug cev Vaajtswv lug tau has tseg lawm has tas:

⁵“Ca le qha rua cov tuabneeg kws nyob huv lub nroog Xi-oos has tas, mej tug vaajntxwv taabtom lug cuag mej! Nwg txu fwjchim hab caij ib tug mivnyuas neeg luav lug.”

⁶Ob tug thwjtim txawm moog ua lawv le Yexus qha.

⁷Obtug txhaj caab tau ob nam tub neeg luav lug, obtug hle obtug ob lub tsho ntev lug pua tug mivnyuas neeg luav nrausqaum rua Yexus caij.

⁸Cov tuabneeg coob coob kws nrug Yexus moog ntawd muaj ibtxha hle puab tej tsho lug pua, hab ibtxha txav nplooj ntoos lug pua.

⁹Cov tuabneeg coob coob kws moog ua Yexus ntej hab cov kws lawv Yexus qaab qw nrov nrov has tas, “Ca le qhuas Daviv tug Tub! Thov Vaajtswv foom koob moov rua tug kws Vaajtswv khaiv lug! Ca le qhuas Vaajtswv tug kws nyob sau ntuj ceebtsheej!”

¹⁰Thaus Yexus moog txug huv lub nroog Yeluxalees lawm, cov tuabneeg kws nyob huv lub nroog raag zum zawg hab sis nug has tas, “Tug nuav yog leejtwg?”

¹¹Cov tuabneeg coob coob ntawd teb has tas, “Tug nuav yog Yexus kws yog ib tug cev Vaajtswv lug, nwg tuaj peg lub nroog Naxales kws nyob huv xeev Kalilais tuaj.”

¹²Yexus moog rua ntawm lub Tuamtsev, hab ntab cov tuabneeg kws tuaj ua laag ua luam ibncig ntawm lub Tuamtsev tawm moog. Nwg muab cov tuabneeg pauv nyaj tej rooj hab cov tuabneeg kws muag nquab tej rooj nyob ntxeev pis hlo.

¹³Yexus has rua puab tas, “Vaajtswv Txujlug sau tseg has tas, ‘Suavdlawg yuav hu kuv lub Tuamtsev has tas yog qhov chaw thov Vaajtswv.’ Tabsis mej muab ua qhov chaw rua tubsaab nkaum!”

¹⁴Muaj cov tuabneeg dligmuag hab cegtawv tuaj cuag Yexus huv lub Tuamtsev, hab Yexus khu puab txhua tug zoo huv tuabsi.

¹⁵Thaus cov thawj ntawm cov povthawj hab cov xwbfwb kws qha Vaajtswv txuj Kevcai pum tej txujci tseemceeb kws Yexus ua ntawd, hab nov cov mivnyuas yau kws tuaj nyob huv lub Tuamtsev qw has tas, “Ca le qhuas Daviv tug Tub!” Ces puab chim kawg le.

¹⁶Puab has rua Yexus has tas, “Koj tsi nov tej lug kws cov mivnyuas ntawd has los?” Yexus teb has tas, “Kuv nov, mej tsi tau nyeem Vaajtswv txujlug kws has tas, ‘Koj tub cob cov mivnyuas yau hab cov mivnyuas mog lab kuas paub qhuas Vaajtswv lawm.’ ”

¹⁷Yexus txawm ncaim puab hab tawm huv lub nroog moog pw tom lub zog Npethanis lawm.

¹⁸Nub tom qaab thaus sawv ntxuv, Yexus taug kev rov moog rua tom lub nroog, nwg tshaib plaab.

¹⁹Nwg pum ib tsob txiv ncuav pas nyob ntawm ntug kev, nwg txawm moog saib. Tabsis tsi pum muaj txiv le, tsuas muaj nplooj xwb. Yexus has rua tsob ntoo tas, “Txij nuav moog koj yuav tsi tau txi txiv ib zag le lawm!” Taamsim ntawd tsob txiv ncuav pas txawm ca le qhuav lawm.

²⁰Thaus cov thwjtim pum le ntawd puab xaav tsi thoob hab has tas, “Ua le caag tsob txiv ncuav pas nuav yuav tuag sai ua luaj le ntawd?”

²¹Yexus teb has tas, “Kuv qha tseeb rua mej has tas, yog mej ntseeg tag tag, mej yeej muaj cuabkaav ua tau ib yaam le kuv ua rua tsob txiv ncuav pas nuav. Tsi taag le ntawd xwb, yog mej has rua lub roob nuav has tas, ‘Ca le txaav lawm nraag dlej havtxwv,’ ces lub roob yeej yuav moog lawv le mej has.

²²Yog mej ntseeg tag, mej thov yaam twg, mej yuav tau yaam ntawd.”

²³Yexus rov moog rua huv lub Tuamtsev; thaus nwg taabtom qha, cov thawj ntawm cov povthawj, hab cov txwjlaug txawm tuaj nug Yexus has tas, “Ua le caag koj muaj cai tuaj ua tej nuav? Leejtwg tso cai rua koj?”

²⁴Yexus teb puab has tas, “Kuv yuav nug mej ib lus, yog mej teb tau, kuv maam le qha rua mej saib ua le caag kuv muaj cai ua tej nuav.

²⁵Leejtwg tso cai rua Yauhaas muab tuabneeg ua kevcai raus dlej, Vaajtswv lossis tuabneeg?” Puab txawm sis thaam has tas, “Yog peb teb has tas, ‘Vaajtswv kuas Yauhaas ua,’ nwg yuav has rua peb tas, ‘Vim le caag mej tsua tsi ntseeg Yauhaas tej lug?’

²⁶Yog peb teb has tas, ‘Tuabneeg kuas Yauhaas ua,’ Peb ntshai nyob tsaam cov pejxeem tsua ua phem rua peb, rua qhov suavdlawg yeej paub has tas Yauhaas yog ib tug cev Vaajtswv lug.”

²⁷Yog le ntawd, puab txhaj teb Yexus has tas, “Peb tsi paub!” Yexus has rua puab tas, “Yog le ntawd, kuv yuav tsi qha rua mej paub has tas yog leejtwg tso cai rua kuv ua tej nuav hab.”

²⁸“Mej xaav le caag? Muaj ib tug txivneej muaj ob tug tub. Leej txiv moog has rua tug tub hlub tas, ‘Mivtub, nub nua koj moog tu kuv lub vaaj txiv maab.’

²⁹Tug tub hlub teb has tas, ‘Kuv tsi moog.’ Tabsis tom qaab ntawd nwg txawm moog lawm.

³⁰Leej txiv tsua moog has rua tug tub yau ib yaam le ntawd hab. Tug tub yau teb has tas, ‘Txiv, kuv maam le moog.’ Tabsis nwg tsi moog.

³¹Ob tug tub nuav, tug twg yog tug kws noog leej txiv lug?” Puab teb has tas, “Yog tug tub hlub.” Yexus has rua puab tas, “Kuv qha rua mej has tas, cov tuabneeg sau se hab cov namndlav yuav xub tau moog rua huv Vaajtswv lub Tebchaws ua ntej mej.

³²Rua qhov Yauhaas tug kws muab tuabneeg ua kevcai raus dlej tub lug qha txujkev ncaaj nceeg rua mej, tabsis mej tsi ntseeg, tsuas yog cov tuabneeg sau se hab cov namndlav txhaj ntseeg xwb. Txawm yog mej pum le ntawd los mej tsi tso mej tej kev txhum tseg hab lug ntseeg nwg tej lug.”

³³Yexus has tas, “Mej noog, kuv yuav qha ib zaaj lug pevtxwv rua mej. Muaj ib tug tswv vaaj, nwg xov tau ib lub vaaj hab cog txiv maab rua huv, nwg khawb ib lub qhov tsuam txiv maab hab ua lub chaw tsomfaaj zuv. Nwg muab tso rua ib cov tuabneeg tu sis faib cov txiv, ces nwg txawm moog rua lwm tebchaws lawm.

³⁴Thaus txug lub caij dle txiv maab, nwg txawm khaiv nwg cov tubkhai moog sau cov txiv maab kws yog nwg tug lug rua nwg.

³⁵Tabsis cov tuabneeg kws tu lub vaaj txawm muab tug tswv cov tubkhai nteg, muab ib tug ntaus, muab ib tug tua, hab muab pobzeb ntaus ib tug.

³⁶Tug tswv khaiv dlua ib cov tubkhai coob dlua thawj paab moog. Cov tuabneeg kws tu lub vaaj kuj ua phem rua cov tubkhai ntawd ib yaam nkaus le thawj zag hab.

³⁷Thaus kawg tug tswv vaaj khaiv nwg tug tub moog cuag puab. Nwg xaav has tas, ‘Puab yuav fwm kuv tug tub.’

³⁸Tabsis thaus cov tuabneeg kws tu lub vaaj pum tug tswv tug tub tuaj, puab sis thaam has tas, ‘Tug nuav yog tug tswv vaaj tug tub, peb ca le muab nwg tua povtseg, peb txhaj tau nwg lub vaaj!’

³⁹Puab txawm nteg kag nwg, muab nwg thawb moog rua saab ntug vaaj nrau hab muab nwg tua povtseg.”

⁴⁰Yexus nug has tas, “Thaus tug tswv vaaj rov qaab lug, nwg yuav ua le caag rua cov tuabneeg kws tu lub vaaj ntawd?”

⁴¹Puab teb has tas, “Nwg yuav muab cov tuabneeg sab phem kws tu lub vaaj ntawd tua povtseg huv tuabsi, hab muab lub vaaj ntawd rua lwm cov tu. Thaus txug lub caij faib txiv maab, puab yuav faib cov kws yog nwg tug rua nwg.”

⁴²Yexus has rua puab tas, “Mej tsi tau nyeem Vaajtswv Txujlug kws has tas, ‘Lub pobzeb kws cov kws ua tsev muab povtseg, lub ntawd tub lug ua lub thawj lawm. Qhov nuav yog tug Tswv ua; Peb pum le ntawd, peb xaav tsi thoob le!’ ”

⁴³Yexus has ntxiv tas, “Kuv qha rua mej has tas Vaajtswv yuav muab nwg lub Tebchaws tshem tawm ntawm mej moog rua ib tsaav tuabneeg kws noog Vaajtswv lug.”

⁴⁴[Yog leejtwg qaug tsoo lub pobzeb ntawd, tug ntawd lub cev yuav tawg taag, yog lub pobzeb ntawd poob lug tsoo leejtwg, tug ntawd lub cev yuav ntsoog taag huv tuabsi.]

⁴⁵Thaus cov thawj ntawm cov povthawj hab cov Falixais nov tej lug pevtxwv kws Yexus qha ntawd, puab paub has tas yog Yexus has txug puab.

⁴⁶Ces puab txawm xaav nteg Yexus taamsim ntawd, tabsis puab ntshai cov pejxeem, rua qhov suavdlawg yeej paub has tas Yexus yog ib tug cev Vaajtswv lug.