Read Hmong Njua Mathais 22 Bible Online

Mathais 22 - Hmong Njua bible

Mathais 22

¹Yexus has dlua ob peb zaaj lug pevtxwv rua suavdlawg noog has tas,

²“Ntuj Ceebtsheej pev ib yaam le ib tug vaajntxwv yuav nyaab rua nwg tug tub hab noj tshoob.

³Vaajntxwv txawm khaiv nwg cov tubkhai moog hu cov qhua kws nwg tub caw lawm kuas tuaj nrug nwg noj tshoob, tabsis tsi muaj leejtwg tuaj le.

⁴Nwg txhaj khaiv dlua ib paab tubkhai moog has rua cov qhua kws nwg tub caw lawm has tas, ‘kuv rooj tshoob, kuv tub npaaj txhij lawm. Kuv tej saam nyuj hab kuv tej mivnyuas nyuj rog rog, kuv tub tua hab ua sav taag lawm, mej ca le tuaj noj.’

⁵Tabsis cov qhua ntawd tsi muaj leejtwg quavntsej le, nyag txawm moog ua nyag num taag lawm: tug moog ua teb los muaj, tug moog ua luam los muaj,

⁶dlua le tej tseem nteg cov tubkhai ntawd, muab puab ntaus hab muab tua povtseg.

⁷Vaajntxwv chim heev; nwg txawm txhij nwg cov tubrog moog muab cov tuabneeg tua tuabneeg ntawd tua povtseg, hab muab puab lub nroog hlawv taag huv tuabsi.

⁸Vaajntxwv txawm hu nwg cov tubkhai lug hab has rua puab tas, ‘Kuv rooj tshoob, kuv tub npaaj txhij lawm, tabsis cov tuabneeg kws kuv caw ntawd, puab tsi tsimnyog tuaj noj.

⁹Mej ca le moog rua tom tej kev luj, mej ntsib leejtwg los hu kuas puab ca le tuaj noj kuv rooj tshoob nuav.

¹⁰Ces cov tubkhai txawm tawm moog rua tom tej kev, tej tuabneeg kws puab ntsib, tsi has tug zoo tug phem los puab hu kuas tuaj huv tuabsi; suavdlawg tuaj nyob puv nkaus vaajntxwv tsev.

¹¹“Thaus vaajntxwv lug saib cov qhua kws tuaj, nwg pum ib tug txivneej kws naav rig tsho tsi phim rooj tshoob.

¹²Vaajntxwv nug has tas, ‘Phoojywg, koj tub tsi naav cev rig tsho ua tshoob, ua le caag koj tsua tuaj huv nuav?’ Tabsis tug ntawd has tsi taug ib lus le.

¹³Vaajntxwv txawm has rua vaajntxwv cov tubkhai has tas, ‘Mej ca le muab tug ntawd paav teg paav taw, hab muab nwg pov rua saab nrau qhov kws tsaus ntuj nti. Nyob qhov ntawd nwg yuav quaj qw tum nav quas qawv.’ ”

¹⁴Yexus xaus lug has tas, “Cov tuabneeg kws tau hu lawm muaj coob, tabsis cov kws xaiv tau muaj tsawg.”

¹⁵Cov Falixais txawm tawm moog saablaaj has tas, puab yuav nug le caag, Yexus txhaj has txhum.

¹⁶Puab khaiv puab cov thawj qee leej hab Helauj cov qee leej tuaj cuag Yexus, hab nug has tas, “Xwbfwb, peb paub has tas koj yog tug ncaaj nceeg, hab qha Vaajtswv txujlug tseeb rua tuabneeg, koj tsi xaiv leejtwg ntsejmuag le, txawm yog puab yuav nyam hab tsi nyam los xij.

¹⁷Koj qha rua peb saib koj xaav le caag? Yog peb them se rua Xixas puas txhum peb txuj kevcai los tsi txhum?”

¹⁸Yexus tub paub puab lub sab xaav phem lawm, nwg txhaj has rua puab tas, “Cov nam tuabneeg ntsejmuag ncaaj sab nkhaus! Mej tuaj sim kuv ua dlaabtsi?

¹⁹Ca le muab lub nyaj kws yuav coj moog them se ntawd lug rua kuv saib!” Puab txawm muab lub nyaj rua Yexus.

²⁰Yexus nug puab has tas, “Lub ntsejmuag hab lub npe kws sau rua ntawm lub nyaj nuav yog leejtwg lub?”

²¹Puab teb has tas, “Yog Xixas lub.” Yexus has rua puab tas, “Yaam kws yog Xixas le, ca le muab rua Xixas hab yaam kws yog Vaajtswv le, ca le muab rua Vaajtswv.”

²²Thaus puab nov le ntawd, puab xaav tsi thoob le; ces puab txawm tso Yexus tseg hab tsiv lawm.

²³Tuab nub ntawd cov Xadukais qee leej tuaj cuag Yexus. Puab yog cov kws tsi ntseeg has tas, tuabneeg yuav sawv huv qhov tuag rov qaab lug.

²⁴Puab nug Yexus has tas, “Xwbfwb, Mauxes has tas, yog muaj ib tug quasyawg tuag thaus nwg tug quaspuj tsi tau muaj mivnyuas, nwg tug kwv yuavtsum yuav tug namtij, tug tijlaug txhaj muaj xeebntxwv.

²⁵Yaav taag lug huv peb lub zog nuav muaj xyaa leej kwvtij. Tug tijlaug yuav quaspuj, tabsis tseem tsi tau muaj mivnyuas, nwg txawm tuag lawm, tso tug quaspuj rua tug kwv yuav.

²⁶Thaus tseem tsi tau muaj mivnyuas tug kwv txawm tuag lawm hab. Tug kwv peb moog txug tug kwv xyaa, puab puavleej ua ib yaam nkaus le ntawd, hab puab tuag taag huv tuabsi.

²⁷Thaus kawg tug quaspuj ntawd txawm tuag lawm hab.

²⁸Yog le ntawd, nub kws cov tuabneeg tuag sawv rov qaab lug, tug quaspuj ntawd yuav yog tug twg tug quaspuj? Rua qhov puab puavleej tau yuav nwg huv tuabsi lawm.”

²⁹Yexus teb puab has tas, “Mej xaav yuam kev lawm! Rua qhov mej tsi totaub Vaajtswv txujlug hab tsi paub Vaajtswv lub fwjchim.

³⁰Thaus cov tuabneeg kws tuag lawm sawv rov qaab lug, puab yuav zoo ib yaam le cov timtswv kws nyob sau ntuj ceebtsheej, puab tsi yuav quaspuj tsi yuav quasyawg lawm.

³¹Mej tsi tau nyeem zaaj kws Vaajtswv tsaa cov tuabneeg tuag sawv rov qaab lug los? Vaajtswv tub qha rua mej lawm has tas,

³²‘Kuv yog Anplahaas tug Vaajtswv, Ixaj tug Vaajtswv, hab Yakhauj tug Vaajtswv.’ Vaajtswv tsi yog cov tuabneeg tuag tug Vaajtswv, tabsis yog cov tuabneeg caj tug Vaajtswv.”

³³Thaus cov tuabneeg coob coob nov tej kws Yexus qha ntawd, puab xaav tsi thoob le.

³⁴Thaus cov Falixais nov has tas cov Xadukais tsi muaj lug teb tau Yexus le, puab txawm tuaj ua ke saablaaj,

³⁵muaj ib tug xwbfwb qha Vaajtswv txuj Kevcai kws nyob huv puab paab ntawd, nwg xaub Yexus has tas,

³⁶“Xwbfwb, Vaajtswv txuj Kevcai nqai twg yog nqai kws tseemceeb dlua ndlais huv tuabsi?”

³⁷Yexus teb has tas, “ ‘Hlub tug Tswv kws yog mej tug Vaajtswv kuas kawg sab kawg ntsws, kawg plaab kawg plawv, hab kawg mej tug dlaag tug zug.’

³⁸Nqai nuav txhaj yog nqai kws tseemceeb dlua ndlais.

³⁹Hab nqai ob kws tseemceeb, has le nuav has tas: ‘Hlub mej tej kwvtij zej zog ib yaam le mej hlub mej lub cev.’

⁴⁰Mauxes txuj Kevcai hab cov cev Vaajtswv lug tej lug qha puavleej nyob taagnrho huv ob nqai nuav.”

⁴¹Thaus cov Falixais taabtom saablaaj ua ke, Yexus nug puab has tas,

⁴²“Mej xaav le caag txug tug Mexiyas? Nwg yog leejtwg tug Tub?” Puab teb has tas, “Nwg yog Daviv Tub.”

⁴³Yexus rov nug puab has tas, “Yog le caag Vaaj Ntsujplig txhaj tshoov Daviv sab, kuas Daviv hu nwg has tas, ‘Tug Tswv’ Daviv has tas:

⁴⁴‘Tug Tswv has rua kuv tug Tswv tas, Koj ca le lug nyob ntawm kuv saab xis moog txug thaus kuv muab koj cov yeebncuab lug rua koj tsuj.’

⁴⁵Yog Daviv tub hu nwg has tas, ‘Tug Tswv,’ yuav ua le caag has tau tas, tug Mexiyas yog Daviv tug Tub?”

⁴⁶Tsi muaj leejtwg teb taug Yexus ib lus le. Txij nub ntawd lug, tsi muaj leejtwg kaam nug Yexus le lawm.