Read Hmong Njua Mathais 23 Bible Online

Mathais 23 - Hmong Njua bible

Mathais 23

¹Tom qaab ntawd Yexus has rua cov tuabneeg coob coob hab nwg cov thwjtim has tas:

²“Cov xwbfwb kws qha Vaajtswv txuj Kevcai hab cov Falixais yog cov kws muaj cuabkaav txhais Mauxes txuj Kevcai.

³Yog le ntawd, mej yuavtsum noog puab lug hab ua lawv le tej lug kws puab qha, tabsis tsi xob xyum ua lawv le puab ua; rua qhov puab tsi ua lawv le puab qha.

⁴Puab muab tej nraa nyaav lug nog rua suavdlawg ris, tabsis puab tub tsi kaam cev puab tug ntivteg moog paab thab tej nraa ntawd le.

⁵Puab ua yaam twg puab xaav ua kuas suavdlawg qhuas puab xwb. Puab xaws tej lub naab miv miv ntim Vaajtswv txujlug, muab paav rua ntawm puab hauvplaj hab ntawm puab tej ncej npaab, puab naav tej tsho ntev ntev kws ntxhoo lwg kaab!

⁶Thaus muaj rooj noj rooj haus hab thaus puab moog rua huv tej tsev saablaaj, puab moog xaiv nyob lub chaw zoo xwb.

⁷Thaus puab moog tom tej kab, puab nyam kuas suavdlawg fwm puab hab hu puab has tas, ‘Xwbfwb.’

⁸Tsi xob ca leejtwg hu mej has tas ‘Xwbfwb,’ rua qhov mej suavdlawg puavleej yog kwvtij huv tuabsi, hab mej tsuas muaj tuab tug xwbfwb xwb.

⁹Cov tuabneeg kws nyob huv nplajteb nuav, mej tsi xob hu leejtwg has tas, ‘Txiv,’ rua qhov mej tsuas muaj tuab leeg Txiv tug kws nyob sau ntuj ceebtsheej xwb.

¹⁰Hab tsi xob ca leejtwg hu mej has tas, ‘Tug Tswv,’ rua qhov mej tsuas muaj tuab tug Tswv kws yog tug Mexiyas xwb.

¹¹Mej cov leejtwg xaav ua tug hlub, tug ntawd yuavtsum ua mej suavdlawg qhev.

¹²Tug kws tsaav fwjchim, Vaajtswv yuav txu tug ntawd lub fwjchim, hab tug kws txu fwjchim, Vaajtswv yuav tsaav tug ntawd lub fwjchim.

¹³“Cov xwbfwb kws qha Vaajtswv txuj Kevcai hab cov Falixais kws ntsejmuag ncaaj sab nkhaus, mej yuav raug kev puamtsuaj! Rua qhov mej kaw qhovrooj tsi pub leejtwg moog Ntuj Ceebtsheej. Txawm yog mej los mej tub tsi moog huv, hab cov kws xaav moog los mej tseem txwv tsi pub puab moog.

¹⁴[Cov xwbfwb kws qha Vaajtswv txuj Kevcai hab cov Falixais kws ntsejmuag ncaaj sab nkhaus, mej yuav raug kev puamtsuaj! Mej txeeb cov puj ntsuag tej vaaj tse lug ua mej tug, hab ua txuj thov Vaajtswv ntev ntev, kuas suavdlawg qhuas mej. Vim le ntawd mej yuav raug txim nyaav dlua suavdlawg!]

¹⁵“Cov xwbfwb kws qha Vaajtswv txuj Kevcai hab cov Falixais kws ntsejmuag ncaaj sab nkhaus, mej yuav raug kev puamtsuaj! Mej caij nkoj hlaa dlej havtxwv moog thoob tebchaws nrhav kuas tau ib tug lug coj mej txuj kevcai; tabsis thaus mej nrhav tau lawm, mej ua rua tug ntawd tsimnyog poob rua huv ntuj tawg tshaaj mej ob npaug!

¹⁶“Cov tuabneeg dligmuag kws coj lwm tug kev, mej yuav raug kev puamtsuaj! Mej qha has tas, ‘Yog leejtwg tuav txug lub Tuamtsev coglug, yog nwg tsi ua lawv le nwg coglug los tau; tabsis yog nwg tuav txug tej nyaj kub kws nyob huv lub Tuamtsev coglug, nwg yuavtsum ua lawv le nwg tau coglug tseg lawm.’

¹⁷Cov tuabneeg dligmuag kws ruag! Yaam twg tseemceeb dlua? Tej kub lossis lub Tuamtsev kws ua rua tej kub ntawd tseemceeb?

¹⁸Hab mej tseem qha has tas, ‘Yog leejtwg tuav txug tej thaaj fij coglug, nwg tsi ua lawv le nwg coglug los tau. Tabsis yog nwg tuav txug tej khoom fij kws nyob sau lub thaaj coglug, nwg yuavtsum ua lawv le nwg tau coglug lawm.’

¹⁹Cov tuabneeg dligmuag! Yaam twg tseemceeb dlua? Tej khoom fij kws nyob sau lub thaaj, lossis lub thaaj kws ua rua tej khoom ntawd muaj nqes?

²⁰Yog le ntawd, thaus leejtwg tuav txug lub thaaj fij kws rau tej khoom kws fij rua Vaajtswv, yog nwg tuav txug lub thaaj hab cov khoom fij kws nyob sau lub thaaj huv tuabsi;

²¹hab thaus leejtwg tuav txug lub Tuamtsev coglug, ces yog tuav txug lub Tuamtsev hab tug Vaajtswv kws nyob huv lub Tuamtsev ntawd coglug;

²²hab thaus leejtwg tuav txug lub ntuj coglug, ces yog nwg tuav txug lub zwmtxwv hab tug kws nyob sau lub zwmtxwv ntawd coglug.

²³“Cov xwbfwb kws qha Vaajtswv txuj Kevcai hab cov Falixais kws ntsejmuag ncaaj sab nkhaus, mej yuav raug puamtsuaj! Mej muab tej txumlom, tsi has pumhum, zaub txhwb hab xyaab txob, ib feem kaum rua Vaajtswv, tabsis mej tsi ua lawv le tej lug tseemceeb kws Vaajtswv txuj Kevcai qha kuas tuabneeg ua ncaaj nceeg, muaj kev taabncuab, hab ua lub sab ncaaj. Tsimnyog mej ua lawv le tej lug qha nuav, hab tsi xob tso lwm nqai tseg.

²⁴Cov tuabneeg dligmuag kws coj lwm tug kev! Tug yoov poob rua huv cov dlej kws mej yuav haus, mej tseem muab lim huv tuabsi, tabsis mej tub nqog ib tug ntxhuav lawm mej tsi paub!

²⁵“Cov xwbfwb kws qha Vaajtswv txuj Kevcai hab cov Falixais kws ntsejmuag ncaaj sab nkhaus! Mej yuav raug kev puamtsuaj! Mej ibtxwm ntxuav taig ntxuav khob saab nrau kuas huv huv, tabsis saab huv puv nkaus tej kev phem kev qas hab sab hlub.

²⁶Cov Falixais kws dligmuag! Yog mej xub ntxuav taig ntxuav khob saab huv kuas huv lawm, ces saab nrau yeej yuav huv hab.

²⁷“Cov xwbfwb kws qha Vaajtswv txuj Kevcai hab cov Falixais kws ntsejmuag ncaaj sab nkhaus! Mej yuav raug kev puamtsuaj! Mej zoo ib yaam le lub ntxaa kws pleev moov sib saab nrau dlawb paug, tabsis saab huv puv nkaus pobtxhaa tuabneeg tuag hab tsw lwj ntxag xwb.

²⁸Mej zoo ib yaam nkaus le ntawd, suavdlawg saib saab nrau, suavdlawg xaav has tas, mej yog tuabneeg zoo, tabsis mej yog tuabneeg ntsejmuag ncaaj sab nkhaus, hab ua txhum.

²⁹“Cov xwbfwb kws qha Vaajtswv txuj Kevcai hab cov Falixais kws ntsejmuag ncaaj sab nkhaus! Mej yuav raug kev puamtsuaj! Mej txhim cov cev Vaajtswv lug tej ntxaa zoo nkauj heev, hab ua rua tej pemthuam kws tuabneeg puab ncu txug cov tuabneeg ncaaj nceeg thaus u, kuas zoo nkauj.

³⁰Hab mej has tas, ‘Yog peb nyob tam kws peb cov yawmkoob nyob, peb yuav tsi nrug puab tua cov cev Vaajtswv lug.’

³¹Mej has le ntawd, kuj yog mej leeg has tas, mej yog cov kws tua cov cev Vaajtswv lug ntawd cov xeebntxwv ntaag!

³²Yog le ntawd, mej ca le ua tej kws mej cov yawmkoob tau ua lawm kuas tav!

³³Cov nam naab, hab naab cov mivnyuas! Mej xaav has tas, mej yuav tsi raug txav txim hab yuav tsi poob moog rua huv ntuj tawg nua los?

³⁴Kuv qha tseeb rua mej has tas, kuv yuav khaiv cov kws cev Vaajtswv lug, cov tuabneeg muaj tswvyim, hab ib cov xwbfwb tuaj qha mej; mej yuav muab qee leej tua povtseg, muab qee leej ntsa rua sau ntoo khaublig, muab qee leej nplawm huv tej tsev saablaaj hab ntab puab tsiv ib lub nroog moog rua ib lub nroog.

³⁵Vim le ntawd, mej yuav tau ris cov tuabneeg kws tua cov kws tsi tau ua txhum lub txim. Txij thaus Anpees tug kws tsi muaj txim raug tua lug txug thaus mej tua Npelekhiyas tug tub Xakhaliyas ntawm lub Tuamtsev hab lub thaaj fij kis nruab nraab.

³⁶Kuv qha tseeb rua mej has tas, cov tuabneeg tam nuav yuav tau ris cov tuabneeg kws tua tuabneeg ntawd lub txim huv tuabsi!”

³⁷“Yeluxalees, Yeluxalees! Koj muab cov kws cev Vaajtswv lug tua povtseg, koj muab pobzeb ntaus cov tubkhai kws Vaajtswv khaiv lug qha koj! Muaj ntau zag kuv tub yuav muab koj cov pejxeem lug puag, ib yaam le tug puj qab cuab nwg cov mivnyuas lug puag rua huv nwg ob phob tis, tabsis koj tsi kaam ca kuv ua le ntawd!

³⁸Nwgnuav koj lub Tuamtsev yuav raug muab tso tseg nyob qhuav nkuag ca.

³⁹Kuv qha rua koj has tas, txij nuav moog koj yuav tsi pum kuv moog txug nub kws koj has tas, ‘Thov Vaajtswv foom koob moov rua tug kws Vaajtswv khaiv lug.’ ”