Read Hmong Njua Mathais 24 Bible Online

Mathais 24 - Hmong Njua bible

Mathais 24

¹Thaus Yexus taabtom tawm ntawm lub Tuamtsev moog, nwg cov thwjtim txawm taw teg kuas Yexus saib tej tsev kws nyob ibncig lub Tuamtsev.

²Yexus has tas, “Yog tag, mej tub pum tej tsev nuav lawm? Tabsis kuv qha tseeb rua mej has tas, tej pobzeb kws muab sis dlhos ntawd txhua lub yuav pluam nyag nyob nyag taag huv tuabsi.”

³Thaus Yexus nyob peg lub Roob Txiv Ntoo Roj, nwg cov thwjtim lug cuag nwg tuabywv hab nug has tas, “Thov koj qha rua peb saib thaus twg maam le muaj tej nuav? Hab yuav muaj yaam twg qha rua peb paub has tas, tub txug lub sijhawm kws koj yuav lug hab lub nplajteb yuav kawg.”

⁴Yexus teb has tas, “Mej yuavtsum ceevfaaj, tsi xob pub leejtwg dlaag ntxag tau mej yuam kev.

⁵Yuav muaj ntau leej tuav kuv lub npe dlaag ntxag mej has tas, ‘Kuv yog tug Mexiyas!’ Hab puab yuav dlaag ntxag ntau leej yuam kev.

⁶Mej yuav nov suab ntaaj suab rag nyob ze mej hab yuav nov tej tebchaws kws nyob dleb ua tsuv ua rog; mej tsi xob poob sab, yeej yuav muaj tej ntawd, tabsis tej ntawd tsi tau qha has tas tub txug lub sijhawm nplajteb kawg lawm.

⁷Ib lub tebchaws yuav sawv tawmtsaam ib lub tebchaws; hab ib tsaav tuabneeg yuav sawv tawmtsaam ib tsaav tuabneeg. Yuav muaj kev tshaib kev nqhes hab aav yuav qeeg txhua qhov.

⁸Tej ntawd zoo ib yaam le tug quaspuj kws nyavnyuas pib mob plaab yuav yug mivnyuas.

⁹“Thaus ntawd yuav muaj tuabneeg nteg mej coj moog tsimtxom hab muab mej tua povtseg. Txhua tsaav tuabneeg yuav ntxub mej, vim mej yog cov kws ntseeg kuv.

¹⁰Lub sijhawm ntawd yuav muaj ntau leej tso kev ntseeg tseg; puab ib leeg yuav ntxeev sab rua ib leeg hab ib leeg yuav ntxub ib leeg.

¹¹Yuav muaj cov cevlug cuav coob leej dlaag ntxag kuas tuabneeg coob leej yuam kev.

¹²Thaus tej kev phem fuam luj heev, suavdlawg yuav tsi txawj sis hlub lawm.

¹³Tabsis tug kws ua sab ntev moog txug nub kawg, tug ntawd yuav dlim.

¹⁴Thaus muaj tuabneeg moog qha Txujmoo Zoo kws has txug Ntuj Ceebtsheej moog thoob qaab ntuj hab ua timkhawv rua txhua tsaav tuabneeg paub lawm, ces thaus ntawd tub yuav txug lub sijhawm kawg.

¹⁵“Mej yuav pum yaam kws phem kawg nkaus tso rua huv qhov chaw dlawbhuv, lawv le Daniyees tug kws cev Vaajtswv lug tau has tseg lawm.” (Tug kws nyeem zaaj nuav, ca le totaub!)

¹⁶“Thaus ntawd cov tuabneeg kws nyob huv xeev Yudas ca le tsiv moog rua peg tej roob.

¹⁷Tug kws nyob nrau zoov, tsi xob moog nqaa ib yaam dlaabtsi huv tsev.

¹⁸Tug kws nyob tom teb, tsi xob rov lug nqaa nwg lub tsho ntev.

¹⁹Lub sijhawm ntawd tej quaspuj kws suab mivnyuas hab cov quaspuj kws muaj mivnyuas mog noj mig yuav txomnyem kawg le!

²⁰Mej ca le thov Vaajtswv paab kuas mej tsi xob tau tsiv lub caij ntuj no lossis nub Xanpataus!

²¹Rua qhov lub sijhawm ntawd suavdlawg yuav txomnyem kawg nkaus, txij thaus chivkeeb lug txug naj nub nua yeej tsi tau muaj kev txomnyem npaum le zag nuav. Hab yaav tom ntej yuav tsi muaj le zag nuav lawm.

²²Tabsis Vaajtswv tub txav nub txav nyoog kuas tuab lu lawm. Yog nwg tsi ua le ntawd yeej yuav tsi muaj ib tug dlim le. Qhov kws Vaajtswv txav nub txav nyoog kuas tuab lu le ntawd yog vim nwg hlub tsaav tuabneeg kws nwg tau xaiv ca lawm.

²³“Thaus ntawd yog leejtwg has rua mej has tas, ‘Mej saib, tug Mexiyas nyob ntawm nuav!’ Lossis has tas, ‘Nwg nyob tod!’ Los mej tsi xob ntseeg tug ntawd tej lug.

²⁴Rua qhov yuav muaj tug Mexiyas cuav hab tej cevlug kws cuav lug ua tej txujci tseemceeb ntxag Vaajtswv tsaav tuabneeg saib puas yuav ntxag tau kuas puab yuam kev.

²⁵Mej yuavtsum ncu ntsoov tej lug kws kuv tub qha rua mej nuav lawm.

²⁶“Yog leejtwg has rua mej has tas, ‘Mej saib, nwg nyob tom roob mojsaab qhua!’ Mej tsi xob moog saib; lossis has tas, ‘Mej saib, nwg nkaum ntawm nuav!’ Mej tsi xob ntseeg.

²⁷Rua qhov nub kws Tuabneeg Leej Tub lug, yuav zoo ib yaam le tsaglig xub laim tim saab nubtuaj ci moog txug rua tim saab nubpoob.

²⁸“Cev tuag nyob qhov twg, dlaav npoj yuav sau nthwv lug rua qhov ntawd.

²⁹“Lub sijhawm kws tej kev txomnyem ntawd dlhau lawm, lub nub yuav tsaus, lub hli yuav tsi ci, tej nubqub sau ntuj yuav poob lug, hab yaam kws muaj fwjchim nyob sau nruab ntug yuav ua zug koog taag huv tuabsi.

³⁰Thaus ntawd mej yuav pum ib lub cim tshwm sau nruab ntug qha has tas Tuabneeg Leej Tub yuav lug. Txhua tsaav tuabneeg huv qaab ntuj nuav yuav quaj nyav ntsoog qeeg thaus puab pum Tuabneeg Leej Tub nrug nwg tug tshwjchim kws ci ntsaa ab hab nwg lub fwjchim lug sau ntuj lug.

³¹Nwg yuav khaiv nwg cov timtswv tshuab raaj tshuab xyu nrov nrov hu. Puab yuav moog sau cov tuabneeg kws nwg xaiv ca lawm txhua nrho plaub ceg kaum ntuj, saab ntuj tim nuav moog txug saab ntuj tim u lug nyob ua ke.

³²“Mej saib tsob txiv ncuav pas qha le caag. Thaus nwg tej ceg rov ntsuab hab pib hlaav nplooj mog nyoos, mej paub has tas tub yuav txug lub caij ntuj naag.

³³Ib yaam nkaus le ntawd, thaus mej pum tej ntawd, mej yuav paub has tas nwg tub lug ze ntawd qhovrooj lawm.

³⁴Kuv qha tseeb rua mej has tas thaus cov tuabneeg tam nuav tseem tuag tsi tau taag, tub xub muaj tej ntawd lawm.

³⁵Lub ntuj hab lub nplajteb yuav pluj moog, tabsis kuv tej lug yuav tsi muaj ib lus poob le.

³⁶“Tabsis nub ntawd hab lub sijhawm ntawd tsi muaj leejtwg paub, txawm yog cov timtswv ceebtsheej lossis Tuabneeg Leej Tub los yeej tsi paub le; tsuas yog leej Txiv tuab leeg txhaj paub xwb.

³⁷Lub sijhawm kws Tuabneeg Leej Tub lug, yuav zoo ib yaam le tej kws tshwmsim rua tam Nau-es nyob.

³⁸Thaus dlej tseem tsi tau lug nyaab nplajteb, suavdlawg ua noj ua haus, ua tshoob ua kug moog txug nub kws Nau-es nce moog rua huv lub nkoj;

³⁹puab tsi paub moog txug thaus dlej lug nyaab hab kuav puab moog taag huv tuabsi le caag, thaus Tuabneeg Leej Tub lug, yuav zoo ib yaam le ntawd.

⁴⁰Lub sijhawm ntawd muaj ob tug txivneej ua num ua ke tom teb, yuav coj ib tug moog, tseg ib tug ca.

⁴¹Muaj ob tug quaspuj zum zeb ua ke: yuav coj ib tug moog tseg ib tug ca.

⁴²Mej yuavtsum ceevfaaj zuv tog, rua qhov mej tsi paub lub sijhawm kws mej tug Tswv yuav lug.

⁴³Mej yeej paub has tas, yog tug tswv tsev xub paub has tas, thaus twg tubsaab yuav tuaj, nwg yeej yuav zuv tog tsi pub tubsaab lug tau rua huv nwg tsev.

⁴⁴Yog le ntawd, mej yuavtsum zuv tog, rua qhov Tuabneeg Leej Tub yuav lug lub sijhawm kws mej tsi ceevfaaj.

⁴⁵“Tug tubkhai kws ncaaj hab muaj tswvyim, tug tswv yuav tsaa nwg ua tug luj kws saib tug tswv cov tubkhai, hab thaus txug sijhawm noj, tug ntawd yuav ua tug faib zaub faib mov rua cov tubkhai noj.

⁴⁶Thaus tug tswv rov lug pum tug tubkhai ntawd taabtom ua tej num nuav, ces tug tubkhai ntawd yuav tau ntsejmuag!

⁴⁷Kuv qha tseeb rua mej has tas, tug tswv yuav tsaa tug tubkhai ntawd ua tug saib tug tswv tej qhov txhua chaw.

⁴⁸Tabsis yog tug tubkhai muaj lub sab phem, hab xaav has tas tshuav ntev kuv tug tswv maam rov lug,

⁴⁹ces nwg txawm muab cov tubkhai ntaus hab moog nrug cov tuabneeg quav cawv noj haus ua ke,

⁵⁰nwg tsi paub nub twg hab lub sijhawm twg, nwg tug tswv yuav lug, nwg txhaj tsi ceevfaaj.

⁵¹Tug tswv yuav muab tug tubkhai ntawd hlais ua tej dlaim, hab muab nwg pov moog nrug cov tuabneeg kws ntsejmuag ncaaj sab nkhaus nyob. Puab yuav quaj tum nav qawv qhov ntawd.