Read Hmong Njua Mathais 25 Bible Online

Mathais 25 - Hmong Njua bible

Mathais 25

¹“Lub sijhawm ntawd Ntuj Ceebtsheej pev ib yaam le kaum tug hluas nkauj kws taws teeb moog tog tug nraug vauv.

²Tsib tug tsi muaj tswvyim hab tsib tug muaj tswvyim.

³Cov kws tsi muaj tswvyim, puab nqaa teeb, tabsis tsi npaaj nroj txhaab.

⁴Cov kws muaj tswvyim, puab nqaa teeb hab ib leeg npaaj ib fwj nroj nqaa moog.

⁵Tub lig lig lawm tug nraug vauv pheej tsi txawj tuaj, ces cov hluas nkauj txawm tsaug zug ncaws nruj nris.

⁶“Thaus txug ib taag mo txawm muaj ib lub suab hu nrov nrov has tas, ‘Tug nraug vauv tuaj lawm! Ca le tawm tuaj tog nwg!’

⁷Kaum tug hluas nkauj txawm sawv huv tuabsi, hab nyag khu nyag lub teeb kuas cig.

⁸Ces tsib tug kws tsi muaj tswvyim has rua tsib tug kws muaj tswvyim has tas, ‘Thov muab mej cov roj faib mivntsiv rua peb, rua qhov peb cov teeb roj taag lawm tub yuav tuag.’

⁹Tsib tug kws muaj tswvyim teb has tas, ‘Tsi tau, nyob tsaam tsi txaus rua peb hab mej. Mej ca le moog nrhav yuav tom kab rua mej.’

¹⁰Thaus tsib tug kws tsi muaj tswvyim taabtom moog yuav roj lawm; tug nraug vauv txawm tuaj txug. Tsib tug muaj tswvyim kws tub xub npaaj roj tseg lawm, txawm nrug tug nraug vauv moog noj tshoob huv tsev, hab kaw qhovrooj rua lawm.

¹¹“Tom qaab ntawd tsib tug hluas nkauj kws tsi muaj tswvyim rov lug txug. Puab txawm hu has tas, ‘Tug tswv! Tug tswv, thov qheb qhovrooj rua peb!’

¹²Tug nraug vauv teb has tas, ‘Kuv tsi paub mej!’ ”

¹³Yexus xaus lug has tas, “Mej yuavtsum ceevfaaj, rua qhov mej tsi paub nub twg hab lub sijhawm twg yuav muaj le ntawd.

¹⁴“Ntuj Ceebtsheej pev ib yaam le ib tug txivneej yuav moog rua lwm tebchaws; nwg hu nwg cov tubkhai lug, hab kuas puab saib nwg tej vaaj tse hab tej qhov txhua chaw.

¹⁵Nwg muab tsib caug choj nyaj rua ib tug, neeg nkaum choj rua ib tug, hab kaum choj rua ib tug lawv le puab muaj tswvyim coj moog siv ua laag ua luam. Ces nwg txawm moog lawm.

¹⁶Tug tubkhai kws tau tsib caug choj, nwg txawm coj moog ua luam taamsim, hab nwg tsaam tsib caug choj ntxiv.

¹⁷Tug tubkhai kws tau neeg nkaum choj, kuj coj moog ua luam tsaam neeg nkaum choj ntxiv.

¹⁸Tabsis tug tubkhai kws tau kaum choj, nwg txawm muab nwg tug tswv cov nyaj coj moog faus aav tseg.

¹⁹“Tom qaab ntawd ntev loo, cov tubkhai ntawd tug tswv rov qaab lug txheeb saib puab ib leeg tsaam pistsawg choj.

²⁰Tug tubkhai kws tau tsib caug choj txawm nqaa tsib caug choj kws nwg tsaam lug has tas, ‘Tug Tswv, koj muab tsib caug choj rua kuv, koj saib kuv tsaam tsib caug choj hab.’

²¹Tug tswv has tas, ‘Zoo heev, koj yog tug tubkhai kws zoo hab ncaaj nceeg! Tej yaam miv miv kws koj saib, koj ua ncaaj, kuv yuav tsaa koj ua tug kws saib yaam kws luj. Koj ca le lug nrug kuv nyob kaaj sab lug!’

²²Tug tubkhai kws tau neeg nkaum choj, txawm lug has tas, ‘Tug tswv, koj muab neeg nkaum choj rua kuv, koj saib kuv tsaam neeg nkaum choj hab.’

²³Tug tswv has tas, ‘Zoo heev, koj yog tug tubkhai kws zoo hab ncaaj nceeg! Tej yaam miv miv kws koj saib, koj ua ncaaj. Kuv yuav tsaa koj ua tug saib yaam kws luj. Koj ca le lug nrug kuv nyob kaaj sab lug!’

²⁴Tug tubkhai kws tau kaum choj txawm lug has rua tug tswv has tas, ‘Tug Tswv, kuv paub has tas koj yog ib tug tuabneeg nyaum heev; koj ibtxwm hlais tej kws tsi yog koj cog, hab sau tej kws tsi yog koj tseb.

²⁵Kuv ntshai, kuv txhaj coj koj cov nyaj moog faus aav tseg. Koj saib, koj cov nyaj nyob ntawm nuav.’

²⁶Tug tswv has tas, ‘Tug tubkhai kws sab phem hab tubnkeeg! Koj tub paub has tas kuv ibtxwm hlais tej kws tsi yog kuv cog, hab sau tej kws tsi yog kuv tseb.

²⁷Ua le caag koj tsi muab kuv cov nyaj moog tso rua huv txhaab nyaj, thaus kuv rov lug, kuv txhaj tau kuv cov nyaj hab tau paaj ntxiv?

²⁸Mej ca le muab cov nyaj ntawm nwg coj moog ntxiv rua tug kws muaj ib puas choj.

²⁹Rua qhov txhua tug kws muaj lawm, yuav muab ntxiv kuas puab muaj nplua mag; tabsis tug kws tsi muaj, txawm yog nwg muaj mivntsiv xwb los yuav muab rhu ntawm nwg moog.

³⁰Ca le muab tug tubkhai kws tsi tsimtxaj nuav pov rua saab nrau qhov kws tsaus ntuj nti, nwg yuav quaj tum nav qawv qhov ntawd.

³¹“Thaus Tuabneeg Leej Tub lug ua Vaajntxwv, taagnrho cov timtswv ceebtsheej yuav nrug nwg lug, hab nwg yuav nyob sau nwg lub zwmtxwv kws ci ntsaa ab.

³²Txhua tsaav tuabneeg huv qaab ntuj yuav tuaj sis sau ua ke rua ntawm nwg xubndlag, hab nwg yuav muab suavdlawg cais ua ob paab, ib yaam le tug tswv yug yaaj muab paab yaaj cais tawm ntawm paab tshis moog.

³³Nwg yuav kuas cov tuabneeg ncaaj nceeg lug nyob ntawm nwg saab xis, hab kuas cov tuabneeg kws tsi ncaaj nceeg lug nyob ntawm nwg saab txhumphem.

³⁴Thaus ntawd Vaajntxwv yuav has rua cov tuabneeg kws nyob ntawm nwg saab xis has tas, ‘Mej cov kws tau kuv Txiv txuj koob moov, mej ca le lug kaav lub tebchaws kws tub npaaj rua mej thaus tsim lub nplajteb lug lawm.

³⁵Thaus kuv tshaib plaab, mej pub mov rua kuv noj, thaus kuv nqhes dlej; mej pub dlej rua kuv haus; thaus kuv tuaj ua qhua, mej hu kuv lug huv mej tsev.

³⁶Thaus kuv tsi muaj rig tsho naav; mej muab rua kuv naav. Thaus kuv muaj mob, mej tuaj tu kuv. Thaus kuv raug kaw rua huv tsev lojcuj, mej tuaj saib kuv!’

³⁷Thaus cov tuabneeg ncaaj nceeg nov le ntawd, puab yuav teb has tas, ‘Tug Tswv, thaus twg peb pum koj tshaib plaab, hab muab mov rua koj noj lossis pum koj nqhes dlej, hab muab dlej rua koj haus?

³⁸Thaus twg koj tuaj ua qhua, peb hu koj lug huv peb tsev lossis pum koj tsi muaj rig tsho naav, hab peb muab rua koj naav?

³⁹Thaus twg peb pum koj muaj mob lossis raug kaw huv tsev lojcuj, hab peb tuaj saib koj?’

⁴⁰Vaajntxwv yuav teb has tas, ‘Kuv qha tseeb rua mej has tas, thaus kws mej tau paab kuv cov kwvtij nuav ib tug, txawm yog tug ntawd muaj fwjchim yau dlua cov los mej tseem paab nwg hab, qhov kws mej paab tug ntawd, tub yog mej paab kuv ntaag!’

⁴¹“Hab nwg has rua cov kws nyob ntawm nwg saab txhumphem has tas, ‘Mej cov kws raug Vaajtswv foom tsi zoo. Mej ca le tsiv ntawm kuv moog rua huv lub cubtawg kws cig tsi paub tuag moog ibtxhis kws tub npaaj tseg rua dlaab Ntxwgnyoog hab nwg cov tubkhai moog nyob lawm!

⁴²Thaus kuv tshaib plaab, mej tsi pub mov rua kuv noj; thaus kuv nqhes dlej, mej tsi pub dlej rua kuv haus;

⁴³thaus kuv tuaj ua qhua, mej tsi hu kuv lug huv mej tsev. Thaus kuv tsi muaj rig tsho naav, mej tsi muab rua kuv naav; thaus kuv muaj mob hab raug kaw rua huv tsev lojcuj, mej tsi tuaj tu hab saib kuv.’

⁴⁴Puab yuav teb nwg has tas, ‘Tug Tswv, thaus twg peb pum koj tshaib plaab, nqhes dlej, tuaj ua qhua lossis tsi muaj rig tsho naav, hab raug kaw rua huv tsev lojcuj, peb tsi paab koj?’

⁴⁵Tug Vaajntxwv yuav teb puab has tas, ‘Kuv qha tseeb rua mej has tas, qhov kws mej tsi paab cov tuabneeg nuav tug kws yau dlua cov, ces yog mej tsi paab kuv ntaag.’

⁴⁶Cov tuabneeg ntawd yuav raug txim moog ibtxhis le, tabsis cov tuabneeg ncaaj nceeg yuav tau txujsa ntev dlhawv moog ibtxhis tsi kawg.”