Read Hmong Njua Mathais 26 Bible Online

Mathais 26 - Hmong Njua bible

Mathais 26

¹Thaus Yexus qha tej nuav rua puab taag lawm, nwg has rua cov thwjtim has tas,

²“Mej tub paub lawm has tas, tshuav ob nub xwb txug lub caij ua Kevcai Hlaa Dlhau, hab luas yuav muab Tuabneeg Leej Tub coj moog ntsa rua sau ntoo khaublig.”

³Cov thawj ntawm cov povthawj hab cov txwjlaug tuaj ua ke saablaaj huv tug Povthawj Hlub Kaiyafas tsev,

⁴nrhav kev yuav nteg Yexus tuabywv coj moog tua povtseg.

⁵Puab has tas, “Peb tsi xob nteg nwg thaus suavdlawg taabtom ua kevcai, nyob tsaam tej pejxeem yuav ntxhuv.”

⁶Thaus Yexus nyob huv Ximoos tug kws thaus mob ruas ib zag lawm lub tsev tom lub zog Npethanis.

⁷Thaus Yexus taabtom noj mov muaj ib tug quaspuj nqaa ib fwj roj tsw qaab kws kim heev tuaj laub rua Yexus taubhau.

⁸Thaus cov thwjtim pum le ntawd, puab tsi txaus sab hab has tas, “Ua le caag muab cov roj tsw qaab ntawd nkim povtseg?

⁹Yog muab fwj roj ntawd muag, yuav tau nyaj ntau, hab muab cov nyaj ntawd moog pub rua cov tuabneeg pluag kuj zoo dlua!”

¹⁰Yexus tub paub tej kws puab has ntawd lawm, nwg has rua puab tas, “Ua le caag mej ua rua tug quaspuj nuav nyuaj sab? Qhov kws nwg ua rua kuv ntawd yog qhov zoo.

¹¹Yeej yuav muaj cov tuabneeg pluag nrug mej nyob moog le, tabsis kuv yuav tsi nrug mej nyob moog ib simneej.

¹²Qhov kws tug quaspuj nuav laub roj tsw qaab rua kuv lub cev, tub yog nwg tu kuv lub cev ca rua nub kws log kuv.

¹³Kuv qha tseeb rua mej has tas, qhov kws tug quaspuj nuav ua rua kuv yuav nrov nchaa moog rua huv qaab ntuj nuav txhua qhov kws muaj tuabneeg moog qha Txujmoo Zoo, kuas suavdlawg ncu txug teg num kws tug quaspuj nuav tau ua lawm.”

¹⁴Tom qaab ntawd, Yexus kaum ob tug thwjtim, tug kws hu ua Yudas Ixakali-us txawm moog cuag cov thawj ntawm cov povthawj,

¹⁵hab nug has tas, “Yog kuv muab Yexus rua mej, mej yuav muab dlaabtsi rua kuv?” Puab txawm suav peb caug lub nyaj rua nwg.

¹⁶Txij nub ntawd lug Yudas txawm nrhav sijhawm muab Yexus rua puab.

¹⁷Thawj nub kws puab ua Kevcai Noj Ncuav Tsi Xyaw Keeb, cov thwjtim txawm lug cuag Yexus hab nug nwg has tas, “Koj xaav kuas peb moog npaaj pluag mov noj ua Kevcai Hlaa Dlhau rua koj noj qhov twg?”

¹⁸Yexus teb has tas, “Mej ca le moog cuag ib tug txivneej kws nyob huv nroog hab has rua nwg tas, ‘Xwbfwb has tas, kuv lub sijhawm lug ze lawm; kuv hab kuv cov thwjtim yuav lug ua Kevcai Hlaa Dlhau huv koj tsev.’ ”

¹⁹Cov thwjtim txawm moog npaaj pluag mov ua Kevcai Hlaa Dlhau lawv le Yexus has rua puab lawm.

²⁰Thaus tsaus ntuj, Yexus hab kaum ob tug thwjtim nyob quastsawg noj mov.

²¹Thaus puab taabtom noj mov, Yexus has tas, “Kuv qha rua mej has tas, mej cov kws nyob ntawm nuav muaj ib tug yuav ntxeev sab rua kuv.”

²²Thaus cov thwjtim nov le ntawd, puab nyuaj sab heev, puab nyag taug nyag nug Yexus has tas, “Tug Tswv, koj has le ko, puas yog koj has kuv?”

²³Yexus teb has tas, “Tug kws nrug kuv koom ntsw ib lub taig, tug ntawd, yog tug kws yuav ntxeev sab rua kuv.

²⁴Tuabneeg Leej Tub yuav tuag lawv le Vaajtswv Txujlug sau tseg has txug nwg, tabsis tug kws ntxeev sab rua Tuabneeg Leej Tub, nwg yuav raug kev puamtsuaj! Yog nwg tsi xob yug lug kuj yuav zoo dlua!”

²⁵Yudas tug kws ntxeev sab rua Yexus nug has tas, “Xwbfwb, koj has le ko puas yog koj has kuv?” Yexus teb has tas, “Koj has yog lawm.”

²⁶Thaus puab tseem noj mov Yexus txawm muab ib lub ncuav lug hab ua Vaajtswv tsaug, nwg muab lub ncuav ntawd ndlais cev rua cov thwjtim hab has tas, “Lub ncuav nuav yog kuv lub cev, mej ca le txais moog noj.”

²⁷Tom qaab ntawd Yexus muab ib khob cawv txiv maab lug, hab ua Vaajtswv tsaug, nwg muab khob cawv txiv maab ntawd cev rua puab hab has tas, “Mej txhua tug ca le txais moog haus,

²⁸khob cawv txiv maab nuav yog kuv cov ntshaav kws ua lub homthawj nas rua Vaajtswv txujlug cog tseg. Kuv cov ntshaav nuav yuav ndlwg lug ntxuav ntau leej tej kev txhum huv tuabsi moog.

²⁹Kuv qha rua mej has tas, kuv yuav tsi haus cov cawv txiv maab nuav moog txug nub kws kuv nrug mej haus cov cawv txiv maab tshab huv kuv Txiv lub Tebchaws.”

³⁰Thaus puab hu ib zaaj nkauj taag, puab txawm tawm moog rua peg Roob Txiv Ntoo Roj lawm.

³¹Yexus has rua cov thwjtim has tas, “Mo nuav mej txhua tug yuav tsiv taag huv tuabsi tso kuv tseg, rua qhov Vaajtswv txujlug sau tseg lawm has tas, ‘Vaajtswv yuav tua tug tswv yug yaaj, hab paab yaaj yuav tawg nyag tsiv nyag taag huv tuabsi.’

³²Tabsis thaus kuv sawv huv qhov tuag rov qaab lug lawm, kuv yuav ua mej ntej moog rua peg Kalilais.”

³³Petus teb has tas, “Txawm yog suavdlawg tso koj tseg taag lawm los kuv yuav tsi tso koj tseg le!”

³⁴Yexus has rua Petus has tas, “Kuv qha rua koj has tas, mo nuav thaus qab tsi tau qua, koj yuav has peb zag has tas, koj tsi paub kuv.”

³⁵Petus teb has tas, “Txawm yog kuv yuav nrug koj tuag los kuv yeej yuav tsi has tas, kuv tsi paub koj!” Hab taagnrho cov thwjtim puavleej has ib yaam nkaus.

³⁶Yexus nrug nwg cov thwjtim moog rua ntawm qhov chaw kws hu ua Khexemanes, nwg has rua cov thwjtim has tas, “Mej nyob ntawm nuav, kuv yuav moog thov Vaajtswv tod.”

³⁷Yexus txawm coj Petus hab Xenpedais ob tug tub nrug nwg moog. Yexus nyuaj sab hab ntxhuv sab kawg le.

³⁸Hab nwg has rua puab tas, “Kuv nyuaj sab hab ntxhuv sab kawg le, tub yuav tuag, mej ca le nrug kuv nyob ntawm nuav tsi xob tsaug zug.”

³⁹Yexus moog tom ntej mivntsiv, ces nwg txhus caug ndlua rua huv aav hab thov Vaajtswv has tas, “Kuv Txiv, yog koj pum zoo, thov koj tshem lub khob nuav ntawm kuv moog! Txawm yog le caag los thov koj tsi xob ua lawv le kuv lub sab nyam, tabsis ca ua lawv le koj lub sab nyam xwb!”

⁴⁰Thaus Yexus rov lug rua ntawm peb tug thwjtim, nwg pum puab tsaug zug taag lawm; nwg has rua Petus has tas, “Mej yoo tsi taug dlaab ndlub nrug kuv nyob ib txoog teev le los?

⁴¹Mej yuavtsum ceevfaaj hab thov Vaajtswv paab, kev sim sab txhaj yuav ntxag tsi tau mej. Lub sab mas kub lug, tabsis cev nqaj dlaim tawv qaug zug kawg le.”

⁴²Yexus rov moog thov Vaajtswv dlua zag ob has tas, “Kuv Txiv, yog koj tsi pum zoo muab lub khob nuav tshem ntawm kuv moog, yuav ca kuv haus xwb, ces ca ua lawv le koj lub sab nyam.”

⁴³Yexus rov lug dlua hab pum cov thwjtim tsaug zug taag lawm; puab rua tsi taug qhovmuag le.

⁴⁴Yexus rov moog thov Vaajtswv zag peb, nwg has ib yaam le thawj ob zag.

⁴⁵Yexus rov qaab lug hab has rua cov thwjtim has tas, “Mej tseem yuav tsaug zug hab su kuas txaus tsaiv los? Nwgnuav tub txug lub sijhawm kws Tuabneeg Leej Tub yuav raug nteg coj moog rua cov tuabneeg txhum txhais teg lawm.

⁴⁶Mej ca le sawv peb moog. Mej saib, tug kws ntxeev sab rua kuv tub tuaj txug lawm!”

⁴⁷Thaus Yexus tseem taabtom has le ntawd, ces Yudas kws yog ib tug ntawm kaum ob tug thwjtim txawm tuaj txug. Muaj ib paab tuabneeg coob coob nqaa ntaaj nqaa qws nrug nwg tuaj. Paab ntawd yog cov thawj ntawm cov povthawj hab cov txwjlaug tso tuaj.

⁴⁸Tug kws ntxeev sab rua Yexus, nwg tub xub qha rua cov tuabneeg coob coob ntawd lawm has tas, “Kuv nwj tug twg, ces yog tug ntawd ntaag; mej ca le nteg nwg!”

⁴⁹Thaus Yudas tuaj txug, nwg ncaaj nraim moog rua ntawm Yexus hab has tas, “Nyob zoo Xwbfwb.” Ces nwg txawm nwj kag Yexus.

⁵⁰Yexus teb has tas, “Phoojywg, koj yuav ua dlaabtsi, koj ca le ua nrawm nroog.” Cov tuabneeg ntawd txawm sau nthwv lug nteg Yexus, hab tuav nwg ruaj ruaj.

⁵¹Cov tuabneeg kws nrug Yexus nyob ntawd muaj ib tug rhu hlo nwg raab ntaaj lug tuab ntaag rua tug Povthawj Hlub ib tug qhev saab nploojntseg xis tu nrho.

⁵²Yexus txawm has rua tug ntawd tas, “Koj ca le muab koj raab ntaaj ntxig rov rua huv naab, rua qhov txhua tug kws siv ntaaj yeej yuav tuag rua nav ntaaj.

⁵³Koj tsi paub has tas, yog kuv thov kuv Txiv, nwg yeej yuav khaiv nwg cov timtswv coob dlua kaum ob pawg txheeb leej lug paab kuv taamsim nua los?

⁵⁴Tabsis yog kuv ua le ntawd, yuav tsi tav lawv le Vaajtswv Txujlug kws has tas yuavtsum muaj le nuav.”

⁵⁵Thaus ntawd, Yexus has rua cov tuabneeg coob coob ntawd tas, “Mej nqaa ntaaj nqaa qws tuaj nteg kuv, ib yaam le kuv yog tubsaab los? Kuv naj nub nyob huv lub Tuamtsev qha mej, ua le caag mej tsua tsi nteg kuv?

⁵⁶Tabsis yeej yuav muaj le nuav txhaj muaj tav lawv le Vaajtswv tej lug kws cov cev Vaajtswv lug tau sau tseg lawm.” Ces cov thwjtim txawm tsiv taag lawm hab tso Yexus tseg.

⁵⁷Cov tuabneeg kws nteg Yexus coj Yexus moog rua tom tug Povthawj Hlub Kaiyafas tsev, cov xwbfwb kws qha Vaajtswv txuj Kevcai hab cov txwjlaug tub tuaj ua ke saablaaj qhov ntawd lawm.

⁵⁸Tabsis Petus lawv Yexus qaab nrug dleb dleb, nwg moog txug ntawm lub tshaav puam ntawm tug Povthawj Hlub lub tsev, ces nwg txawm moog nrug cov tuabneeg kws zuv tug Povthawj Hlub lub tsev nyob ua ke nrau tshaav puam, tog saib luas yuav ua le caag rua Yexus.

⁵⁹Cov thawj ntawm cov povthawj hab taagnrho cov numtswv nrhav lug nkaug Yexus, puab txhaj tau kev muab Yexus tua povtseg.

⁶⁰Txawm yog muaj ntau leej tuaj ua timkhawv dlaag los puab nrhav tsi tau lug nkaug Yexus. Thaus kawg muaj ob tug txivneej

⁶¹nkaug has tas, “Nwg has tas, ‘Kuv yuav rhuav lub Tuamtsev hab peb nub, kuv yuav ua kuas tau ib lub tshab.’ ”

⁶²Tug Povthawj Hlub txawm sawv tseeg nug Yexus has tas, “Obtug nkaug koj le ntawd, koj tsi muaj lug teb le los?”

⁶³Tabsis Yexus tsi teb ib lus le. Tug Povthawj Hlub rov has rua Yexus has tas, “Koj ca le tuav Vaajtswv tug kws muaj sa nyob lub npe coglug has tas, koj yog tug Mexiyas kws yog Vaajtswv Tug Tub.”

⁶⁴Yexus teb has tas, “Koj has yog lawm. Tabsis kuv has rua mej suavdlawg has tas, txij nuav moog mej yuav pum Tuabneeg Leej Tub nyob ntawm Vaajtswv tug kws muaj Fwjchim Luj kawg nkaus saab xis, hab nrug fuab nrug cua lug sau ntuj lug!”

⁶⁵Ces tug Povthawj Hlub txawm dlua rhe nwg lub tsho hab has tas, “Nwg has lug saib tsi taug Vaajtswv! Tsi taag peb yuav moog nrhav timkhawv ntxiv! Mej tub nov nwg tej lug thuam ntawd lawm!

⁶⁶Mej xaav le caag?” Puab teb has tas, “Nwg ua txhum lawm, tsimnyog muab nwg tua povtseg.”

⁶⁷Puab txawm ntu quavncaug rua Yexus ntsejmuag hab ntaus nwg; hab cov kws xuas tawg ncuav rua Yexus,

⁶⁸puab has tas, “Tug Mexiyas, koj sim twv saib yog leejtwg ntaus koj!”

⁶⁹Thaus Petus tseem nyob quastsawg ntawm tshaav puam, tug Povthawj Hlub ib tug ntxhais qhev txawm tuaj has rua Petus has tas, “Koj yog ib tug kws ibtxwm nrug Yexus tug kws yog tuabneeg Kalilais los sav.”

⁷⁰Tabsis Petus tsi leeg le, nwg taabmeeg has rua suavdlawg tas, “Qhov kws koj has ko kuv tsi paub le.”

⁷¹Petus txawm moog rua tom roojvaag, tsua muaj dlua ib tug ntxhais qhev pum Petus, hab nwg has rua cov txivneej kws nyob ntawd tas, “Tug nuav yog tug kws ibtxwm nrug Yexus tug kws yog tuabneeg Naxales ntaag.”

⁷²Petus rov tsi leeg dlua hab nwg twv has tas, “Kuv tsi paub tug txivneej ntawd!”

⁷³Tom qaab ntawd mivntsiv, cov tuabneeg kws sawv ntawd txawm lug has rua Petus has tas, “Koj yeej yog puab cov ib tug tag, rua qhov koj lub suab has zoo ib yaam le puab lub!”

⁷⁴Petus txawm twv has tas, “Kuv tsi paub tug txivneej ntawd. Yog kuv dlaag thov Vaajtswv rau txim rua kuv!” Taamsim ntawd qab txawm qua,

⁷⁵ces Petus txawm ncu dlheev txug tej lug kws Yexus has rua Petus has tas, “Thaus qab tsi tau qua, koj yuav has peb zag has tas, koj tsi paub kuv.” Petus txawm tawm moog rua saab nrau, hab quaj tu sab kawg le.