Read Hmong Njua Mathais 28 Bible Online

Mathais 28 - Hmong Njua bible

Mathais 28

¹Tom qaab nub Xanpataus kws yog Nubkaaj thaus sawv ntxuv, Malis Madalas, hab dlua ib tug Malis moog saib Yexus lub ntxaa.

²Taamsim ntawd nplajteb ua zug koog, tug Tswv ib tug timtswv nqeg lug muab dlaim txag zeb kws npug lub rooj ntxaas dlov tawm, hab nwg nyob quastsawg ntawm dlaim txag zeb ntawd.

³Nwg lub ntsejmuag ci ib yaam le tsaglig xub laim, hab nwg cev rig tsho dlawb paug ib yaam le dlaus.

⁴Cov tubrog kws zuv lub qhov ntxaa ntshai ua ib ce tshee nyo hab txhaav taag ib yaam le cov tuabneeg tuag lawm.

⁵Tug timtswv ntawd has rua ob tug quaspuj tas, “Meb tsi xob ntshai; kuv paub has tas yog meb tuaj nrhav Yexus tug kws luas muab ntsa rua sau ntoo khaublig.

⁶Nwg tsi nyob ntawm nuav, nwg tub sawv lawv le nwg qha tseg lawm. Meb ca le lug saib qhov chaw kws luas tso nwg lub cev ca.

⁷Meb ca le rov moog qha rua nwg cov thwjtim has tas, nwg tub sawv huv qhov tuag rov lug lawm. ‘Nwg yuav ua mej ntej moog rua peg Kalilais; hab mej yuav ntsib nwg peg!’ Ncu ntsoov tej kws kuv has rua meb nuav!”

⁸Ob tug txawm rov nrawm nroog ntawm lub qhov ntxaa moog lawm, obtug ntshai los ntshai, zoo sab los zoo sab, hab sis tw dlha rov moog qha rua Yexus cov thwjtim paub.

⁹Thaus obtug taabtom rov moog, obtug txawm ntsib Yexus. Yexus has rua obtug tas, “Thov kuas meb tau nyob kaaj sab lug.” Obtug lug tuav nkaus Yexus ob txhais kutaw hab pehawm nwg.

¹⁰Yexus has rua obtug tas, “Mej tsi xob ntshai, meb ca le moog qha kuv cov thwjtim kuas puab moog rua peg Kalilais, puab yuav pum kuv peg.”

¹¹Thaus ob tug quaspuj ntawd taabtom taug kev moog, cov tubrog kws zuv lub qhov ntxaa qee leej dlha moog rua huv nroog hab qha tej kws muaj lawm rua cov thawj ntawm cov povthawj noog.

¹²Thaus cov thawj ntawm cov povthawj moog nrug cov txwjlaug saablaaj taag; puab txawm muab nyaj ntau rua cov tubrog

¹³hab has tas, “Mej yuavtsum has tas, thaus ib taag mo kws mej tsaug zug lawm, ces nwg cov thwjtim txawm tuaj nyag nwg lub cev lawm.

¹⁴Mej tsi xob txhawj, yog tug tswv xeev nov txug zaaj nuav, peb maam le has nwg, tsi pub mej raug teebmeem.”

¹⁵Cov tubrog txais cov nyaj ntawd, ces puab txawm ua lawv le cov povthawj has. Zaaj nuav nrov nchaa moog thoob plawg txhua qhov rua cov Yudais nov txug naj nub nua.

¹⁶Kaum ib tug thwjtim txawm moog rua peg Kalilais hab nce moog rua peg lub roob lawv le Yexus has rua puab lawm.

¹⁷Thaus puab moog pum Yexus, puab txawm txhus caug ndlua pehawm nwg, tabsis tseem muaj qee leej ua xyem xyaav.

¹⁸Yexus txaav lug ze puab hab has rua puab tas, “Vaajtswv tub muab fwjchim rua kuv kaav taagnrho ib puas tsaav yaam sau ntuj hab huv nplajteb nuav lawm.

¹⁹Yog le ntawd, mej ca le tawm moog qha txhua tsaav tuabneeg huv qaab ntuj nuav, kuas puab lug ua kuv cov thwjtim: Mej yuavtsum tuav Vaaj Leej Txiv, Vaaj Leej Tub, hab Vaaj Ntsujplig tug Dlawbhuv lub npe muab puab ua kevcai raus dlej.

²⁰Hab qha kuas puab paub coj lawv le txhua yaam kws kuv tau qha rua mej lawm; hab kuv yuav nrug nraim mej moog txug nub kws lub nplajteb nuav kawg.”