Read Hmong Njua Mathais 3 Bible Online

Mathais 3 - Hmong Njua bible

Mathais 3

¹Thaus ntawd Yauhaas tug kws muab tuabneeg ua kevcai raus dlej, nwg tawm moog qhuab qha tom roob mojsaab qhua huv cov Yudais lub tebchaws.

²Yauhaas has tas, “Mej ca le tso plhuav mej tej kev txhum tseg, rua qhov Ntuj Ceebtsheej tub lug ze lawm!”

³Yauhaas yog tug kws Yaxayas kws yog tug cev Vaajtswv lug tub qha tseg lawm has tas: “Muaj ib tug has nrov nrov tom roob mojsaab qhua has tas, ‘Ca le khu kev tog tug Tswv; khu kev kuas ncaaj, nwg yuav lug!’ ”

⁴Yauhaas tej rig tsho yog muab plaub ntxhuav ua; nwg sa hlaab tawv, nwg noj kooj hab zib ntaab.

⁵Muaj tuabneeg coob coob huv lub nroog Yeluxalees hab thoob plawg cov Yudais lub tebchaws, hab huv tej zog kws nyob ob caag ntawm tug Dlej Yauladees tuaj cuag Yauhaas.

⁶Cov tuabneeg nyag leeg nyag lub txim, Yauhaas muab puab ua kevcai raus dlej huv tug dlej Yauladees.

⁷Thaus Yauhaas pum cov Falixais hab cov Xadukais coob leej tuaj thov Yauhaas, kuas Yauhaas muab puab ua kevcai raus dlej, Yauhaas has rua puab tas, “Cov nam naab, leejtwg qha rua mej has tas, mej yuav tsiv dlim Vaajtswv txujkev txav txim kws yuav muaj lug sai sai nuav?

⁸Mej yuavtsum ua mej lub neej kuas tsimnyog qhov kws mej tub tso mej tej kev txhum tseg lawm.

⁹Mej tsi xob khaav has tas mej yog Anplahaas cov xeebntxwv, ces mej txawm yuav dlim tsi raug txim. Kuv qha rua mej has tas, txawm yog Vaajtswv yuav muab tej pobzeb lug ua Anplahaas cov xeebntxwv los nwg yeej ua tau!

¹⁰Nwgnuav tub npaaj tau raab taus lawm, yuav ntuv tej ntoo, txhua tsob ntoo kws tsi txi cov txiv zoo, yuav muab ntuv pov rua huv cub suavtawg huv tuabsi.

¹¹Qhov kws kuv muab mej ua kevcai raus rua huv dlej qha has tas mej tub tso mej tej kev txhum tseg lawm, tabsis tug kws yuav lawv kuv qaab lug, nwg yuav muab mej raus lug ntawm Vaaj Ntsujplig tug Dlawbhuv hab ntawm suavtawg. Tug ntawd muaj fwjchim luj dlua kuv; kuv tub tsi tsimnyog nqaa nwg nkawm khau khab.

¹²Nwg tuav rawv ib raab ntxuam, nwg yuav ntxuaj nwg pawg nplej kuas cov npluag yaa tawm huv tuabsi! Nwg yuav muab cov nplej zoo ntim rua huv nwg lub txhaab, tabsis nwg yuav muab cov npluag pov rua huv cub suavtawg kws cig tsi paub tuag.”

¹³Thaus ntawd Yexus tuaj peg Kalilais tuaj cuag Yauhaas ntawm tug dlej Yauladees, kuas Yauhaas muab Yexus ua kevcai raus dlej.

¹⁴Tabsis Yauhaas tsi kaam, Yauhaas has rua Yexus has tas, “Tsimnyog koj muab kuv ua kevcai raus dlej, ua caag koj tsua tuaj cuag kuv?”

¹⁵Yexus teb Yauhaas has tas, “Koj ca le muab kuv ua kevcai raus dlej, rua qhov tub tsimnyog peb ua txhua yaam lawv le Vaajtswv pum zoo kuas peb ua.” Yog le ntawd, Yauhaas txhaj muab Yexus ua kevcai raus dlej.

¹⁶Thaus Yexus ua kevcai raus dlej taag, nwg tawm huv haav dlej lug. Taamsim ntawd rooj ntug txawm qheb hlo, nwg pum Vaajtswv tug Ntsujplig zoo le tug nquab lug tsaws sau nwg taubhau.

¹⁷Muaj ib lub suab has sau ntuj tuaj has tas, “Tug nuav yog kuv tug Tub kws kuv hlub, kuv txaus sab rua nwg.”