Read Hmong Njua Mathais 5 Bible Online

Mathais 5 - Hmong Njua bible

Mathais 5

¹Thaus Yexus pum cov tuabneeg coob coob le ntawd, Yexus txawm moog rua peg roob, thaus Yexus nyob quastsawg lawm. Yexus cov thwjtim txawm lug cuag Yexus.

²Yexus txawm pib qha puab:

³Cov kws paub has tas puab ua tsi tau puab lub neej lawv le Vaajtswv lub sab nyam; cov ntawd tau koob moov, rua qhov Ntuj Ceebtsheej yog puab le!

⁴“Cov kws paub nyuaj sab rua puab tej kev txhum, cov ntawd tau koob moov, rua qhov Vaajtswv yuav nplig puab sab!

⁵Cov kws txu fwjchim, cov ntawd tau koob moov, puab yuav tau txais tej kws Vaajtswv coglug tseg has tas Vaajtswv yuav muab rua puab.

⁶Cov kws xaav ua lawv le Vaajtswv lub sab nyam, cov ntawd tau koob moov, Vaajtswv yuav muab rua puab kuas txaus nkaus le puab lub sab xaav.

⁷Cov kws muaj lub sab hlub lwm tug, cov ntawd tau koob moov, Vaajtswv yuav hlub puab!

⁸Cov kws muaj lub sab ncaaj nceeg, cov ntawd tau koob moov, puab yuav pum Vaajtswv!

⁹Cov kws ua rua tuabneeg nyob sis humxeeb, cov ntawd tau koob moov, Vaajtswv yuav hu puab has tas, puab yog Vaajtswv cov mivnyuas!

¹⁰Cov kws raug luas tsimtxom vim puab ua lawv le Vaajtswv lub sab nyam, cov ntawd tau koob moov, Ntuj Ceebtsheej yog puab tug.

¹¹“Thaus luas thuam mej hab tsimtxom mej, vim mej yog kuv cov thwjtim, mej tau koob moov.

¹²Mej ca le zoo sab rua qhov Vaajtswv tub npaaj nqe zug ntau kawg le ca rua sau ntuj ceebtsheej rua mej lawm. Thaus u luas tub tsimtxom cov kws cev Vaajtswv lug le nuav lawm hab.”

¹³“Mej yog cov ntsev kws laag tuabneeg nplajteb. Yog cov ntsev tsuag lawm, yuav ua le caag ua kuas rov qaab ntsev tau? Cov ntsev ntawd tsi muaj nqes dlaabtsi, tsuas muaj yuav muab povtseg hab tuabneeg yuav muab tsuj xwb.

¹⁴“Mej yog lub teeb kws ci rua tuabneeg nplajteb pum kev. Lub nroog kws nyob sau roob, yeej tsi muaj ib yaam dlaabtsi yuav thaiv tau lub nroog ntawd.

¹⁵Tsi muaj leejtwg taws teeb hab muab phab khwb rua; tabsis tsuas muaj yuav muab txawb rua qhov chaw sab, kuas txhua tug kws nyob huv lub tsev pum kev.

¹⁶Ib yaam le ntawd, mej yuavtsum ci rua suavdlawg pum tej num zoo kws mej ua, puab txhaj yuav qhuas mej leej Txiv tug kws nyob sau ntuj ceebtsheej.”

¹⁷“Mej tsi xob xaav has tas yog kuv lug rhuav Mauxes txuj Kevcai hab tej lug kws cov cev Vaajtswv lug tau qha tseg lawm. Tsi yog kuv lug rhuav tej lug ntawd, tabsis yog kuv lug ua kuas tej lug ntawd tav.

¹⁸Kuv qha rua mej has tas, yog lub ntuj hab lub nplajteb tseem muaj nyob, ces txuj Kevcai ntawd yuav tsi muaj ib lus poob moog txug thaus txhua yaam tav lawm.

¹⁹Yog leejtwg tsi kaam ua lawv le nqai lug kws miv dlua huv txuj Kevcai nuav hab nwg tseem qha lwm tug kuas tsi xob ua lawv le ntawd, ces Vaajtswv yuav suav has tas tug ntawd yog tug kws yau dlua ndlais kws nyob sau Ntuj Ceebtsheej. Tabsis tug kws ua lawv le txuj Kevcai ntawd hab qha rua lwm tug kuas ua lawv le ntawd, ces tug ntawd yuav yog tug luj kws nyob sau Ntuj Ceebtsheej.

²⁰Kuv qha rua mej has tas, yog mej tsi ua ncaaj dlua cov xwbfwb kws qha Vaajtswv txuj Kevcai hab cov Falixais, ces mej yuav tsi tau moog nyob sau Ntuj Ceebtsheej.

²¹“Mej tub nov tej lug kws luas qha rua cov tuabneeg thaus u lawm has tas, ‘Tsi xob tua tuabneeg; tug kws tua tuabneeg, tug ntawd yuav raug txim.’

²²Tabsis nwgnuav kuv qha rua mej le nuav: yog leejtwg chim rua nwg tug kwvtij, tug ntawd yuav raug txim, hab tug kws has rua nwg tug kwvtij has tas, ‘Tuabneeg ruag!’ Ces luas yeej yuav coj tug ntawd moog rua cov numtswv txav txim; hab tug kws hu nwg ib tug kwvtij has tas, ‘Tuabneeg vwm!’, ces tug ntawd lub txim txaus nwg poob moog rua huv ntuj tawg lawm.

²³Yog le ntawd, thaus koj taabtom muab khoom rua sau lub thaaj yuav fij rua Vaajtswv, hab koj ncu has tas koj tau ua txhum rua koj ib tug kwvtij lawm,

²⁴ces koj ca le tso plhuav tej khoom fij rua ntawm hauv ntej lub thaaj, koj ca le rov qaab moog has kuas meb sis hum tsaiv, koj maam le rov qaab tuaj muab koj tej khoom fij rua Vaajtswv.

²⁵“Yog leejtwg xyuam phaaj kom koj rua huv tsev tu plaub hab yuav coj koj moog has plaub, ua ntej kws tsi tau moog has plaub, koj ca le thov nwg kuas meb rov sis hum, nyob tsaam thaus meb moog txug huv lub tsev tu plaub ntug lawm, nwg yuav muab koj rua tug txav txim, ces tug txav txim yuav muab koj cob rua tug ceevxwm, hab tug ceevxwm yuav coj koj moog kaw rua huv tsev lojcuj.

²⁶Kuv qha tseeb rua koj has tas, koj yuav tawm tsi tau huv qhov chaw ntawd moog txug thaus kws koj them nqe taag.

²⁷“Mej tub nov tej lug kws luas qha has tas, ‘Tsi xob ntxag luas quaspuj luas quasyawg.’

²⁸Tabsis nwgnuav kuv qha rua mej has tas, yog leejtwg saib ib tug quaspuj hab xaav ntxag tug quaspuj ntawd, qhov kws nwg saib le ntawd kuj txhum ib yaam le nwg tub tau ntxag tug quaspuj ntawd lawm ntaag.

²⁹Yog koj saab qhovmuag xis ua rua koj ua txhum, koj ca le muab saab qhovmuag ntawd kaus povtseg! Koj muaj ib saab qhovmuag xwb zoo dlua le muab taagnrho koj lub cev pov rua huv ntuj tawg.

³⁰Yog koj saab teg xis ua rua koj ua txhum, ces koj ca le muab saab teg ntawd txav povtseg! Koj tshuav ib saab teg xwb, zoo dlua le muab taagnrho koj lub cev pov rua huv ntuj tawg.

³¹“Muaj dlua ib zaaj kws luas qha has tas, ‘Yog leejtwg yuav nrauj nwg tug quaspuj, mas nwg yuavtsum ua ntawv nas teg sis nrauj rua nwg tug quaspuj.’

³²Tabsis nwgnuav kuv qha rua mej has tas: yog leejtwg tug quaspuj tsi tau ntxag hluas nraug, nwg ca le muab nrauj lawm, kuj yog nwg ua rua tug quaspuj ua txhum kev nkauj kev nraug, hab yog leejtwg moog yuav tug quaspuj ntawd, kuj ib yaam le tug ntawd ntxag luas quaspuj.

³³“Hab mej tub nov tej lug kws luas qha rua cov tuabneeg thaus u lawm has tas, ‘Mej yuavtsum ua lawv le mej tau coglug tseg rua tug Tswv lawm, tsi xob rhuav tej lug cog tseg ntawd.’

³⁴Tabsis nwgnuav kuv qha rua mej has tas, thaus mej coglug tseg, mej tsi xob twv ntuj twv teb. Tsi xob twv lub ntuj, rua qhov lub ntuj yog Vaajtswv lub zwmtxwv;

³⁵tsi xob twv lub nplajteb, rua qhov lub nplajteb yog Vaajtswv qhov chaw tag taw; tsi xob twv txug lub nroog Yeluxalees, rua qhov lub nroog Yeluxalees yog tug Vaajntxwv kws muaj fwjchim luj lub.

³⁶Tsi xob twv rua mej lub taubhau, rua qhov mej ua tsi tau kuas mej ib txuj plaubhau dlawb lossis ib txuj dlub.

³⁷Qhov kws yog mej ca le has tas ‘Yog,’ qhov kws tsi yog, mej ca le has tas, ‘Tsi yog.’ Yog mej has tshaaj ob lu lug ntawd, ces tej lug ntawd yog lug ntawm dlaab Ntxwgnyoog lug xwb.

³⁸“Mej tub nov tej lug kws qha has tas, ‘Qhovmuag pauj qhovmuag, nav pauj nav.’

³⁹Tabsis nwgnuav kuv qha rua mej has tas: Mej tsi xob ua pauj. Yog leejtwg ntaus mej saab plhu xis, mej ca le tig saab txhumphem rua nwg ntaus hab.

⁴⁰Yog leejtwg kom mej rua huv tsev tu plaub txeeb yuav mej lub tsho kws naav tuaj saab huv, ces mej ca le hle mej lub tsho kws naav tuaj saab nrau rua luas hab.

⁴¹Yog leejtwg yuam mej kuas ris nwg lub nraa moog ib kilumev, ces mej ca le ris moog ob kilumev.

⁴²Yog leejtwg tuaj thov yuav mej ib yaam dlaabtsi, mej ca le muab rua nwg; yog leejtwg qev mej ib yaam dlaabtsi, mej ca le qev rua nwg.

⁴³“Mej tub nov tej lug kws has tas, ‘Yuavtsum hlub mej cov kwvtij hab ntxub mej cov yeebncuab.’

⁴⁴Tabsis nwgnuav kuv qha rua mej has tas: Hlub mej cov yeebncuab hab thov Vaajtswv paab rua cov kws tsimtxom mej,

⁴⁵Yog mej ua le nuav, mej txhaj yog leej Txiv tug kws nyob sau ntuj cov mivnyuas. Rua qhov Vaajtswv ua nwg lub nub ci rua cov tuabneeg ua phem hab cov tuabneeg ua zoo, hab tso naag lug rua cov tuabneeg ncaaj hab cov tuabneeg tsi ncaaj ib yaam nkaus.

⁴⁶Yog mej tsuas hlub cov kws hlub mej xwb, mej xaav has tas Vaajtswv tseem yuav muab nqe zug rua mej hab nua los? Txawm yog cov tuabneeg sau se los puab tub paub hlub cov tuabneeg kws hlub puab hab.

⁴⁷Yog mej tsuas fwm mej cov kwvtij nkaus xwb, mej tsua ua tau zoo tshaaj lwm tug qhov twg? Txawm yog cov tuabneeg kws tsi paub Vaajtswv los puab tub paub sis fwm hab.

⁴⁸Yog le ntawd, mej yuavtsum ua zoo kawg nkaus, ib yaam le mej leej Txiv tug kws nyob sau ntuj ceebtsheej, nwg yog tug zoo kawg nkaus.