Read Hmong Njua Mathais 6 Bible Online

Mathais 6 - Hmong Njua bible

Mathais 6

¹“Mej yuavtsum ceevfaaj, tsi xob coj Vaajtswv txuj Kevcai kuas lwm tug qhuas mej xwb. Yog mej ua le ntawd, mej leej Txiv tug kws nyob sau ntuj ceebtsheej yuav tsi muab nqe zug rua mej.

²“Yog le ntawd, thaus mej pub ib yaam dlaabtsi rua tej tuabneeg txomnyem, mej tsi xob qha rua tug nuav tug u, ib yaam le cov tuabneeg kws ntsejmuag ncaaj sab nkhaus ua nyob rua huv tej tsev saablaaj hab ntawm tej kev tshuam kuas luas qhuas puab. Kuv qha rua mej has tas, puab tub tau puab tej nqe zug lawm.

³Tabsis thaus mej paab ib tug tuabneeg txomnyem, mej tsi xob pub mej saab teg txhumphem paub has tas mej saab teg xis ua dlaabtsi.

⁴Thaus mej paab lwm tug, mej ca le paab tuabywv xwb, mej leej Txiv tug kws nyob sau ntuj pum tej kws mej ua tuabywv ua ntawd, nwg txhaj yuav muab nqe zug rua mej.

⁵“Thaus mej thov Vaajtswv, mej tsi xob ua le cov tuabneeg ntsejmuag ncaaj sab nkhaus ua. Puab nyam moog sawv thov Vaajtswv huv tej tsev saablaaj hab ntawm tej kev tshuam kuas luas pum puab. Kuv qha rua mej has tas, puab tub tau puab tej nqe zug lawm.

⁶Tabsis thaus mej thov Vaajtswv, mej ca le moog rua huv txaaj hab kaw rooj txaag tsaiv, mej maam le thov mej leej Txiv tug kws mej qhovmuag tsi pum. Nwg txhaj yuav muab nqe zug rua mej.

⁷“Thaus mej thov Vaajtswv, tsi xob has moog has lug tej lug kws tsi muaj qaabhau ib yaam le cov tuabneeg tsi ntseeg Vaajtswv, puab xaav has tas yog puab thov ntev le ntawd Vaajtswv txhaj yuav nov.

⁸Mej tsi xob ua le puab. Thaus mej tsi tau thov, mej leej Txiv tub paub tej kws mej xaav yuav lawm.

⁹Mej yuavtsum thov le nuav: ‘Peb leej Txiv tug kws nyob sau ntuj ceebtsheej; Thov kuas suavdlawg fwm koj lub npe;

¹⁰thov koj lug kaav tuabneeg lub sab; thov koj paab kuas peb ua tau lawv le koj lub sab nyam ib yaam le cov kws nyob sau ntuj.

¹¹Thov koj pub mov rua peb muaj noj nub nua.

¹²Thov koj zaam txim rua peb ib yaam le peb tub zaam txim rua cov kws ua txhum rua peb lawm.

¹³Thov koj tsi xob ca tej kev sim sab ntxag tau peb, tabsis thov koj paab kuas peb dlim ntawm dlaab Ntxwgnyoog txais teg.’

¹⁴“Yog mej zaam txim rua tug kws ua txhum rua mej lawm, mej leej Txiv tug kws nyob sau ntuj ceebtsheej yuav zaam txim rua mej.

¹⁵Tabsis yog mej tsi zaam txim rua lwm tug, mej leej Txiv tug kws nyob sau ntuj ceebtsheej yuav tsi zaam txim rua mej hab.

¹⁶“Thaus mej ua kevcai yoo mov, mej tsi xob ua ntsejmuag mluag mluag ib yaam le cov tuabneeg kws ntsejmuag ncaaj sab nkhaus. Puab ua txuj ua ntsejmuag mluag quas mlob, kuas suavdlawg paub has tas yog puab yoo mov. Kuv qha rua mej has tas, puab tub tau puab tej nqe zug lawm.

¹⁷Tabsis thaus mej ua kevcai yoo mov, mej ca le ntxuav muag hab ntsis plaubhau,

¹⁸kuas lwm tug tsi paub has tas yog mej yoo mov. Tsuas pub mej leej Txiv tug kws mej qhovmuag tsi pum paub xwb. Ces mej leej Txiv tug kws pum tej kws mej ua tuabywv ua, nwg txhaj yuav muab nqe zug rua mej.

¹⁹“Mej tsi xob khaws nyaj txag hab qhov txhua chaw rua mej huv nplajteb nuav, rua qhov huv nplajteb nuav muaj ntsaum kaabrwg hab xeb noj, hab muaj tubsaab nyag.

²⁰Tabsis mej ca le khaws nyaj txag hab qhov txhua chaw ca rua mej sau ntuj ceebtsheej, qhov ntawd tsi muaj ntsaum kaabrwg hab xeb noj, hab tsi muaj tubsaab nyag.

²¹Rua qhov mej tej nyaj txag hab qhov txhua chaw nyob qhov twg, mej lub sab yeej nyob qhov ntawd.

²²“Ob lub qhovmuag yog lub teeb kws ci rua lub cev pum kev. Yog mej ob lub qhovmuag pum kev tseeb, taagnrho mej lub cev yuav pum kev kaaj nrig;

²³tabsis yog mej ob lub qhovmuag pum kev tsi tseeb, taagnrho mej lub cev yuav tsaus ntuj nti. Yog has tas qhov pum kev kws mej muaj tsaus lawm, qhov tsaus ntawd tsuas muaj yuav tsaus heev zuj zug ntxiv xwb!

²⁴“Tsi muaj leejtwg yuav ua qhev tau rua ob tug tswv. Yog nwg ua le ntawd, nwg yuav ntxub ib tug hab nyam ib tug; nwg yuav fwm ib tug hab saib tsi taug ib tug. Yog mej yuav muab Vaajtswv hab nyaj txag saib hlub ib yaam nkaus yeej tsi tau.

²⁵“Vim le ntawd kuv txhaj qha rua mej, kuas mej tsi xob txhawj has tas mej yuavtsum muaj zaub mov noj lossis yuavtsum muaj rig tsho naav txhaj nyob taug, rua qhov txujsa tseemceeb dlua tej zaub mov, hab lub cev tseemceeb dlua tej rig tsho.

²⁶Mej sim ua tuab zoo xaav saib tej noog kws yaa sau nruab ntug, cov noog ntawd tsi cog qoobloo, tsi hlais hab tsi sau ntim rua huv txhaab; tabsis mej leej Txiv tug kws nyob sau ntuj ceebtsheej tseem yug cov noog ntawd! Mej tseem muaj nqes dlua cov noog ntawd.

²⁷Mej tej kev txhawj ntawd puas yuav paab tau kuas mej muaj txujsa nyob ob peb xyoos ntxiv?

²⁸“Hab ua le caag mej yuav txhawj has tas mej yuav muab dlaabtsi naav? Mej sim saib tej paaj ntoos tom taj nraag tawg le caag. Tej paaj ntoos ntawd tub tsi ua num hab tsi ntus ntaub naav.

²⁹Tabsis kuv qha rua mej has tas, txawm yog Vaajntxwv Xalumoos muaj nyaj txag ntau kawg le los nwg tub tsi tau naav ib cev rig tsho zoo npaum le tej paaj ntoos ntawd ib lub.

³⁰Tej nroj tsuag kws nyob nub nua xwb, pigkig luas tub yuav muab pov hlawv rua huv qhovcub, ua cav Vaajtswv tub pub rua tej nroj tsuag ntawd zoo nkauj ua luaj. Yog le ntawd, Vaajtswv yimfuab yuav pub rua mej muaj naav zoo dlua tej nroj tsuag ntawd. Ua le caag mej kev ntseeg yuav tsawg ua luaj!

³¹“Yog le ntawd, mej tsi xob txhawj has tas: ‘Peb yuav muab dlaabtsi lug noj lug haus, hab lug naav?’

³²(Cov tuabneeg kws tsi ntseeg Vaajtswv, puab naj nub txhawj txug tej nuav.) Mej leej Txiv tug kws nyob sau ntuj ceebtsheej yeej paub has tas, mej yuavtsum muaj tej nuav.

³³Tabsis mej yuavtsum xub nrhav Vaajtswv lub Tebchaws, hab ua lawv le Vaajtswv lub sab nyam tsaiv, Vaajtswv maam le muab tej nuav ntxiv rua mej.

³⁴Yog le ntawd, mej tsi xob txhawj rua pigkig, rua qhov pigkig yeej muaj kev txhawj txaus rua pigkig lawm. Kev nyuaj sab nub twg yeej muaj txaus rua nub ntawd lawm, tsi taag yuav moog nrhav kev nyuaj sab lug ntxiv.