Read Hmong Njua Mathais 7 Bible Online

Mathais 7 - Hmong Njua bible

Mathais 7

¹“Mej tsi xob txav txim rua lwm tug, Vaajtswv txhaj yuav tsi txav txim rua mej,

²rua qhov Vaajtswv yuav txav txim rua mej ib yaam le mej tau txav txim rua lwm tug, hab mej muab lub luaj le caag luj rua lwm tug lawm, lwm tug yuav muab lub luaj le ntawd luj rua mej.

³Vim le caag mej yuav saib qhov nyuas moov ntoo kws nyob huv mej tug kwvtij lub qhovmuag, tabsis mej tsi paub has tas muaj ib yaav ntoo nyob huv mej lub qhovmuag.

⁴Thaus tseem muaj ib yaav ntoo nyob huv mej lub qhovmuag, mej tsi xob has rua mej tug kwvtij has tas, ‘Ca kuv paab muab koj qhov nyuas moov ntoo kws nyob huv koj lub qhovmuag?’

⁵Mej cov kws yog tuabneeg ntsejmuag ncaaj sab nkhaus! Mej ca le xub muab yaav ntoo huv mej lub qhovmuag tsaiv, mej txhaj yuav pum kev muab qhov nyuas moov ntoo huv mej tug kwvtij lub qhovmuag.

⁶“Mej tsi xob muab tej yaam kws muaj nqes pov rua dlev, nyob tsaam dlev tig lug tum mej. Mej tsi xob muab tej hlaws muaj nqes pov rua ntawm npua hauv ntej, npua yuav muab tsuj xwb.

⁷“Mej thov, mej txhaj yuav tau; mej nrhav, mej txhaj yuav ntsib; mej khob, Vaajtswv txhaj yuav qheb qhovrooj rua mej.

⁸Rua qhov txhua tug kws thov yeej yuav tau, txhua tug kws nrhav yeej yuav ntsib, hab txhua tug kws khob, Vaajtswv yeej yuav qheb qhovrooj rua nwg.

⁹Mej cov kws yog leej txiv, yog mej tug mivnyuas thov mov, mej yuav muab pobzeb rua los?

¹⁰Lossis yog tug mivnyuas thov ntseg, mej yuav muab naab rua los?

¹¹Txawm yog mej yog tuabneeg txhum los mej tseem paub muab yaam kws zoo rua mej tej mivnyuas. Yog le ntawd, mej leej Txiv tug kws nyob sau ntuj ceebtsheej, nwg yimfuab yuav muab tej kws zoo dlua tej ntawd rua txhua tug kws thov nwg hab!

¹²“Yog mej xaav kuas lwm tug ua le caag rua mej, mej yuavtsum ua ib yaam le ntawd rua lwm tug. Ua le nuav txhaj lawv le Mauxes txuj Kevcai hab lawv le cov cev Vaajtswv lug tau qha tseg lawm.

¹³“Mej yuavtsum moog lub qhovrooj nqaim, rua qhov lub qhovrooj luj hab txujkev dlaav coj moog rua ntuj tawg hab muaj coob leej taug txujkev ntawd,

¹⁴Tabsis lub qhovrooj nqaim hab txujkev nqaim kws moog nyuaj yuav coj moog tau txujsa, cov tuabneeg kws taug txujkev ntawd tsi muaj coob leej.

¹⁵“Mej yuavtsum ceevfaaj cov cevlug cuav; thaus puab tuaj cuag mej, puab ua txuj ua le puab yog cov yaaj, tabsis puab lub sab phem ib yaam le maa.

¹⁶Thaus mej pum puab teg num mej yuav paub. Tsob xuavpaug nqai hlau yeej tsi txi txiv maab, hab tsob ntoo xuavpaug paaj ntshaa yeej tsi txi txiv ncuav pas.

¹⁷Ib yaam nkaus le ntawd, tsob ntoo zoo yeej txi cov txiv zoo, tsob ntoo phem yeej txi cov txiv phem.

¹⁸Tsob ntoo zoo yeej tsi txi cov txiv phem, hab tsob ntoo phem yeej tsi txi cov txiv zoo.

¹⁹Txhua tsob ntoo kws tsi txi cov txiv zoo, luas yuav muab ntuv hab muab pov rua huv cub suavtawg.

²⁰Yog le ntawd, mej yuav paub cov xwbfwb cuav lug ntawm puab teg num kws puab ua.

²¹“Tsi yog txhua tug kws hu kuv has tas, ‘Tug Tswv, Tug Tswv,’ ces yuav tau moog Ntuj Ceebtsheej. Tabsis tsuas yog cov kws ua lawv le kuv Txiv tug kws nyob sau ntuj lub sab nyam, txhaj tau moog xwb.

²²Thaus txug nub ntawd yuav muaj ntau leej has rua kuv tas, ‘Tug Tswv, Tug Tswv, peb tub tuav koj lub npe qha Vaajtswv Txujlug, peb tuav koj lub npe ntab dlaab tawm, hab ua ntau yaam txujci tseemceeb!’

²³Thaus ntawd kuv yuav has rua puab tas, ‘Cov tuabneeg sab phem, ca le tsiv moog, kuv tsi paub mej!’

²⁴“Yog le ntawd txhua tug kws nov kuv tej lug hab ua lawv le tej lug ntawd, tug ntawd zoo ib yaam le tug kws muaj tswvyim, nwg ua nwg lub tsev rua sau pobzeb.

²⁵Thaus lug naag xub naag cua, dlej nyaab hab cua ntsawj lub tsev ntawd. Lub tsev ntawd tsi qaug, rua qhov nwg ua rua sau pobzeb.

²⁶“Tug kws nov kuv tej lug, tabsis tsi ua lawv le tej lug ntawd, tug ntawd zoo ib yaam le tug kws tsi muaj tswvyim, nwg ua nwg lub tsev rua sau cov xuabzeb.

²⁷Thaus lug naag xub naag cua, dlej nyaab hab cua ntsawj lub tsev ntawd, ces lub tsev ntawd txawm qaug hab puamtsuaj taag huv tuabsi lawm!”

²⁸Thaus Yexus qha tej nuav taag lawm, cov tuabneeg kws tuaj noog Yexus qha ntawd xaav tsi thoob le.

²⁹Yexus muaj fwjchim qha hab Yexus qha tsi thooj le cov xwbfwb kws qha Vaajtswv txuj Kevcai qha.