Read Hmong Njua Mathais 8 Bible Online

Mathais 8 - Hmong Njua bible

Mathais 8

¹Thaus Yexus nqeg peg roob lug, muaj tuabneeg coob coob tuaj lawv Yexus qaab.

²Muaj ib tug txivneej mob ruas lug txhus caug ndlua ntawm Yexus hauv ntej thov has tas, “Tug Tswv, yog koj txaus sab khu kuv tug mob, koj yeej khu tau kuv zoo.”

³Yexus txawm cev teg moog tuav nkaus tug ntawd hab has tas, “Kuv txaus sab paab koj. Koj tej ruas ca le zoo hlo!” Taamsim ntawd nwg tej ruas txawm zoo taag huv tuabsi lawm.

⁴Yexus has rua nwg tas, “Koj tsi xob moog qha zaaj nuav rua leejtwg le, tabsis koj ca le ncaaj nraim moog cuag tug povthawj hab kuas nwg saib has tas koj tej ruas tub zoo lawm. Tom qaab ntawd koj ca le nqaa khoom moog fij rua Vaajtswv lawv le Mauxes tau qha tseg, suavdlawg txhaj paub has tas koj tub zoo lawm.”.

⁵Thaus Yexus moog txug huv lub nroog Kapena-us, muaj ib tug thawj tubrog pawg pua tuaj cuag Yexus. Nwg thov Yexus has tas,

⁶“Tug Tswv, kuv tug tubkhai mob heev tom tsev, nwg teg taw tub txhaav taag hab nwg txomnyem kawg.”

⁷Yexus has tas, “Kuv yuav moog khu nwg.”

⁸Tug thawj tubrog teb has tas, “Tug Tswv, koj tsi xob moog. Kuv yog ib tug kws tsi tsimnyog koj yuav moog huv kuv lub tsev. Thov koj has ib lus xwb ces kuv tug tubkhai yeej yuav zoo.

⁹Txawm yog kuv los kuv tseem muaj ib cov thawj kws kaav kuv, hab kuv muaj ib cov tubrog kws kuv kaav. Yog kuv has rua tug nuav tas, ‘Moog!’ ces nwg txawm moog. Yog kuv has rua tug tod tas, ‘Lug!’ ces nwg txawm lug. Hab yog kuv has rua kuv tug tubkhai tas, ‘Ua le nuav!’ nwg txawm ua le ntawd.”

¹⁰Thaus Yexus nov tug thawj tubrog has le ntawd, Yexus xaav tsi thoob le, Yexus txhaj tig moog has rua cov tuabneeg coob coob kws lawv Yexus qaab has tas, “Kuv qha rua mej has tas, txawm yog huv cov Yixalayees los kuv tsi tau pum ib tug kws muaj kev ntseeg npaum le nuav.

¹¹Kuv qha rua mej has tas, yuav muaj tuabneeg coob coob tuaj saab nubtuaj hab tuaj saab nubpoob tuaj. Puab cov ntawd yuav nrug Anplahaas, Ixaj, hab Yakhauj puab nyob ua ke huv Vaajtswv lub Tebchaws.

¹²Tabsis cov tuabneeg kws tub tsimnyog yuav tau moog nyob huv Vaajtswv lub Tebchaws, puab yuav tsi tau moog, rua qhov puab tsi noog Vaajtswv lug. Puab yuav raug pov rua huv qhov kws tsaus ntuj nti. Puab yuav quaj qw tum nav qawv qhov ntawd”

¹³Yexus txawm has rua tug thawj tubrog ntawd tas, “Koj ca le rov qaab moog tsev, koj tug tubkhai yuav zoo lawv le koj ntseeg.” Ces taamsim ntawd tug thawj tubrog tug tubkhai tom tsev txawm zoo lawm.

¹⁴Thaus Yexus moog rua huv Petus tsev, Yexus pum Petus nam tais ua npaws hab pw sau txaaj.

¹⁵Yexus tuav nwg txhais teg; ces nwg txawm zoo hab nwg sawv lug ua zaub ua mov rua Yexus noj.

¹⁶Thaus yuav tsaus ntuj muaj tuabneeg coj tej tuabneeg kws raug dlaab tuaj cuag Yexus. Yexus has tuab lus xwb ces dlaab txawm tawm lawm, hab Yexus khu tej tuabneeg kws muaj mob txhua tug zoo huv tuabsi.

¹⁷Yexus ua le ntawd kuas muaj tav lawv le Yaxayas tug kws cev Vaajtswv lug tau qha tseg lawm has tas, “Nwg muab peb tej kev tsaug muas tshem hab nwg ris peb tej kev mob kev nkeeg moog lawm.”

¹⁸Thaus Yexus pum muaj tuabneeg coob coob nyob puagncig nwg, Yexus txawm has rua cov thwjtim has tas, “Ca le moog rua saab havtxwv tim u.”

¹⁹Muaj ib tug xwbfwb qha Vaajtswv txuj Kevcai tuaj cuag Yexus hab has tas, “Xwbfwb, kuv yuav nrug koj moog, txawm yog koj yuav moog qhov twg los kuv yuav nrug koj moog.”

²⁰Yexus teb tug ntawd has tas, “Txawm yog maa los muaj qhov nkaum, hab noog los muaj zeg, tabsis tuabneeg leej Tub tsi muaj chaw pw.”

²¹Muaj dlua ib tug kws yog ib tug thwjtim has tas, “Tug Tswv, thov ca kuv moog log kuv txiv tsaiv, kuv maam le nrug koj moog.”

²²Yexus teb has tas, “Koj ca le nrug kuv moog, ca cov tuabneeg tuag log puab tug tuag.”

²³Tom qaab ntawd Yexus nce moog rua huv lub nkoj, hab nwg cov thwjtim nrug nwg moog.

²⁴Taamsim ntawd txawm muaj cua dlaaj cua dlub hlub heev ntsawj dlej ndlaas lug ntaus lub nkoj ua rua lub nkoj tub yuav tog. Tabsis thaus ntawd Yexus pw tsaug zug lawm.

²⁵Cov thwjtim txawm moog tsaa Yexus has tas, “Tug Tswv, thov koj paab peb, peb tub yuav tuag!”

²⁶Yexus teb has tas, “Ua le caag mej yuav ntshai ua luaj? Ua le caag mej kev ntseeg yuav tsawg ua luaj?” Yexus txawm sawv tseeg lug txwv cua hab dlej, cua txawm tu hab dlej tsi ndlaas lawm.

²⁷Cov thwjtim xaav tsi thoob le, puab sis thaam has tas, “Tug nuav yog leejtwg, ua le caag cua hab dlej tsua noog nwg lug!”

²⁸Thaus Yexus moog txug ntawm cheebtsaam Nkadalas kws nyob rua saab ntug havtxwv tim u, Yexus txawm ntsib ob tug txivneej kws raug dlaab tawm tom roob toj ntxaas lug. Obtug nyaum kawg le, tsi muaj leejtwg kaam taug txujkev ntawd.

²⁹Thaus Yexus ntsib nthaav obtug, obtug txawm qw nrov nrov has tas, “Vaajtswv tug Tub, koj tuaj thaab wb ua dlaabtsi? Tub tsi tau txug lub sijhawm, koj txawm siv tuaj tsimtxom wb lawm los?”

³⁰Nyob tsi dleb ntawd, muaj ib paab npua coob coob taabtom nrhav noj.

³¹Cov dlaab txawm thov Yexus has tas, “Yog koj yuav ntab peb tawm moog, thov ca peb moog rua huv paab npua ntawd.”

³²Yexus has rua cov dlaab ntawd tas, “Ca le moog.” Cov dlaab moog nkaag rua paab npua, ces paab npua txawm dlha moog poob tsaag tsua rua huv havtxwv tuag taag huv tuabsi lawm.

³³Cov tuabneeg kws zuv npua ntawd txawm dlha moog rua huv nroog, qha tej xwm ntawd hab qha zaaj kws dlaab tawm huv ob tug txivneej ntawd rua suavdlawg noog.

³⁴Cov tuabneeg kws nyob huv nroog txawm tawm tuaj saib Yexus; thaus puab pum Yexus, puab txawm thov kuas Yexus tawm huv puab cheebtsaam ntawd moog rua lwm qhov.