Read Hmong Njua Mathais 9 Bible Online

Mathais 9 - Hmong Njua bible

Mathais 9

¹Yexus txawm nce moog rua huv nkoj hab hlaa havtxwv rov lug txug rua huv nwg lub nroog,

²txawm muaj tuabneeg muab choj qhwv ib tug txivneej tuag teg tuag taw kwv tuaj cuag Yexus. Thaus Yexus pum has tas puab muaj kev ntseeg heev le ntawd, Yexus txhaj has rua tug tuag teg tuag taw ntawd has tas, “Mivtub, koj tsi xob nyuaj sab! Kuv tub zaam koj lub txim lawm.”

³Muaj cov xwbfwb kws qha Vaajtswv txuj Kevcai qee leej sis thaam has tas, “Tug txivneej nuav has lug saib tsi taug Vaajtswv!”

⁴Yexus tub paub tej kws puab has lawm, nwg txhaj has rua puab tas, “Ua le caag mej yuav xaav phem ua luaj le?

⁵Lu lug kws has tas, ‘Kuv tub zaam koj lub txim lawm,’ lossis lu lug kws has tas, ‘Koj ca le sawv tseeg moog tsev. Ob lus nuav lu twg yuav yoojyim has dlua?’

⁶Kuv ua le nuav qha rua mej paub has tas, Tuabneeg leej Tub muaj fwjchim huv nplajteb nuav zaam txim tau rua tuabneeg.” Yexus txhaj has rua tug txivneej kws tuag teg tuag taw ntawd has tas, “Koj ca le sawv hab nqaa koj dlaim choj moog tsev!”

⁷Tug txivneej ntawd txawm sawv tseeg moog tsev lawm.

⁸Thaus suavdlawg pum le ntawd, puab ntshai kawg hab puab ua Vaajtswv tsaug, rua qhov Vaajtswv tub pub fwjchim rua tuabneeg lawm.

⁹Yexus txawm tawm qhov ntawd moog, thaus nwg taabtom taug kev moog, nwg pum ib tug txivneej sau se hu ua Mathais nyob quastsawg ntawm lub rooj sau se. Yexus has rua Mathais has tas, “Koj ca le nrug kuv moog.” Ces Mathais txawm sawv tseeg nrug Yexus moog.

¹⁰Thaus Yexus taabtom noj mov huv Mathais tsev, cov tuabneeg sau se hab cov tuabneeg txhum ntau leej tuaj nrug Yexus hab nwg cov thwjtim nyob ntawm rooj noj mov ua ke.

¹¹Thaus cov Falixais pum le ntawd, puab txawm nug Yexus cov thwjtim has tas, “Ua le caag mej tug xwbfwb nrug cov tuabneeg sau se hab cov tuabneeg txhum noj mov ua ke?”

¹²Yexus nov puab sis thaam le ntawd, nwg teb has tas, “Cov tuabneeg tsi muaj mob yeej tsi moog cuag kws tshuaj, tsuas yog cov tuabneeg muaj mob txhaj moog cuag kws tshuaj xwb.

¹³Mej ca le moog nyeem Vaajtswv Txujlug kws has tas, ‘Qhov kws kuv xaav tau yog kuas mej muaj lub sab hlub, tsi yog tug tsaj kws muab tua theej txhoj,’ rua qhov kuv tsi yog lug hu cov tuabneeg ncaaj nceeg, tabsis yog kuv lug hu cov tuabneeg txhum.”

¹⁴Tom qaab ntawd Yauhaas tug kws muab tuabneeg ua kevcai rau dlej cov thwjtim txawm tuaj nug Yexus has tas, “Ua le caag peb cov hab cov Falixais pheej ua kevcai yoo mov, tabsis koj cov thwjtim tsi ua le?”

¹⁵Yexus teb puab has tas, “Mej xaav has tas thaus tug nraug vauv tseem nrug nwg cov phoojywg noj tshoob ua ke, puab yuav nyuaj sab nua los? Puab yeej tsi nyuaj sab le! Tabsis thaus txug lub sijhawm kws luas coj tug nraug vauv moog lawm, ces puab yuav yoo mov.”

¹⁶“Yeej tsi muaj leejtwg yuav muab ib dlaim ntaub tshab lug ntxiv lub tsho qub, yog nwg ua le ntawd, dlaim ntaub tshab yuav dlua ua rua lub tsho qub hajyam ndluag luj xwb.

¹⁷Hab tsi muaj leejtwg yuav muab cov cawv txiv maab tshab ntim rua huv lub naab tawv qub. Yog nwg ua le ntawd lub naab tawv qub yuav tawg, cov cawv txiv maab yuav lug taag, hab lub naab tawv yuav tsi zoo siv lawm. Tabsis cov cawv txiv maab tshab yuavtsum muab ntim rua huv lub naab tawv tshab, lub naab tawv txhaj tsi tawg, cov cawv txiv maab txhaj tsi txeej.”

¹⁸Thaus Yexus tseem taabtom has le ntawd rua puab, cov Yudais ib tug nom txawm tuaj txhus caug ntawm Yexus kutaw hab thov has tas, “Kuv tug ntxhais nyavnyuas tu sav nrho nuav, thov koj moog tsaa teg rua sau nwg, nwg txhaj yuav caj rov lug.”

¹⁹Yexus txawm sawv tseeg nrug tug nom ntawd moog, Yexus cov thwjtim nrug Yexus moog hab.

²⁰Thaus ntawd muaj ib tug quaspuj kws coj khaub dluag tau kaum ob xyoos tsi tu le, nwg txiv ntag lug rua ntawm Yexus nrausqaum hab kov Yexus lub tw tsho.

²¹Nwg xaav has tas, “Yog kuv kov Yexus lub tw tsho, kuv tug mob yuav zoo.”

²²Yexus tig hlo saib tug quaspuj ntawd, hab has rua nwg tas, “Mivntxhais, koj tsi xob nyuaj sab! Vim koj ntseeg, koj tug mob txhaj zoo lawm.” Taamsim ntawd tug quaspuj ntawd tug mob txawm zoo hlo lawm.

²³Thaus Yexus moog txug huv tug nom ntawd lub tsev, nwg pum cov tuabneeg tshuab qeej ntaus nruag hab suavdlawg quaj nyav ntshu nrooj.

²⁴Yexus txawm has kuas cov tuabneeg ntawd tawm moog rua nrau zoov hab has tas, “Tug ntxhais nuav tsi tuag, nwg tsaug zug xwb!” Ces suavdlawg txawm luag Yexus zum zawg.

²⁵Thaus cov tuabneeg tawm moog taag lawm, Yexus txawm moog rua huv chaav kws puab tso tug ntxhais ntawd hab tuav nkaus tug ntxhais txhais teg, ces tug ntxhais ntawd txawm sawv tseeg.

²⁶Zaaj nuav nrov nchaa moo lug moog thoob plawg cheebtsaam ntawd.

²⁷Thaus Yexus tawm qhov ntawd hab taug kev moog, muaj ob tug txivneej dligmuag lawv nwg qaab. Obtug hu Yexus nrov nrov has tas, “Daviv tug Tub, thov koj hlub wb!”

²⁸Thaus Yexus moog rua huv tsev lawm, ob tug txivneej dligmuag ntawd txawm lug cuag nwg. Yexus nug obtug has tas, “Meb puas ntseeg has tas kuv khu tau meb?” Obtug teb has tas, “Tug Tswv, wb ntseeg.”

²⁹Ces Yexus txawm kov obtug ob lub qhovmuag hab has tas, “Ca le muaj lawv le meb ntseeg!”

³⁰Obtug txawm rov pum kev le qub lawm. Yexus txwv obtug has tas, “Meb tsi xob qha zaaj nuav rua leejtwg le!”

³¹Tabsis obtug tawm moog hab qha Yexus lub moo nrov nchaa lug moog thoob plawg cheebtsaam ntawd.

³²Thaus ob tug txivneej dligmuag ntawd taabtom tawm moog, txawm muaj tuabneeg coj ib tug txivneej kws raug dlaab hab has tsi tau lug tuaj cuag Yexus.

³³Thaus Yexus ntab dlaab tawm lawm, taamsim ntawd tug txivneej ntawd txawm has tau lug. Suavdlawg xaav tsi thoob hab has tas, “Peb tsi tau pum dlua le nuav nyob huv lub tebchaws Yixalayees le!”

³⁴Tabsis cov Falixais has tas, “Yog Ntxwgnyoog kws yog cov dlaab tug thawj pub fwjchim rua nwg, nwg txhaj ntab tau dlaab tawm.”

³⁵Yexus moog txhua nrho huv tej nroog hab huv tej zog. Nwg qhuab qha huv tej tsev saablaaj, nwg qha Txujmoo Zoo kws has txug Vaajtswv lub Tebchaws, hab khu tej tuabneeg kws muaj mob, txawm yog tug mob le caag los Yexus khu tau zoo huv tuabsi.

³⁶Thaus Yexus saib cov tuabneeg coob coob ntawd, nwg hlub puab kawg le, rua qhov puab ntxhuv sab hab tsi muaj leejtwg paab puab, puab zoo ib yaam le paab yaaj kws tsi muaj tug tswv yug.

³⁷Ces Yexus has rua nwg cov thwjtim has tas, “Cov nplej kws zoo hlais lawm muaj ntau, tabsis cov tuabneeg kws hlais muaj tsawg.

³⁸Mej ca le thov tug tswv teb kuas nwg khaiv dlua ib co tuabneeg moog paab hlais nwg cov nplej.”