Read Hmong Njua Malakaus 1 Bible Online

Malakaus 1 - Hmong Njua bible

Malakaus 1

¹Ntawm nuav yog Txujmoo Zoo kws has txug Yexus Khetos kws yog Vaajtswv tug Tub.

²Lub hauvpaug chiv yog lawv le Yaxayas kws yog tug cev Vaajtswv lug tau sau tseg lawm has tas: “Vaajtswv has tas, ‘Kuv yuav khaiv kuv tug tubkhai ua koj ntej moog khu kev tog koj.’

³Muaj ib tug has nrov nrov tom roob mojsaab qhua has tas, ‘Ca le khu kev tog tug Tswv; khu kev kuas ncaaj nwg yuav lug!’ ”

⁴Yauhaas tug kws muab tuabneeg ua kevcai raus dlej tawm tom roob mojsaab qhua lug, nwg muab tuabneeg ua kevcai raus dlej hab nwg qhuab qha has tas, “Mej yuavtsum tso mej tej kev txhum tseg hab ua kevcai raus dlej, Vaajtswv txhaj yuav zaam mej lub txim.”

⁵Cov tuabneeg kws nyob thoob plawg huv xeev Yudas hab huv lub nroog Yeluxalees, suavdlawg tuaj moog noog Yauhaas qha. Puab txhua tug nyag leeg nyag lub txim, hab Yauhaas muab puab ua kevcai raus dlej huv tug dlej Yauladees.

⁶Yauhaas naav cev rig tsho kws muab plaub ntxhuav ua, nwg sa hlaab tawv, nwg noj kooj hab zib ntaab.

⁷Yauhaas qha has tas, “Tug kws yuav lawv kuv qaab lug, tug ntawd muaj fwjchim luj dlua kuv, kuv tub tsi tsimnyog nyo moog dlaws nwg txuj nyuas hluas khau.

⁸Kuv muab mej ua kevcai raus rua huv dlej, tabsis tug ntawd yuav muab mej raus lug ntawm Vaaj Ntsujplig tug Dlawbhuv.”

⁹Tom qaab ntawd tsi ntev Yexus txawm tuaj peg lub zog Naxales kws nyob huv xeev Kalilais tuaj, hab Yauhaas muab nwg ua kevcai raus dlej huv tug dlej Yauladees.

¹⁰Thaus Yexus sawv huv dlej lug, taamsim ntawd Yexus txawm pum rooj ntug qheb hlo, hab pum Vaaj Ntsujplig zoo le ib tug nquab lug rua sau Yexus.

¹¹Hab Yexus nov ib lub suab has sau ntuj tuaj has tas, “Koj yog kuv tug Tub kws kuv hlub. Kuv txaus sab rua koj.”

¹²Taamsim ntawd Vaaj Ntsujplig kuas Yexus moog rua tom roob mojsaab qhua,

¹³Yexus nyob tod tau plaub caug nub, dlaab Ntxwgnyoog sim Yexus sab, Yexus nrug tej tsaj qus nyob, tabsis muaj ib cov timtswv ceebtsheej lug tu Yexus.

¹⁴Thaus puab muab Yauhaas kaw lawm, tom qaab ntawd Yexus txawm moog rua peg Kalilais hab qha Vaajtswv Txujmoo Zoo peg.

¹⁵Yexus qha has tas, “Tub txug lub sijhawm kws Vaajtswv lub Tebchaws lug ze lawm! Mej ca le tso mej tej kev txhum tseg lug ntseeg Txujmoo Zoo!”

¹⁶Thaus Yexus taabtom taug ntug dlej Havtxwv Kalilais moog, nwg pum ob tug tuabneeg nrhav ntseg kws yog Ximoos hab nwg tug kwv Aadales taabtom muab vaag ntaus ntseg huv havtxwv.

¹⁷Yexus has rua obtug tas, “Meb ca le nrug kuv moog, kuv yuav qha kuas meb paub moog nrhav tuabneeg.”

¹⁸Taamsim ntawd obtug txawm tso plhuav obtug ob lub vaag tseg hab nrug Yexus moog.

¹⁹Yexus moog tom ntej mivntsiv, nwg pum dlua ob tug kwvtij kws yog Yakaunpaus hab Yauhaas, obtug yog Xenpedais tub. Obtug taabtom ntxiv vaag huv nkoj.

²⁰Thaus Yexus pum dlheev obtug, ces Yexus txawm hu obtug lug; obtug txawm tso obtug txiv Xenpedais hab cov tubkhai tseg rua huv lub nkoj, hab obtug nrug Yexus moog.

²¹Yexus hab nwg cov thwjtim moog txug huv lub nroog Kapena-us, nub Xanpataus Yexus moog qhuab qha huv lub tsev saablaaj.

²²Cov tuabneeg kws tuaj noog Yexus qhuab qha, puab xaav tsi thoob le, rua qhov Yexus tej lug qha tseemceeb heev, nwg qha tsi thooj le cov xwbfwb kws qha Vaajtswv txuj Kevcai qha.

²³Taamsim ntawd muaj ib tug txivneej raug dlaab lug rua huv tsev saablaaj. Nwg qw nrov nrov has tas,

²⁴“Yexus kws yog tuabneeg Naxales, koj tuaj taabkaum peb ua dlaabtsi? Koj tuaj ua kuas peb puamtsuaj los? Kuv paub koj yog leejtwg, koj yog Vaajtswv tug tubkhai kws dlawbhuv!”

²⁵Yexus has tawv tawv rua dlaab has tas, “Koj tsi xob has lug, koj ca le tawm huv tug txivneej nuav moog!”

²⁶Dlaab txawm ua rua tug txivneej ntawd fuam ib thaaj hab qw nrov nrov, ces dlaab txawm tawm plawg lawm.

²⁷Cov tuabneeg kws nyob ntawd xaav tsi thoob le, puab txawm sis nug has tas, “Muaj dlua ib zaaj lug qha tshab los ua caag? Tug txivneej nuav muaj fwjchim ntab tau dlaab hab dlaab kuj noog nwg lug!”

²⁸Yexus lub moo txawm nrov nchaa moog thoob plawg txhua qhov huv xeev Kalilais.

²⁹Yakaunpaus, Yauhaas hab taagnrho Yexus cov thwjtim nrug Yexus tawm huv tsev saablaaj moog rua tom Ximoos hab Aadales tsev.

³⁰Ximoos nam tais ua npaws hab pw sau txaaj, thaus Yexus moog txug ndlua huv tsev, muaj tuabneeg qha rua Yexus has tas Ximoos nam tais mob.

³¹Yexus txawm moog saib nwg, Yexus tuav nwg teg nqug nwg sawv. Ces nwg txawm zoo hab sawv lug ua zaub ua mov rua puab noj.

³²Thaus nub poob qho kws yuav tsaus ntuj, muaj tuabneeg coj tej tuabneeg kws muaj mob hab tej tuabneeg kws raug dlaab tuaj cuag Yexus.

³³Tej tuabneeg zej zog tuaj nyob nrau qhovrooj.

³⁴Yexus khu txhua tug kws muaj mob zoo huv tuabsi hab Yexus ntab ntau tug dlaab tawm. Yexus tsi pub dlaab has lug, rua qhov dlaab yeej paub Yexus.

³⁵Nub tom qaab thaus kaaj ntug txoog, Yexus txawm sawv hab tawm huv tsev moog rua tom ib qhov chaw kws tsi muaj tuabneeg hab thov Vaajtswv.

³⁶Ximoos hab nwg cov phoojywg moog nrhav Yexus,

³⁷thaus puab nrhav tau Yexus lawm, puab has rua Yexus has tas, “Muaj tuabneeg coob coob tuaj nrhav koj.”

³⁸Yexus teb has tas, “Peb yuavtsum moog txhua nrho tej zog kws nyob ibncig nuav hab kuv yuavtsum moog qha huv tej zog ntawd, rua qhov kuv yeej los lug ua teg num nuav.”

³⁹Yexus txawm moog thoob plawg huv xeev Kalilais, nwg qhuab qha huv tej tsev saablaaj, hab nwg ntab ntau tug dlaab tawm huv cov tuabneeg kws raug dlaab moog.

⁴⁰Muaj ib tug txivneej mob ruas tuaj cuag Yexus, nwg txhus caug ndlua ntawm Yexus kutaw hab thov has tas, “Yog koj txaus sab khu kuv tug mob, koj yeej khu tau.”

⁴¹Yexus hlub nwg heev, Yexus txawm cev teg moog tuav nwg hab has tas, “Kuv txaus sab paab koj, koj tej ruas ca le zoo hlo!”

⁴²Taamsim ntawd nwg tej ruas txawm zoo taag huv tuabsi lawm.

⁴³Yexus txwv tawv tawv hab kuas nwg ca le moog,

⁴⁴Yexus has tas, “Koj tsi xob qha zaaj nuav rua leejtwg. Koj ca le ncaaj nraim moog cuag tug povthawj, kuas nwg saib has tas koj tej ruas tub zoo lawm; hab tom qaab ntawd koj ca le nqaa khoom moog hlawv fij rua Vaajtswv lawv le Mauxes tau qha tseg, suavdlawg txhaj paub has tas koj tub zoo lawm.”

⁴⁵Tabsis nwg moog qha zaaj nuav rua suavdlawg thoob plawg txhua qhov huv tuabsi, nwg tsi zais le, txij nub ntawd lug Yexus moog tsi tau taabmeeg huv tej nroog lawm. Tabsis Yexus moog rua tom tej qhov chaw kws tsi muaj tuabneeg nyob coob, hab pheej muaj tuabneeg tuaj txhua qhov tuaj cuag Yexus.