Read Hmong Njua Malakaus 10 Bible Online

Malakaus 10 - Hmong Njua bible

Malakaus 10

¹Yexus tawm huv lub nroog ntawd moog rua nraag xeev Yudas, hab hlaa tug dlej Yauladees moog rua saab tim u. Muaj tuabneeg coob coob tuaj cuag Yexus, hab Yexus qha puab ib yaam le nwg naj zag qha.

²Cov Falixais qee leej tuaj cuag Yexus, hab xaav sim Yexus. Puab nug Yexus has tas, “Peb txuj kevcai puas pub ib tug quasyawg twg muab nwg tug quaspuj nrauj?”

³Yexus teb puab has tas, “Mauxes sau tseg le caag qha rua mej?”

⁴Puab teb has tas, “Mauxes pub peb nrauj. Tabsis yuavtsum xub ua ntawv nas teg tsaiv maam le nrauj tau.”

⁵Yexus has rua puab tas, “Qhov kws Mauxes sau txuj cai ntawd rua mej, tub yog vim mej tawv ncauj.

⁶Tabsis thaus chivkeeb kws Vaajtswv tsim lub ntuj hab lub nplajteb, Vaajtswv tsim tug quasyawg hab tug quaspuj,

⁷‘Tub yog vim le nuav tug quasyawg txhaj tso nwg nam nwg txiv tseg, hab moog nrug nwg tug quaspuj nyob,

⁸hab obtug yuav koom ua ib lub cev. Yog le ntawd, obtug tsi yog ob leeg lawm, tabsis yog ib leeg xwb.’

⁹Vaajtswv tub muab obtug txis ua txwj ua nkawm lawm, yog le ntawd tuabneeg tsi xob muab obtug cais.”

¹⁰Thaus Yexus hab cov thwjtim moog rua huv tsev lawm, cov thwjtim txawm nug Yexus txug zaaj nuav.

¹¹Yexus has rua puab tas, “Yog leejtwg muab nwg tug quaspuj nrauj hab moog yuav dlua quaspuj, kuj yog nwg ntxag luas quaspuj.

¹²Ib yaam nkaus le ntawd, yog ib tug quaspuj muab nwg tug quasyawg nrauj, hab nwg moog yuav dlua quasyawg, kuj yog nwg ntxag luas quasyawg.”

¹³Muaj tuabneeg coj puab tej mivnyuas tuaj cuag Yexus, hab thov Yexus cev teg plhw cov mivnyuas yau, tabsis cov thwjtim tshev cov tuabneeg ntawd.

¹⁴Thaus Yexus pum cov thwjtim ua le ntawd, Yexus tsi txaus sab, hab nwg has rua cov thwjtim has tas, “Ca cov mivnyuas lug cuag kuv, tsi xob txwv puab, rua qhov Vaajtswv lub Tebchaws yog cov tuabneeg kws muaj lub sab mog sab muas le cov mivnyuas ntawd tug.

¹⁵Kuv qha tseeb rua mej has tas, yog leejtwg tsi muaj lub sab mog sab muas le cov mivnyuas yau nuav, tug ntawd yuav tsi tau Vaajtswv lub Tebchaws ua nwg tug.”

¹⁶Yexus txawm nqug cov mivnyuas yau ntawd lug rua huv nwg xubndlag, nwg cev teg plhw puab txhua tug hab foom koob moov rua puab.

¹⁷Thaus Yexus taabtom sawv kev moog, muaj ib tug txivneej dlha dlha tuaj txhus caug ndlua ntawm Yexus hauv ntej, nwg nug Yexus has tas, “Tug Xwbfwb kws muaj lub sab zoo, kuv yuav ua le caag, kuv txhaj tau txujsa kws ntev dlhawv moog ibtxhis?”

¹⁸Yexus teb nwg has tas, “Vim le caag koj hu kuv has tas, tug kws muaj lub sab zoo? Tsi muaj ib tug kws muaj lub sab zoo, tsuas yog Vaajtswv tuab leeg xwb.

¹⁹Koj yeej paub tej kevcai kws has tas: ‘Tsi xob tua tuabneeg; tsi xob ntxag luas quaspuj luas quasyawg; tsi xob ua tubsaab; tsi xob ua timkhawv tsi tseeb, tsi xob ntxo luas tug; hab fwm koj nam koj txiv.’ ”

²⁰Tug txivneej ntawd teb has tas, “Xwbfwb, tej kws koj has ko, kuv tub coj thaus kuv tseem yau lug lawm.”

²¹Yexus hlub tug ntawd, Yexus tsaa qhovmuag saib nwg hab has tas, “Tseem tshuav ib qho kws koj tsi tau ua. Koj ca le rov moog muab koj tej qhov txhua chaw muag huv tuabsi, hab muab cov nyaj ntawd coj moog faib rua cov tuabneeg pluag, koj txhaj yog tug npluanuj nyob sau ntuj ceebtsheej. Tom qaab ntawd koj ca le tuaj nrug kuv moog.”

²²Thaus tug txivneej ntawd nov dlheev Yexus has le ntawd, nwg ua ntsejmuag ntshaus ntsho, nwg txawm rov moog tsev lawm, nwg nyuaj sab kawg le, rua qhov nwg npluanuj heev.

²³Yexus tig lug saib cov thwjtim hab has rua puab tas, “Cov tuabneeg npluanuj yuav moog rua Vaajtswv lub Tebchaws, mas nyuaj kawg le!”

²⁴Thaus cov thwjtim nov Yexus has le ntawd, puab xaav tsi thoob le, tabsis Yexus has ntxiv tas, “Cov mivnyuas, tuabneeg yuav moog Vaajtswv lub Tebchaws mas nyuaj kawg le!

²⁵Ib tug ntxhuav nkaag lub qhov koob, yoojyim dlua ib tug tuabneeg npluanuj moog rua Vaajtswv lub Tebchaws.”

²⁶Cov thwjtim nov le ntawd, puab hajyam xaav tsi thoob. Puab sis thaam has tas, “Yog le ntawd leejtwg txhaj yuav dlim?”

²⁷Yexus tsaa qhovmuag saib cov thwjtim hab has tas, “Tuabneeg ua tsi tau, tabsis Vaajtswv ua tau; rua qhov Vaajtswv ua tau txhua yaam huv tuabsi.”

²⁸Ces Petus has rua Yexus has tas, “Peb tub tso txhua yaam tseg, hab tuaj nrug koj moog lawm.”

²⁹Yexus has rua puab tas, “Yog tag, tabsis kuv qha tseeb rua mej has tas, tug kws tso vaaj tse, tso kwvtij, tso nkauj muam, tso nam txiv hab mivnyuas, hab tso laj teb tseg, vim nwg nrug kuv moog hab qha Txujmoo Zoo,

³⁰tam nuav, nwg yuav tau ib puas npaug ntxiv, xws le: vaaj tse, kwvtij, nkauj muam, nam hab txiv, mivnyuas, laj teb, hab nwg yuav raug kev tsimtxom; tam tom ntej nwg yuav tau txujsa ntev dlhawv moog ibtxhis.

³¹Tabsis muaj ntau leej kws nwgnuav ua cov thawj, puab yuav tau moog nyob tom tw, hab muaj ntau leej kws nyob tom tw, yuav tau lug ua cov thawj.”

³²Thaus Yexus hab nwg cov thwjtim taug kev moog rua nraag lub nroog Yeluxalees, Yexus ua cov thwjtim ntej, cov thwjtim poob sab, hab cov tuabneeg kws lawv qaab ntshai kawg le. Yexus txawm rov coj cov thwjtim moog rua ib caag hab qha tej xwm kws yuav lug raug nwg rua puab noog.

³³Yexus has tas, “Nwgnuav peb taabtom taug kev moog rua nraag lub nroog Yeluxalees, thaus moog txug nraag yuav muaj tuabneeg nteg Tuabneeg leej Tub coj moog rua cov thawj ntawm cov povthawj hab cov xwbfwb kws qha Vaajtswv txuj Kevcai. Puab yuav txav txim coj nwg moog tua povtseg, hab muab nwg rua lwm Tsaav Tuabneeg,

³⁴puab yuav thuam nwg, ua saib tsi taug nwg, ntu quavncaug rua nwg, nplawm nwg, hab muab nwg tua povtseg; tom qaab ntawd peb nub nwg yuav sawv huv qhov tuag rov qaab lug.”

³⁵Tom qaab ntawd Yakaunpaus hab Yauhaas kws yog Xenpedais ob tug tub tuaj cuag Yexus hab has tas, “Xwbfwb, thov koj pub yaam kws wb xaav tau rua wb.”

³⁶Yexus nug obtug has tas, “Meb xav kuas kuv muab dlaabtsi rua meb?”

³⁷Obtug teb has tas, “Thaus koj ua vaajntxwv nyob sau koj lub zwmtxwv kws ci ntsaa ab, thov koj ca wb ib tug nyob ntawm koj saab xis, ib tug nyob ntawm koj saab txhumphem.”

³⁸Yexus has rua obtug tas, “Yaam kws meb thov nuav, meb tsi totaub. Lub khob kws kuv yuav haus, meb puas haus taug? Txuj kevcai raus dlej kws kuv yuav raus, meb puas raus taug?”

³⁹Obtug teb has tas, “Taug xwb.” Yexus has rua obtug tas, “Lub khob kws kuv yuav haus, meb yeej yuav haus taug, hab txuj kevcai raus dlej kws kuv yuav raus, meb yeej yuav raus taug tag.

⁴⁰Tabsis qhov kws meb ib tug yuav nyob ntawm kuv saab xis, hab ib tug yuav nyob ntawm kuv saab txhumphem ntawd, kuv muab tsi tau rua meb. Yog Vaajtswv npaaj rua leejtwg, tug ntawd txhaj tau xwb.”

⁴¹Thaus cov thwjtim kaum leej nov le ntawd, puab chim rua Yakaunpaus hab Yauhaas obtug.

⁴²Yexus hu cov thwjtim txhua tug lug ua ke hab has rua puab has tas, “Mej tub paub lawm has tas, cov numtswv kws saib pejxeem muaj fwjchim kaav pejxeem, hab cov thawj muaj fwjchim yuam kuas cov pejxeem ua lawv le puab has.

⁴³Tabsis mej tsi xob ua le ntawd, mej cov yog leejtwg xaav ua tug hlub, tug ntawd yuavtsum ua suavdlawg tug tubkhai,

⁴⁴hab mej cov yog leejtwg xaav ua tug thawj, tug ntawd yuavtsum ua suavdlawg qhev.

⁴⁵Txawm yog Tuabneeg Leej Tub los nwg tsi tau kuas leejtwg tu nwg, tabsis nwg lug tu suavdlawg, hab muab nwg txujsa lug txhwv ntau leej.”

⁴⁶Yexus hab nwg cov thwjtim tuaj txug huv lub nroog Yelikaus. Thaus Yexus puab taabtom taug kev huv lub nroog moog, muaj tuabneeg coob coob nrug puab moog, puab moog ntsib ib tug txivneej dligmuag hu ua Npatimes nyob ntawm ntug kev thov khawv, nwg yog Times tug tub.

⁴⁷Thaus nwg nov suavdlawg has tas, Yexus tug kws yog tuabneeg Naxales tuaj, ces nwg txawm hu nrov nrov has tas, “Yexus kws yog Daviv tug Tub! Thov koj taabncuab kuv lauj!”

⁴⁸Muaj ntau leej cheem nwg kuas nwg tsi xob has lug, tabsis nwg hajyam hu nrov has tas, “Daviv tug Tub, thov koj taabncuab kuv lauj!”

⁴⁹Yexus txawm nreg hab has tas, “Hu nwg lug ntawm nuav.” Yog le ntawd, puab txawm moog has rua tug dligmuag tas, “Yexus hu koj, koj ca le zoo sab hab sawv moog cuag nwg.”

⁵⁰Tug dligmuag txawm hle hlo nwg lub tsho ntev hab sawv tseeg moog cuag Yexus.

⁵¹Yexus nug tug dligmuag has tas, “Koj xaav kuas kuv paab koj dlaabtsi?” Tug dligmuag teb has tas, “Xwbfwb, kuv xaav rov pum kev.”

⁵²Yexus has rua nwg tas, “Koj ca le moog, koj txujkev ntseeg tub ua rua koj ob lub qhovmuag zoo lawm.” Taamsim ntawd nwg txawm pum kev hab nrug Yexus taug kev moog.