Read Hmong Njua Malakaus 16 Bible Online

Malakaus 16 - Hmong Njua bible

Malakaus 16

¹Thaus dlhau nub Xanpataus lawm, Malis Madalas, Malis kws yog Yakaunpaus nam, hab Xalaumes txawm moog yuav tshuaj tsw qaab coj moog pleev Yexus lub cev.

²Nubkaaj thaus sawv ntxuv puab moog txug tom lub qhov ntxaa thaus nub taabtom tawm tuaj.

³Thaus puab taug kev moog puab sis thaam has tas, “Leejtwg yuav paab muab dlaim txag zeb kws npug lub rooj ntxaas dlov tawm?” (Dlaim txag zeb ntawd luj kawg le.)

⁴Thaus puab moog yuav txug, puab tsaa qhovmuag saib hab pum dlaim txag zeb tub muab dlov rua ib saab lawm.

⁵Puab moog rua huv lub qhov ntxaa, hab puab pum ib tug tub hluas naav ib lub tsho dlawb ntev ntev nyob huv lub qhov ntxaa saab xis, puab ntshai kawg le.

⁶Tug tub hluas ntawd has rua puab tas, “Mej tsi xob ntshai, kuv paub has tas mej tuaj nrhav Yexus kws yog tuabneeg Naxales kws luas muab ntsa rua sau ntoo khaublig. Nwg tsi nyob ntawm nuav, nwg tub sawv lawm! Mej saib ntawm nuav yog qhov chaw kws luas tso nwg lub cev ca.

⁷Mej ca le rov qaab moog qha rua nwg cov thwjtim, hab has rua Petus has tas, ‘Nwg yuav ua mej ntej moog rua peg Kalilais, mej yuav ntsib nwg peg lawv le nwg tau qha rua mej lawm.’ ”

⁸Cov quaspuj ntawm txawm tawm huv lub qhov ntxaa dlha rov qaab lug, ntshai ua ib ce tshee quas nyo. Puab tsi qha rua leejtwg le, rua qhov puab ntshai heev.

⁹[Nub ib kws yog Nubkaaj thaus sawv ntxuv kws Yexus sawv huv qhov tuag rov qaab lug, Yexus xub lug tshwm rua Malis Madalas pum. Tug Malis nuav yog tug kws thaus raug xyaa tug dlaab hab Yexus ntab cov dlaab ntawd tawm lawm.

¹⁰Nwg moog qha tej kws nwg pum rua Yexus cov phoojywg. Thaus ntawd puab taabtom nyuaj sab hab quaj ntsuag;

¹¹puab nov Malis has tas, Yexus rov muaj txujsa hab Malis tub pum Yexus lawm los puab tsi ntseeg Malis tej lug le.

¹²Tom qaab ntawd, Yexus lug tshwm rua ob tug thwjtim pum, thaus obtug taabtom taug kev yuav moog peg yaajsaab, tabsis nwg lub cev hloov lawm.

¹³Obtug rov qaab lug qha tej nuav rua cov thwjtim noog, tabsis puab tsi ntseeg obtug tej lug le.

¹⁴Thaus kawg Yexus lug tshwm rua kaum ib tug thwjtim pum thaus puab taabtom noj mov. Yexus tshev cov thwjtim, rua qhov puab tsi ntseeg, puab muaj lub sab tawv, hab tsi ntseeg tej lug kws cov tuabneeg has tas, puab tub pum Yexus sawv rov muaj sa lawm.

¹⁵Yexus has rua cov thwjtim has tas, “Mej ca le moog thoob plawg lub nplajteb nuav, hab qha Txujmoo Zoo kuas suavdlawg nov.

¹⁶Tug kws ntseeg hab ua kevcai raus dlej yuav dlim; tabsis tug kws tsi ntseeg yuav raug txim.

¹⁷Cov kws ntseeg yuav tau lub fwjchim ua tej txujci tseemceeb: puab yuav tuav kuv lub npe ntab tau dlaab tawm; puab yuav has tau tej lug txawv txawv.

¹⁸Yog puab nteg naab los naab yuav tsi tum puab, yog puab haus tej tshuaj muaj taug los puab yuav tsi tuag; thaus puab cev teg tuav cov tuabneeg muaj mob, cov tuabneeg ntawd yuav zoo.”

¹⁹Thaus Tswv Yexus qha puab taag, Vaajtswv txawm coj Yexus moog rua sau ntuj ceebtsheej lawm, hab nwg moog nyob ntawm Vaajtswv saab xis.

²⁰Cov thwjtim txawm moog qha thoob plawg txhua qhov, hab tug Tswv nrug puab ua num, nwg pub fwjchim rua puab ua tau tej txujci tseemceeb, suavdlawg txhaj paub has tas, tej lug kws puab qha yeej tseeb tag.] 9 [Cov quaspuj moog cuag Petus hab nwg cov phoojywg, hab qha txhua yaam kws Yexus has rua Petus puab. 10 Tom qaab ntawd, Yexus khaiv nwg cov thwjtim moog qha txujkev ncaaj nceeg hab txujkev cawm dlim kws nyob moog ibtxhis thoob plawg saab nubtuaj moog rua saab nubpoob].