Read Hmong Njua Malakaus 2 Bible Online

Malakaus 2 - Hmong Njua bible

Malakaus 2

¹Tau ob peb nub tom qaab ntawd Yexus rov qaab lug txug rua huv lub nroog Kapena-us, suavdlawg nov has tas, Yexus rov lug tsev lawm.

²Muaj tuabneeg coob coob tuaj saib Yexus, puab nyob puv tsev taag, txawm yog ntawm qhovrooj los tub tsi tau kev moog rua huv tsev.

³Thaus Yexus taabtom qha Txujmoo Zoo rua puab noog, ces txawm muaj plaub leeg kwv ib tug txivneej tuag teg tuag taw tuaj rua Yexus khu.

⁴Tabsis muaj tuabneeg coob coob, puab tsi tau kev kwv nwg moog cuag Yexus, ces puab txawm nce moog rua sau ruv tsev hab lauj ib qho ncaaj ntawm Yexus rua sau. Thaus puab qheb tau lawm, puab txawm muab hlua khi dlaim choj kws pua nwg tso nwg dlauv moog rua huv.

⁵Thaus Yexus pum has tas puab muaj kev ntseeg heev, Yexus txawm has rua tug txivneej kws tuag teg tuag taw ntawd has tas, “Mivtub, kuv tub zaam koj lub txim lawm.”

⁶Cov xwbfwb kws qha Vaajtswv txuj Kevcai qee leej kws nyob ntawd xaav has tas,

⁷“Ua le caag nwg yuav has le ntawd? Nwg has le ntawd, kuj yog nwg saib tsi taug Vaajtswv! Tsi muaj leejtwg zaam tau tuabneeg lub txim, tsuas yog Vaajtswv tuab leeg xwb txhaj zaam tau!”

⁸Taamsim ntawd Yexus paub has tas puab xaav le ntawd, Yexus txawm has rua puab tas, “Ua le caag mej xaav le ntawd?

⁹Lu lug kws has rua tug txivneej tuag teg tuag taw nuav has tas, ‘Kuv tub zaam koj lub txim lawm,’ lossis lu lug kws has tas, ‘Ca le sawv muab koj dlaim choj pua chaw nqaa moog tsev.’ Ob lu lug nuav lu twg yuav yoojyim has dlua?

¹⁰Kuv ua le nuav qha rua mej paub has tas, Tuabneeg leej Tub muaj fwjchim nyob huv nplajteb nuav zaam txim tau rua tuabneeg.” Yexus txhaj has rua tug txivneej tuag teg tuag taw has tas,

¹¹“Kuv has rua koj has tas, koj ca le sawv hab nqaa koj dlaim choj pua chaw moog tsev!”

¹²Thaus suavdlawg taabtom saib ntsoov nwg, nwg txawm sawv tseeg nqaa hlo nwg dlaim choj pua chaw tawm nrawm nroog moog lawm. Puab xaav tsi thoob le, puab qhuas Vaajtswv has tas, “Peb tsi tau pum dlua le nuav ib zag le!”

¹³Yexus rov qaab moog nraag ntug Havtxwv Kalilais. Muaj ib paab tuabneeg coob coob tuaj cuag nwg, ces nwg txawm qha puab.

¹⁴Thaus Yexus taabtom moog, nwg pum ib tug txivneej sau se hu ua Levis kws yog Alafais tug tub nyob ntawm lub rooj sau se. Yexus has rua Levis has tas, “Koj ca le nrug kuv moog.” Ces Levis txawm sawv tseeg nrug Yexus moog.

¹⁵Tom qaab ntawd Yexus moog noj mov huv Levis tsev. Cov tuabneeg sau se hab cov tuabneeg txhum ntau leej nrug Yexus moog, hab muaj coob leej nrug Yexus hab Yexus cov thwjtim noj mov ua ke.

¹⁶Cov xwbfwb kws qha Vaajtswv txuj Kevcai kws yog cov Falixais qee leej pum Yexus nrug cov tuabneeg txhum hab cov tuabneeg sau se noj mov ua ke, puab txawm nug Yexus cov thwjtim has tas, “Vim le caag Yexus yuav nrug cov tuabneeg sau se hab cov tuabneeg txhum noj mov?”

¹⁷Yexus nov puab nug le ntawd, Yexus txawm teb has tas, “Cov tuabneeg tsi muaj mob yeej tsi moog cuag kws tshuaj, tsuas yog cov tuabneeg muaj mob txhaj moog cuag kws tshuaj xwb. Kuv tsi yog lug hu cov tuabneeg ncaaj nceeg, tabsis kuv lug hu cov tuabneeg txhum.”

¹⁸Muaj ib zag Yauhaas tug kws muab tuabneeg ua kevcai raus dlej cov thwjtim hab cov Falixais taabtom ua kevcai yoo mov, txawm muaj tuabneeg tuaj nug Yexus has tas, “Ua le caag Yauhaas cov thwjtim hab cov Falixais cov thwjtim ua kevcai yoo mov, tabsis koj cov tsi yoo?”

¹⁹Yexus teb has tas, “Mej xaav has tas thaus tug nraug vauv tseem nrug nwg cov phoojywg noj tshoob ua ke, puab yuav yoo mov nua los? Thaus tug raug vauv tseem nrug puab nyob, puab yeej yuav tsi yoo le.

²⁰Tabsis Thaus txug lub sijhawm kws luas coj tug raug vauv moog lawm, ces puab yuav yoo mov.

²¹“Tsi muaj leejtwg yuav muab dlaim ntaub tshab lug ntxiv rua lub tsho qub, yog ua le ntawd, dlaim ntaub tshab yuav ua rua lub tsho qub hajyam ndluag luj ntxiv.

²²Hab tsi muaj leejtwg yuav muab cov cawv txiv maab tshab ntim rua huv lub naab tawv qub, yog ua le ntawd, cov cawv txiv maab tshab yuav tsaam kuas lub naab tawv qub tawg, cov cawv txiv maab yuav lug taag, hab lub naab tawv qub yuav tsi zoo siv lawm. Cov cawv txiv maab tshab yuavtsum muab ntim rua huv lub naab tawv tshab, lub naab tawv txhaj tsi tawg.”

²³Muaj ib zag kws yog nub Xanpataus, Yexus hab nwg cov thwjtim taug kev moog txug huv ib dlaim teb npleg. Cov thwjtim txawm dle nplej lug tev noj.

²⁴Thaus cov Falixais pum Yexus cov thwjtim ua le ntawd, puab txawm has rua Yexus has tas, “Koj saib, nub Xanpataus koj cov thwjtim ua le ntawd, puab ua txhum peb txuj kevcai lawm.”

²⁵Yexus teb has tas, “Mej tsi tau nyeem zaaj kws thaus Daviv hab nwg cov tuabneeg tshaib plaab, puab xaav tau dlaabtsi noj, nwg ua le caag los?

²⁶Daviv moog rua huv lub Tuamtsev hab muab tej ncuav kws tub muab fij rua Vaajtswv lawm lug noj. Thaus ntawd yog lub sijhawm kws Anpiyathas ua tug Povthawj Hlub. Lawv le peb txuj Kevcai, tsuas yog cov povthawj txhaj noj tau tej ncuav ntawd xwb, tabsis Daviv noj hab muab faib rua cov tuabneeg kws nrug nwg ua ke noj huv tuabsi.”

²⁷Yexus xaus lug has tas, “Vaajtswv tsim nub Xanpataus rua tuabneeg; tsi yog tsim tuabneeg rua nub Xanpataus.

²⁸Yog le ntawd, Tuabneeg leej Tub yog tug Tswv nub Xanpataus.”